ثورتان

    
      فى يوم 23 يولية العام 1952 كنت وبعض الاصدقاء فى مرسى مطروح فى اجازة الصيف ، بنام فى خيمة على البحر مباشرة على بعد 4 كيلو من المدينة  . ايامها عشان تروح مطروح  كان ضرورى من استخراج تصريح بصورة شمسية  من سلاح الحدود .. ودى كانت رابع رحلة اشترك فيها..العريش 1949   وغزة 50 ومرسى مطروح 51 والاخيرة اللى بحكى الان  عنها فى 52....كانت قى مرسى مطروح ايضا  .نصحى  مع الشروق ونام العشاء... ايامها ما كانش الراديو الترنزيستور اخترعوه ولا حتى فيه تليفونات ...معزولين تماما عن العالم حتى الجرائد ما كناش بنشوفها ...
      كنا 12 نفر ، يوم 23 يوليوظهرا  نزل اتنين منا  الى البلدة التى تبعد عن معسكرنا 4 كيلو ، فقد كنا معسكرين فى الميناء امام جبل روميل ، يشتروا بعض الاغراض و لم يكن فى مطروح غير بقال واحد ... رجعوا معاهم اخبار غريبة ..نجيب الهلالى استولى على الحكم ...خبر غامض لم نفهمة .....على المغرب استطعنا تدقيق الخبر من ضابط  من سلاح الحدود مار... ان  اللى استولى على الحكم لواء جيش اسمة محمد نجيب ...واتضحت الصورة ، وفهمنا ان ثورة قامت فى مصر .....تناقشنا فى الامر ....مش  ممكن تقوم الثورة واحنا قاعدين نبلبط فى المية ... واتخذنا  قرار بالاجماع بضرورة النزول.... رغم انة لم يمضى غير اسبوع واحد على الرحلة وباقى اسبوع اخر كما كان مخططا... لمينا مهماتنا وركبنا قطار الساعة 7 صباحا يوم 24 يوليو ووصلنا القاهرة مرهقين 7 مساء... الرحلة كانت بتاخد 12 ساعة.... نمت ونزلت يوم 25 يوليو اشترك فى الثورة او حتى اتفرج عليها ....لقيت القاهرة زى ماهيه لا يوجد اى تغير.... امال فين الثورة؟؟؟؟؟ الثورة قام بيها الجيش لوحده ...وتانى يوم 26 خرج الملك ...لا اشتركنا فى ثورة ولا شفناها ...ويا ريت كنا فضلنا فى مطروح وكملنا رحلتنا ..

      انا من القلائل المحظوظين اللى حضر ثورة 52 ولكن لم اشترك فيها بحكم ان الشعب لم يكن مدعوا للاشتراك او لم  بكن حتى  مسموح له بالاشتراك  ..ثوره الجيش قام بيها والشعب ايدها ...نقطة واول السطر ..  ولحظى السعيد   حضرت  ثورة 25 يناير ولم اشترك فيها بالشكل الذى كنت ارجوه .... الاولى لم اشترك فيها لانها لم تكن  ثورة شعبية .... وثورة 25 يناير  لم اشترك فيها بشكل كاف   بحكم السن ..... نزلت 3مرات مرة يوم 25  ورحت  التحرير 27 و28 يناير لكن تابعتها ساعة بساعة..
انا معرفش انظر او احلل... ورحم اللة امرء عرف قدر نفسة... انا برصد اللى بشوفة وقد اتوقع ما قد يحدث .

الجمع المليونية : الغضب.. الرحيل.. الشهداء.. النصر

    يوم الجمعة الاول فى الثورة نزلت التحرير ولم استطع البقاء فى المبدان اكثر من ساعة !!! نزلت يوم 27 لما كانت الدنيا رايقة نسبيا وكنت اركن كل شوية على رصيف.فى الميدان.... والاقى اللى بيوزعوا مياة وشاى وماكولات ....لدرجة ان  الشئ الوحيد اللى ما بيتوزعش الكبتشينو... ناس بتنضف وناس بتلم الزبالة  وكل واحد بيعمل حاجة ...لم استطع ان احبس دموعى من الانهيار وانا ارى مصر رجعت فجأه؟؟؟رجعت  من يوم 25 يناير..ناصعة عفية ..
      يوم الجمعة المليونية الاولى  ما لقتش حجر اقعد علية.... ختها من قصيرها وروحت.بعد ساعة ... وجلست امام التلفزيون وتابعت المعارك ...معركة الجمل بالنهار والملوتوف طول الليل... وجانى رسالة من التحريرفى الفجر نفبد بان الهجوم الشرس على الثورة  من البلطجية المدفوعين من النظام  يأتى من كل محاور الميدان... ولكن من رؤيتى لما يذاع او يتسرب من اخبار تأكدت  ان هذة الثورة لا يمكن التغلب عليها
شباب  يقاتلون بايد عارية  من اى سلاح ومستعدين للموت امام جحافل الامن المركزى وينتصرون عليهم  ويملكون الميدان ، ثم بلطجية النظام المسلحين والقناصة من فوق العمارات المحيطة  وصمدوا واستشهد منهم  المئات وجرح الالاف ولم يتراجعوا وصمدوا وانتصروا

             شباب بهذه الشجاعة ...لا يمكن هزيمتهم 
       فى الليل سمعت  لغط فى الشارع الذى اقيم فية.... فنزلت وجدت بعض الشباب  والرجال من العمارة التى اسكنها والعمارات المجاورة يقيمون المتاريس ويحرسون البيوت وعلمت ان هذا جرى فى كل مكان.... ازاى العالم دى نزلت فى وقت واحد ، وفى كل مكان بدون طلب من احد  ...... طيب انا نزلت ليه وانا بمشى بالتيلة ..   هل هى الثورة يلتحق بها الجميع ؟؟

        زوجتى كانت كل يوم فى التحرير... تبات يوم فى التحرير وبوم فى البيت  وكذلك ابنى اقامة كاملة .... وفى يوم اول فبراير علمت ان ابنتى التى تعيش فى الدنمارك وصلت القاهرة  ليلا  واتصلت بى من المطار
- اية اللى جابك.... نامى  فى المطار لحد الصبح
- اذا لقيت طريقة حروح التحرير
 قعدت لحد ما مبارك اتنحى ولم ارها تقريبا  الا وانا بوصلها المطار يوم الاحد 13 فبراير ..وحكت لى عن التحرير والمستشفيات الميدانية اللى انشأها الثوار ، ولانها طبيبة ، كانت مسئول المستشفى الميدانى رقم 6 بجوار المتحف

الفريق الطبى للمستسقى الميدانى رقم 6 


   سمعت عن ناس لم يكن لهم اى اهتمامات عامة ...عالم الطبقة الوسطى اللاهية نزلوا التحربروالتحقوا بالثورة

         الثورة اللى اطلق شرارتها الشباب التحق بها الشعب من اليوم الاول ..ونجحت بعد 18 يوم فى اسقاط الطاغية فقط.... ولكن نظامة ما زال مسبطرا على مؤسسة الرياسة التى تسيطر على الحرس الجمهورىوالمخابرات العامة  وعلى الحكومة التى اختارها مبارك بنفسة من الحزب الوطنى وعلى الاعلام ....فلول النظام ما زالت ممسكة  بمفاتيح السلطة ورجال الاعمال والفاسدين الذين يخافون من الملاحقة صاحيين وبيلعبوا ... والثورة ما زالت  بعيدة عن الامساك بالسلطة التى امسك ببعضها الجيش  كطرف شبة محايد !!!!!

        يقال ان مبارك تنحى  ويقيم مع اسرتة فى شرم الشيخ موطنة الدائم لمدة عشر سنوات.. ويعامل بكل الابهة السايقة واولادة وزوجتة يسافرون ويرحعون  براحتهم ...هل تنحى  مبارك وفقد سلطتة ؟؟؟

    السلطة هى التوقيع على ورقة من تصل الية ينفذ ما فبها   او امر شفهى ينفذه المأمور به ...تمت استقالات من الحزب الوطنى وعين اخرون عينهم مبارك قبل تنحية ....واهم هذة التعينات حسام بدراوى فى منصب امين عام الحزب الوطنى وامبن السياسات  ....استقال بدراوى من الحزب قبل ساعات من اعلان تنحى مبارك .....وفى اليوم التالى ، ومبارك متنحى ويقيم مع اسرتة فى شرم الشيخ ، تم تعين محمد رجب امينا عاما للحزب الوطنى !!! مين اللى عينة ؟؟؟؟؟  مبارك طبعا !!!!صاحى وبيلعب .

      الجمعة امس 18 فبراير جمعة النصر اربعة ملايين فى التحرير...وملايين اخرى فى ساحات كل المدن المصرية . رسالة قوية تقول  للنظام ولمن يأمل فى الالتفاف على الثورة   احنا بايدينا العارية ما زلنا متواجدين وسندافع عن الثورة بارواحنا ..وما زال الشارع لنا

بوعزيزى وخالد سعيد

       صادرت بلدية سيدي بوزيد فى ١٧ ديسمبر 2010 عربه كارو لمحمد بوعزيزي التونسي 26 سنة خريج جامعة ، التي يبيع عليها الخضروات والفواكه، فذهب لإدارة البلدية يشكو ويحاول استردادها ، فصفعته الشرطية فادية حمدي  على وجهه، فخرج من مبنى البلدية وأضرم النار فى جسده وتوفى بعد 18 يوما ،

   أصبح بوعزيزي رمزا فى نظر معظم خريجي الجامعات، الذين لم يجدوا فرصة عمل فى بلدهم، ما أدى لاندلاع احتجاجات شعبية صاخبة،  ولم تقتصر الحركة  على العاطلين عن العمل، بل ضمت الآلاف من خريجي الجامعات والمعارضة والمواطنين  العاديين، لتتحول إلى حركة احتجاج سياسى واسعة النطاق خرجت عن سيطرة الأمن....خرجت الاحتجاجات بشكل عفوي ليس ضد الغلاء والبطالة فقط وإنما أيضا للمطالبة بالحريات والإصلاحات السياسية، ما أجبر بن على الهروب من البلاد فى 15 يناير 2011. 

       خالد سعيد شاب مصري يبلغ من العمر ٢٨ عاما من مدينة الإسكندرية  تم تعذيبه حتى الموت على أيدي اثنين من الشرطة اللذان أرادا تفتيشه بموجب قانون الطوارئ.  سألهم عن السبب لتفتيشه أو إذن نيابة - فقتلوه.

  :

        أنشئت صفحة فيسبوك بعد وفاة خالد عنوانها كلنا خالد سعيد لإدانة وحشية الشرطة. انشأها وائل غنيم الذى ولد عام 1980 في جمهورية مصر العربية  وحصل على شهادة البكالوريوس في هندسة الحاسبات من كلية الهندسة بجامعة القاهرة عام 2004، ويعمل غنيم في مجال الإنترنت  حيث قام  بإطلاق أحد أكبر المواقع العربية زيارة حتى يومنا هذا، عمل من 2002 إلى 2005 في شركة Gawab.com لخدمات البريد الإلكتروني والتي وصل عدد مشتركيها لأكثر من خمسة ملايين مشترك بالعالم العربي، وفي الفترة من 2005 إلى 2008 قام غنيم بتكوين وإدارة الفريق الذي قام بإنشاء بوابة معلومات مباشر Mubasher.info وهي أكبر بوابة معلوماتية باللغة العربية متخصصة في مجال أسواق المال. كما عمل غنيم كمستشار في العديد من المشاريع مثل مشروع تطوير بوابة الحكومة الإلكترونية بمصر، ومشروع تطوير موقع Sindbadmall.com التجاري.

        انضم وائل غنيم إلى شركة Google في شهر نوفمبر من عام 2008 كمدير للتسويق في الشرق الأوسط وشمال أفريقيا لمنتجات Google الخاصة بالمستخدمين (كمحرك البحث، وGmail، وiGoogle، ومتصفح Chrome، وYouTube، وKnol). كما يشرف على تعريب وتطوير المنتجات التي تفيد المستخدم العربي وذلك من خلال العمل مع فريق من المهندسين الذين يجيدون التحدث باللغة العربية.

         بلغ المنضمون لصفحة كلنا خالد سعيد 539,126 عضوا...دعت صفحات الفيسبوك الى التظاهر يوم التلاتاء 25 يناير بعد عشرة ايام فقط من نجاح الثورة التونسية من ازاحة بن على.... تم اختطاف وائل غنيم من مظاهرة 27 يناير وظل 12 يوما مغمض العينين وافرج عنة يوم 6 فبرابرواصتحب  الى مكتب وزير الداخلية الذى قدم له الاعتزار واوصله امين عام الحزب الوطني المنهار الى منزلة" الادب حلو "

ز

الثورة فى اليوم الخامس عشر وترفع شعار الشعب يطلب رحيل النظام.. ويوما بعد يوم يرتفع سقف المطالب  وسيصل ليس لرحيل الرئيس فقط بل الى محاكمته ايضا فهو المسئول الاول عما اصاب البلاد طوال 30 عاما من الفساد والارهاب .... دم 500 شهيد فى رقبه الطاغية حسنى مبارك 

صور شهداء مظاهرات يوم الغضب بمصر الحبيبة

أحمد بسيوني
31 سنة
مدرس بتربية فنية – جامعة حلوان
أب لطفلين : سلمى وادم
قتل في ميدان التحرير


اسلام
تاريخ الميلاد :1/3/1989
حاصل على ليسانس اداب قسم الحضارات الاوروبيه بتقدير مقبول لعام 2010

أحمد ايهاب

استشهد فى 25يناير
حسين طه
مواليد 1992
يدرس في كلية الحقوق
استشهد في اسكندرية يوم 28 يناير (جمعة الغضب)

عمرو غريب ..
25 سنة
خريج حقوق عين شمس


كريم بنونة
29 سنة
مهندس Technical Team leader
أب لطفلين: عمر ومريم
رماه القناصة بالرصاص في رأسه يوم 3 فبراير 2011
في ميدان التحرير

المجد للشهداء ...النصر للثورة ...العار لكل من ساعد نظام مبارك 

شوفت بعينى ما جدش قاللى

صور المظاهرات     نزلت مع زوجتي بتاكسي  الساعة الواحدة والنصف  ظهر  يوم 25 يناير   للاشتراك فى تجمع جامعة الدول العربية ..وكنت قد علمت من  التويتر ان  الالاف من بولاق الد كرور استطاعت اقتحام سياج الامن ومتجهه الى  شارع جامعة الدول .. وصلنا مع وصول  المتظاهرين امام جامع محمود ..        سرعة المشي للانسان العادى4 كيلو فى الساعة وللانسان النشط والتشكيلات العسكرية  5 كيلو فى الساعة ...وتصل السرعة فى المشي  فى المباريات  الى عشرة كيلومتر.. وتسمى هرولة . الفرق بين المشي والهرولة ... والجري ، هو ان الانسان فى المشي والهرولة دايما   فى نفس الوقت احدى القدمين  ملامسة للارض.... اما  فى الحرى . .خطواته عبارة عن قفزات ...القدمين  الاثنين فى الهواء. . انا بمشى بسرعة 3 كيلومتر فى الساعة  ولا استطيع الهرولة فما بالك  بالجرى !!        ما علينا .. المتظاهرون لا يهتفون انما يهرولون ..الوف مؤلفة شباب وصبايا وربات بيوت ونسوة تحمل اطفالا وشيوخ ..عالم لم ارها من قبل  تشترك فى اي مظاهرة ...هي دي  ناس الثورة ....نزلت مع زوجتي فى  المسيرة او قل فى الهرولة ..ولان سرعتي ابطأ بكثير من المشتركين فى  المظاهرة ..فبعد قليل وجدنا  انفسنا  فى اخر صف من المظاهرة وخلفنا   بضع عشرات من جنود الامن المركزي مع  قيادتهم من رتب كبيرة ... قال لي احدهم  - شد حيلك ياوالدى خلينا نخلص !!!      وجدت نفسي  وزوجتي بعد قليل  نمشى خلف قوات الامن التي تهرول  ايضا  خلف المظاهرة  والمسافة بيننا  تتسع وتتسع....  بالصراحة  انا فيصت ونفسي انكرش....  زوجتي   اقترحت  ان اجلس قليلا وارجع الى المنزل ...واستمرت   هي فى المظاهرة.... ربنا يديها الصحة رجعت بالليل !! جلست وسألت احد من المئات الذين يهرولون للحاق بالمظاهرة .. -  هي الناس بتجرى لية ؟؟؟؟ -  رايحين للتحرير   يقصد ميدان التحرير..... لكن انا فهمتها بمعناها اللغوي ↓ ↑

↓ ↑

↓ ↑

25 ينابر 2030

- انت رايح فين يا انس مش النها ردة اجازة؟؟
- انا رايح الجامعة يا يرهم ..ماحنا بنروح الجامعة فى يوم  الاجازات.. نحتفل .. ونقابل اصحابنا
- جامعة اية دا انت جامعتك فى جنوب افريقيا .. وعمرك ما رحتها ....ومش عارف بتعمل  ايه فى الامتحان ؟؟
- مش فاهم وضح كلامك يا برهم ....يعنى اية امتحان ؟؟
-  اية برهم.. برهم .. دي دانا ابوك يا جدع...
- انا بدلعك يابو انس..روق  .... يعنى اية امتحان؟؟؟
- يعنى الطالب يقعد ويدولة اسئلة يجاوب عليها فى وقت معين...... ويا ناجح يا ساقط!!!
- ده كلام  يخش العقل يا برهم  …ده شكل من اشكال التعذيب ....انا مش مصدق ان دة كان بيحصل !!
- طيب يعرفوا اللي ذاكر من اللي ما ذاكرش منين؟؟
- وعايزين يعرفوا لية ؟؟؟؟  هما مالهم ....كل واحد عارف نفسة ..
-  يابني انتم عايشين زمن تاني .. حتروح انهى جامعة؟؟
-  جامعة تونس اللي فى الوراق
-  تعملوا اية؟؟؟
- حقابل اصحابي ....و نحتفل ب25 يناير 
- تحتفلوا ,,  كان على ايامنا العيد دة اسمه عيد الشرطة
-  يا برهم روق معايا وكلمني بالعربى ... يعنى اية الشرطة؟؟؟
- انت بتسال اسالة صعب يا انس ..الشرطة دي كانت بنى ادمين  ماسكين عصى ويدوروا الضرب فى الناس!!
- وكانوا عاملين لهم عيد ويخلوكوا تحتفلوا بيه…
- وكان اجازة رسمية كمان
-   25  يناير يا والدى ده عيد الثورة ..
- فكرتني والله … الثورة ولا فكرة الثورة...
- الاتنين واحد
- كان يوم عجب ..انا فاكره كانه حصل امبارح ... انت كنت لسه مولود... وكانت تورة تونس لسة سخنة ..ومافتش غير عشرة ايام . الناس نزلت فى احتجاج عادى... ذي كل مرة بينزلوا فيها ….العدد كان كبير حبتين والامن كان كتير كالعادة  … ظابط شايف نفسه  ...ضرب بنت من المظاهرة .. مسكت فيه ما سابتهوش الا وهو متخربش ... وبيشلب دم .. دوافرها كانت حامية شوية ….العالم اتلموا علبة وادولة علقة تمام.... والعسكر مش لاقية حد يدها اوامر... وقفت ساكتة تتفرج ...ماهو الضابط  كان رخم عليها برضه .. .الرواية انتقلت لكل حتة.... الامن انضم للشعب.... الامن انضم للشعب
- وبعدين
- الراجل ارتعش وخاف يرجع
- هو فية حد قالة ارجع ؟؟
- طبعا ما الراجل وراه ناس ياما ...مستفيدين ...ومصدرينه .... رجالته قالوا العشرة ما تهونش الا على ولاد الحرام   ...دة راجل كبارة برضة …احترموا صبغته وسيبوة يريح ....ووخدوا علاء يمسك بدالة  -  اصل الناس كانت مش طايقة الواد التانى… دمه تقيل وغتت..
-  وبعدين
- الناس ما وافقتش ...قالوا لا دة ولا دة ...مش عايزين حد خالص ....نمشيها عصير.... نمشيها من غير ريس …ومن يومها واحنا من غير ريس واهى ماشية فل الفل
- يعنى اية ريس يا برهم قصدي ياوالدى؟؟
- كان كل بلد يتحكم فيها مجموعة مصدره واحد .. يسموه ريس ...يعمل فيها اللي هو عايزة ...واللي ما يعجبوش او يعارضه يشده ....يعذبه ....يجبسه ...بقتله...  وماحدش يقدر يسأله  او يقوله تلت التلاتة كام......ياخد الفلوس اللي هو عايزها... وابن ادم طماع لايمكن يشبع ابدا ..
- وكان النظام ده فى مصر بس ولا فى كل البلاد؟؟؟
- كل بلد من بلادنا  كان ليها ريس واحيانا يسمى نفسة ملك ... وبعد البنت ما خربشت الظابط وجابته الارض ..والعسكر سابوة يتبهدل .وحصل اللي حصل  .. كل البلاد مشوها من غير ريس..
- وراحوا فين الريسا والملوك دول ؟؟
- لموهم وحطوهم فى متحف ... والناس بتروح تتفرج عليهم ....والله يا انس عايزين نبقى نروح نتفرج ..ده برضة تاريخ يابنى
-  وفاضل منهم كتير؟؟
-  يا ابنى دول ما بيمتوش ....دى عالم مش زينا ...دي عالم ماعندهاش دم ولا احساس..تموت ازاى ..
.......
- انزل يابني ما تتاخرش ...حنتعشى سوا... امك عملالك قلقاس .

جلد الذات

      فى العام 1982 بعد ان اجتاحت اسرائيل بيروت ، اول عاصمة عربية  تدخلها القوات الاسرائيلية  .. قام عدد من المثقفين بالاجتماع وقروا تنظيم وقفة تضامن امام  جامع الازهر …ولم تكن مصر فى ذلك الوقت تعرف الوقفات السياسية…. وتوجه عدد كبير منهم الى الازهر، والتف عدد بسيط من اهل الحى للفرجة.... وسألتني احد نساء الحى مستفسرة:
- اية الحكاية ؟؟
- اسرائيل اجتاحت لبنان واحتلت  بيروت !!
ويبدو ان المراة لم تفهم اجابتي او انني لم احسن الشرح
- يا حرام ....وجايين لحد هنا يشتكوا!!!

         كل من كان فى الوقفة كالعادة من النخبة ...شكلهم ولبسهم مختلف عن اهل الحى الشعبي وايضا طريقة الكلام مختلفة .. الجماهير لا تشترك فى هذه الفعاليات ..الوقفات والاحتجاجات والمظاهرات السياسية والاجتماعات والتنسيق والفيس بوك والتوتير والمدونات والتحريض والتشهير الخ  هذا كله دائما من فعل النخبة..

         بعد توقيع معاهدة السلام مع اسرائيل قامت نخبة من المثقفين.. قليلة العدد.. رافضة المعاهدة وضد اغلبية التيار السائد فى ذلك الوقت ، وكونت لجنة" الدفاع عن الثقافة القومية" واصدرت نشرة المواجهة ....فى الوقت التي كانت الجماهير تستقبل بحماس الرئيس نيكسون بهتاف "" اغرف وادينا يا نكسون اكبش وادينا يا نكسون!!""
ظلت هذه النخبة القلية العدد سنوات  تقوم بفعاليات متواضعة.. بل متواضعة جدا ...ووقفات لايزيد عدد  المشتركين فيها عن 50 انسان،  نفس الوجوه كل مرة ولا تزيد ، سال احد الاصدقاء فى وقفة سياسية لسبب ما امام جامعة الدول العربية ..لماذا لم تحضر فلانة ، وكانت الاجابة تعيش انت ....المارة مالهوش عدد ولكن  لم يشترك احد منهم  او حتى يقف للفرجة!!

        تجاوبا مع الانتفاضة الفلسطينية كونت النخبة لجنة الدفاع عن الانتفاضة والتف حولها  اعداد كبيرة من الانصار....وقامت بنشاط ملحوظ فى كافة المحافظات .. ونظمت اول مظاهرة كبيرة فى ميدان التحرير فى 10سبتمبر اعد لها جيدا  اشترك فيها  اكثر من3000 انسان ...كلهم من النخبة..جاءوا من كل المحافظات .....ولم تشترك الجماهيرالعادية ..يمكن بعضهم وقف يتفرج ..

      فى يوليو 2004 صاغ 300 مثقف من النخبة بيان حركة كفاية التي وصل نشاطها الى 22 محافظة ، وادت الى ظهور حركات اخرى نوعية وفئوية.. شباب من اجل التغير.. عمال من اجل التغير ..صحفيون من اجل التغير الخ... باضافة الى حركة 6 ابريل وشباب الغد.وغيرهم .. كلهم نخب ولا توجد جماهير.. ..وايضا حركة 9مارس المكونة من نخبة من اساتذة الجامعات..وليس كل اساتذة الجامعة تحسب على النخبة !! ولا يخفى حجم  النشاط الكبير لهذه النخب التي حركت المياه الراكدة

       فى العام 2005 ومع حركة القضاة نصبت خيمة اعتصم فيها عدد من المثقفين تضامنا من القضاة..و لمدة طويلة حتى تم القبض عليهم واودعوا السجن... لم يشترك فى التضامن اي من الجماهير... كل المشتركين كانوا من النخبة وكل المسجونين ايضا كانوا من النخبة الا من اخذ بالخطأ..

       اعتدت الشرطة وقتلت الشهيد خالد سعيد ولولا تبنى النخبة لقضيته على الفيس بوك والتوتير...وتنظيم الوقفات الرائعة بالملابس السوداء والشموع التي ضمت اعداد كبيرة كلها من النخبة المهتمة والنشطة .....وليست من الجماهيرالعادية ... لراح دم الفتى  هدرا  كمئات مثله  قتلوا تحت التعذيب ..

        والامثلة كثيرة ومشرفة على ما فعلته النخب فى السنوات الاخيرة من نشاط وفعالية مما ادى الى  رفع الوعي السياسي لعدد من الجماهير    ، وضم اعداد غفيرة  للاهتمام بالشان العام ...وتحويلهم الى نخب نشطة فى احياءهم واماكن العمل....تحملوا السجن والتعذيب والاهانة وفقد اعمالهم ومصدر اكل عبشهم .
       نكون واهمين لو تصورنا ان النخبة يمكن ان  تصنع ثورة...ونكون واهمين ايضا لو تصورنا ان عفوية الجماهير ممكن ان تحدث ثورة ناجحة .... النخبة هي مجرد طليعة واجبها توعية الجماهير وتنظيمها اذا امكن …الجماهير لا تشترك او تتحرك الا فى الثورة او الفوضى..... الناس العادية سواقين التكاتك وبائعي الخضار والموظفين الغلابة  والعالم اللي ماشية فى الشوارع والسيدات ...وغيرهم  هي التي تصنع الثورة او الفوضى ...ممكن الجماهير تشجع الكورة وتحتفل بنصر او تكسر الدنيا  فى هزيمة ... او تتجمع لحرق كنيسة... او تعتصم فى جامع باعداد كبيرة من اجل عودة  كاميلنا.... او تساعد الشرطة فى قذف الاقباط بالحجارة .. لكنها لا تشترك فى مظاهرة او وقفة احتجاجيه سياسية ..ولكن نفس هذة الجماهير هي من يصنع الثورة ...ولا يمكن لاي ثورة ان تقوم من خارجها ، كما حدث فى تونس ....اذا كانت ثورة تونس بدأت عفوية ...ولكن استمرارها 28   يوما كان بفضل ان وراءها  نقابات الشغل  القوية  التي كانت تضبف شعارات ومطالب حديدة يوميا  حتى حاصرت النظام فى الزاوية ولم يجد امامه الا التضحية بزين العابدين ..

       انا بكتب الكلام ده الى الاصدقاء اللي هما اصلا نخبة.... ونخبة نشطة ومخلصة ، بس مستعجلين شوية ...ومحبطين من حالنا بعد ثورة تونس ....وبدأوا فى جلد الذات او جلد النخبة.... بكتب الكلام دة الى من يتصور ان عفوية الجماهير بدون قيادة  ممكن ان تحدث ثورة ناجحة ..  بكتب الكلام دة الى عباد عفوية الجماهير التي تخبو دائما بعد اشتعال النيران.. الامر التي تتقنه الانظمة.لاجهاض اي تحرك ..