Loading...

الجمعة، 1 يوليو، 2016

التعليم فى الدنمارك


الثانوية العامة فى الدنمارك ليست مرحلة تعليمية فقط ولكنها نقطة فاصلة  اسرية ايضا !! 
فى الدنمارك التعليم مجانى فى كل مراحلة والعلاج ايضا مجانى  بالكامل .والحكومة تبدا فى الدعم المالى للشاب والشابة متى بلغوا من العمر ١٨ سنه ، وحسب الحالة الاجتماعية لكل فرد يعنى اللى عايش مع اهلة غير اللى عايش لوحده ، او اللى بيدفع ايجار السكن معقول غير اللى بيدفع كتير  واللى. امه وابوه مع بعض غير اللى امه وابوه منفصلين الخ ، بمبلغ يتراوح بين ٢٠٠٠ و٥٠٠٠ كرونا  شهريا طوال فترة التعليم  .. 
سنوات التعليم الالزامى  الذى يمر به كل انسان موجود فى الدنمارك ١٠ سنوات والدنمارك لا تعرف لهفة الامتحانات ولا تعرف طبعا الدروس الخصوصية فالكل يسير داخل قطار التعليم بدون ضجيج  ١٠٪ فقط من الدارسين فى المرحلة الاولى الالزامية يذهبون الى الجامعة ، طيب ليه لا يهتم الدارسين الدنماركيين بالتعليم العالى ، لان اجور اصحاب المهن الفنية قد تكون اعلى من اجور الحاصليين على المؤهلات الاكاديمية ، بالاضافة ان الاجور متقاربة كما ان الشهادة الجامعية لا تضيف للانسان برستيج اجتماعى الا اذا كان طبعا استاذ جامعة او حاصل على جائزة نوبل ، فقد تجد طبيبة متزوجة فنى معمل مثلا، اعانة البطاله تصل الى ١٠ الاف كرونه شهريا يحصل عليها استاذ الجامعة المتعطل او من يقوم بالنظافة المتعطل .

      بعدمرور مرحله التعليم الاساسى " الالزامى "  تبدأ مرحلة التعليم المرتبط بتعلم طريقة البحث عن المعرفة ، وهذا هو اسلوب وغرض العملية التعليمية فى الدنمارك . منذ السنوات الاولى يقسم الدارسين الى مجموعات لكى تبدا عمليات البحث وتقوم كل مجموعة بتقديم نتائج عملها لمدرس المادة ويجرى التقيم والمناقشة ، ومن هنا ينبغى على كل مجموعة تقسيم العمل داخلها وبالتالى الكل يعمل والمجموعة كلها مسئوله عن تماسك وانسجام البحث وتوثيقه بالمراجع 
الهدف الاساسى للتعليم فى الدنمارك هو كيف تصل للمعلومة وبشكل جماعى ومن هنا يكون مجرد الحضور والاشتراك مع الزملاء فى البحث هو النجاح ، فتقريبا لا توجد امتحانات فى المراحل الاولى من التعليم واول امتحان ياتى فى نهاية العشر سنوات الاولى من التعليم ، يمكن اعتبارها المرحلة الاعدادية التى يتوزع بعدها الدارسين الى التعليم الثانوى او الفنى او التجارى ، التعليم الثانوى لاعداد الدارس ليكون طالب علم اما التعليم الفنى فمجالاته متعددة ، الانشاء والبناء ،الفندقة ،الصحة ،علوم الكومبيوتر ، البيئة الخ تؤهله لدخول مجال العمل ، لا يوجد عمل بدون دراسة تاهيلية . وفى امكان من اتجهه الى التعليم الفنى او التجارى الالتحاق بالجامعة فالاتحاق بالجامعة يمكن فى اى عمر .
      من هنا نرى ان الهدف  الرئيسى من التعليم فى الدنمارك على المستوي العام هو أن يكتسب كل شخص عددا من القدرات الفردية وأيضا أن يكون مستعدّا للمشاركة في المجتمع وأن تكون لديه معرفة حول قيمه الأساسية. وبما أن المجتمع يخضع لتغيرات تقنية وثقافية سريعة لذلك فهو يدافع بشكل أساسي عن قيم مثل حرية الكلام،  وترقية خاصيات مثل روح المبادرة، الشجاعة، الحماس والرغبة في تعلم شيء جديد. وتمكين الفرد سواء أكان ذكر أم أنثى من تطوير إمكاناته وتقديم مساهماته في المجتمع وبهذه الطريقة تدعم التربية الجماعية والهوية  وتبادل الأحاديث والتعاون ، إذ يتعلم الأطفال منذ الصف الأول العمل معاً في مجموعات وحل التمارين بالتعاون فيما بينهم. 

لا يتم الفصل خلال الأعوام الدراسية بل يظل التلاميذ متلازمين وفي نفس الفصل . 

خلال السياق المدرسيِّ كله.بجانب  العديد من العلوم والمعارف الأساسية كالرياضيات واللغة وفهم ومعرفة المجتمع والعلوم الطبيعية. والالمام بالثقافة الدنمركية ومعرفة وإدراك بالثقافات الأخرى. والاكثر اهمية  تطوُّر التلاميذ الشخصي وتحفِّز الخيال الذي يمتلكونه وتقوِّي رغبتهم في التعلُّم. والتعبير عن وجهات نظرهم الخاصة. فتُتاح لهم الفرصة لتشكيل لجنة للتلاميذ، والتي يتم الاستماع إليها حينما تتخذ قرارات مهمة في المدرسة. ويتمُّ تقييم جهود التلميذ المبذولة في السنوات الدراسية الأولى شفهياً بالتشاور ما بين المعلِّمين والأبويْن. فالعلامات والاختبارات والامتحانات الفعلية لا تواجه التلميذ في الفترة ما قبل الصف الثامن.من اهم الدروس التى يحصل عليها التلميذ فى المرحلة الاعدادية هو تعلم السباحة ولا يمكن عبور هذه المرحلة دون النجاح فى هذه المادة واختبارها ان تعبر طول حوض السباحة والتلميذ يسبح بملابسه كامله ويتعلم كيف ينقذ غريقا .

      التعليم الالزامي ١٠سنوات سنة تمهيدى يعقبها ٩ سنوات والفنى والتجارى بين سنتين وثلاثة والثانوى ٣ سنوات ، التعليم الثانوى هدفة اعداد الدارس ليكون طالب علم . ليس بالضرورة بعد سنوات فى مرحلة التعليم الالزامي ويكون الدارس بلغ من العمر ١٥ سنة ان يلتحق فورا باى مرحلة تالية يمكنه يريح سنه يشتغل او يلتحق باحد مدارس الهوايات ، موسيقى ، رسم ، رياضة وهى فى الغالب مدارس داخلية وبعدهذه السنه يقرر اتجاهه

.   الامتحانات فى الدنمارك تشمل فى الغالب امتحانا شفويا فالامنتحانات الشفوية لها اهتمام خاص كبير وتتم   بان يسحب التلميذ مثلا موضوعا" قرعة " ، فى التاريخ مثلا " ، الثورة الفرنسية ، دولة الرفاهة ، الحرب الباردة ، الثورة الثقافية  ، غاندى  الخ ويستلم معه عدد من الصفحات/المصادر المكتوبه وبضعة صور ويذهب الى منزله وبعد ٢٤ ساعة يحضر امام لجنة الامتحان ، مدرس الفصل وممتحن خارجى ، يضع من الصفحات التى قراءها سؤالا ويجيب عليه ويناقش فى نصف ساعة اى يلقى محاضرة تلخص الموضوع  والاجابه على السؤال الذى وضعه ويجرى الحوار حول الموضوع لاختبار قدرات الطالب التحليلية ومعلوماته .

      فى السطر الاول من هذا البوست قلت ان الثانوية العامة ليست مرحلة تعلمية فقط ولكنها نقطة فاصلة اسريه ايضا !!! 

فى الدنمارك تشعر الاسرة بالقلق اذا وصل الابن او البنت الى سن العشرين ولم يترك منزل الاسرة ويستقل بحياته ، فهو يعمل بضع ساعات اسبوعيا منذ وصل ال١٥ والحد الادنى للاجر فى هذا العمر ٧٠ كرونا فى الساعة وبعد سن ١٨ الحد الادنى لاجر الساعة ١١٠ كرونا ، فبجانب الدعم المالى الحكومى وبيمكنه جمع ٥٠٠٠ كرونه شهريا تمكنه من الاستقلال والاعتماد على نفسه او نفسها .
من التقاليد المتبعة فى الدنمارك ان بعد الحصول على الثانوية العامة الا يلتحق الطالب بالجامعة بل ياخذ سنه كاملة ، عام دراسى كامل يفكر حيعمل ايه فى مستقبله  ، حيخش الجامعة ام يكتفى بهذا القدر موقتا ويدخل مجال العمل ، فالتعليم متاح فى اى وقت وفى اى عمر . 

فف




السبت، 30 يناير، 2016

فجأة مات الاىباد



- الاى باد مات 
- حادثة ؟ وقع اتكسر 
- لا جيت افتحة ما قالش 
- حجيلك بعد ساعة 
دا الحوار اللى دار بينى وبين وائل عصر يوم ٢٥ يناير
جه وائل لقى الاى باد على السرير .... حط ايده عليه وجسه وبعدين طلع الموبايل بتاعه وكتب حاجة ....الاى باد النايم على السرير الجرس بتاعة رن !!
- على فكرة هو لسه ما ماتش فيه لسه نفس . سخن وبيجاوب !!!
- يعنى ايه ؟؟
- حخده معايا 
خده ونزل 

الساعة عشرة بالليل ولانى احترم الموت وارى ان من الواجب ان يعلن الخبر بعد الوفاة مباشره ، فقد اعلنت فى الفيس بوك وتويتر عن وفاة الاىباد ومن تم سابتعد بعد الوقت ، حيث ان استعمال اللاب توب غير مريح ، وجائتى رسائل العزاء من بعض الاصدقاء ، زعلت عليه ونمت .

استيفن جوبز

ولد ايتيفن بول جوبز فى سان فرانسيسكو  في ٢٤ فبراير ١٩٥٥ لأبوين غير متزوجين وعرضه والداه وهما عبد الفتاح الجندلي السورى الاصل وجوان شيبل الامريكية للتبني وماسبهوش امام جامع  ، فتبنياه زوجان من كليفورنيا  هما بول وكلارا جوبز .
نشأ ستيف في منزل العائلة التي تبنته والتحق بالمدرسة وكان يدرس في الشتاء ويذهب للعمل في الأجازة الصيفية، وشغف بالإلكترونيات منذ صغره .  تخرج جوبز في مدرسته الثانوية والتحق بالجامعة ولكنه لم يحقق النجاح فرسب في عامه الأول وقرر ترك الدراسة بعد فصل دراسي واحد . ولم يقف جوبز ساكناً بعد تركه للدراسة بل سعى لتنمية مهاراته في مجال التكنولوجيا والإلكترونيات، فقدم ورقة بأفكاره في مجال الإلكترونيات لشركة اتارى الأولى في صناعة ألعاب الفيديو وتمكن من الحصول على وظيفة بها كمصمم ألعاب، وكان يهدف من هذا لتوفير المال اللازم للسفر إلى الهند .



       سافر إلى الهند ثم عاد من رحلته برأس حليق يرتدي جلباباً هندياً حيث اعتنق البوزيه ، وظل نباتياً طوال حياته . وبعد عودته  إلى الولايات المتحدة عمل في جراج بيته وقام بتأسيس شركة أبل بالتعاون مع صديقه ستيف فوزنياك وابتكرا الكمبيوتر الشخصي المحمول، وبفضل ذلك تحولت تلك الشركة الصغيرة فى العام 2011 إلى إمبراطورية تبلغ قيمة أصولها  346 مليار دولار !!

      طرح جوبز الآي باد ابل فى الولايات المتحدة في ٣ أبريل ٢٠١٠  وتم طرحه عالمياً فى ٢٨ مايو وحسب المصدر الرسمي لشركة آبل فإنه تم بيع ٣٠٠ الف  جهاز  في اليوم الأول من طرحه في الولايات المتحدة (٣ أبريل) وصلت مبيعاته حتى تاريخ ٨ ابريل  إلى ٤٥٠ الف جهاز  وأكمل المليون وحدة مباعة بحلول الأول من مايو ، وبعد ٦٠ يوماً من الطرح أعلنت أبل بأنها باعت مليوني وحدة من جهاز آي باد وفي ٢٢يونيو أعلنت آبل أنها باعت ٣ ملايين جهازاً فى العالم !!!

      في ٥ اكتوبر ٢٠١١ أصدرت أسرة استيفن جوبز بيانا  تقول: اليوم، ستيف جوبز مات بسلام. قالت شركة أبل في بيان مقتضب أن مؤسسها المشارك ورئيسها التنفيذي السابق ستيف جوبز، قد فارق الحياة عن عمر يناهز ٥٧ عام. وكان ستيف قد استقال منذ شهر تقريباً من منصبة كرئيس تنفيذي لأبل، وقال وقتها انه وفى بوعده في الابتعاد عندما يشعر انه غير قادر على العطاء

الاىباد ابل بيع منه للان اكثر من ٣٠٠ مليون جهاز فى كل انحاء العالم مات مصنعه او مبدعه بعد ١٨ شهر من نزوله للسوق ، هل يمكن اعتبار الاى باد صدقة جاريه على روح سيف جوبز ؟؟؟ 

اذا كان صانع الجهاز ومبدعه  قد مات بعد ١٨ شهر من طرحة فى الاسواق يبقى عيب ازعل على الجهاز بتاعى اما يموت بعد اربع سنين شغل وكان لى خير رفيق لا بيتعب ولا بيكل .

فى زيارتى السنوية لعزة فى الدنمارك كنت استعمل الكمبيوتر التقليدى وفى العام ٢٠١١وجدتها تستعمل الاى باد وكان اول مره اشوفة وطوال الزيارة بطلت انفرد بنفسى فى حجرة الكمبيوتر وقاعد فى وسطهم بالاى باد بتاع عزة .


بعد ما اعلنت انتقال الاى باد الى جوار مبدعه الذى سبقة الى الموت باربع سنوات ابلغنى وائل ان الجهاز ما ماتش وانه فى الانعاش وسيبقى عنده تحت الملاحظة  لمدة ٢٤ ساعة 

- عملت فيه ايه 

- ابدا عملتله تنفس صناعى

-ازاى 

- كده

https://www.youtube.com/watch?v=WKevRNwTJPY 

فصحى وبقى زى الفل 

السبت، 3 أكتوبر، 2015

بيضة تلاتة !!!!



   . 
             الزمن بيجرى ، ناديه حفيدتى تمت اليوم ٣ اكتوبر  ١٩ سنه ، اذكر عندما كان عمرها ٣ سنوات وكانت عزة بتشتغل فى لندن واكمل بيشتغل فى الدنمارك وبيجى كل ويك اند انى نزلت ضيفا على عزة ، وكلفت بمهمة توصيل نادية كل يوم  الساعة الواحدة ظهرا الى الحضانة . عزة بتودى مريم المدرسة وتروح شغلها واقعد انا ونادية لوحدنا ، كل واحد فى حاله لحد معاد الحضانة  اوديها وبعدين اصيع فى لندن على كيفى ، وارجع اخد مريم من المدرسه ونادية من الحضانه ونروح  .
      ناديه من وهى طفله بتتعامل بلغتين العربى فى البيت والانجليزى فى الحضانه ، اتعلمت دنماركى بعد كده ، شخصيتها قويه والكل يعملها حساب ، لا تبكى ولكن تصر على ما تريد ، وصراحة انا كنت بخاف منها ومش عايز اخش معاها فى خلاف مالهاش لازمة ونتيجته معروفة !!  اللى عايزه تلبسه تلبسه دون تدخل منى ، مناسب ولا مش مناسب انا مكبر دماغى ، الساعة ١١ اعملها الاكل واسيبها تلبس اللى هى عايزاه ، كنت كل يوم اسلق لها بيضة ، فى يوم فاجئتنى وقالت 

- pappa ....بيضة اتنين 
- يعنى ايه ؟ بيضة واحد كفايه 
- pappa .....بيضة اتنين 
بيضه واحد جنب بيضة اتنين ما يضرش ..... سلقت بيضة اتنين 
بعد كام يوم لاقيتها بتقولى 
- pappa .....بيضة تلاته 
- لا كده ما ينفعش !!  
بصتلى باصرار 
-  يا pappa.... بيضة تلاته 
كلمت عزة فى التليفون نادية بتقول بيضة تلاتة ....قالتلى ما تسالش فيها 
رجعت لناديه 
- عزة بتقول ما ينفعش بيضة تلاته 
باصرار اكثر 
- يا pappa بقولك بيضة تلاتة !!! 
وتضغط على تلاته 
قلت انا مش حرج دماغى ... بيضة تلاتة بيضة تلاتة .... وسلقت بيضة تلاته 
ناديه كلت بيضة اتنين 
وقالتلى 
- pappa انا شبعت ... كل انت بيضة تلاته  !!!!

       ناديه من وهى طفله منظمة جدا ومرتبه ، في الاول كانت مبتعرفش تقعد طول الحصة عل بعضها . لازم تقوم تقف او تعمل اى حاجة تانية ، بعد سنة في المدرسه اتعلمت تقعد شويه .... وفى المدرسه مشهور عنها اهتمامها بالاخرين  ، لما يقسموهم مجاميع صغيره كتير كانوا بيبقوا عاوزين يبقوا معاها لانها بتهتم بيهم وان كل المجموعه تفهم ، وكانت بتعرف ميزات اللي معاها وبالتالي كانت من غير ماتقصد بتساعد المدرسين والمدرسين كانوا بيقدروها .......اهتمت بالموسيقى وبعزف الترومبيت والبيانو.


       فى الدنمارك مافيش اى امتحانات تقريبا الا فى الثانوية العامة ، بعد مرحله الدراسة الابتدائية ينتقلوا الى المدرسه الثانوية. وهناك بعض المدارس الثانوية المتخصصة فى الهوايات ، مدارس داخليه تقبل صغار السن من ١٤ الي ١٨ سنه ياخدوا سنه اواتنين من التعليم العادى  بالاضافة الى التركيز في هوايه من الهوايات بأنواعها ، علوم ، بيئه ، الحياه في الطبيعة . الرسم الرقص الموسيقي الرياضة وخلافه ، ناديه دخلت مدرسه تركز على الموسيقى والرياضة  .

       المدرسه داخليه تسع ١٢٠ طالب وطالبة بيعيشوا ياكلوا ويناموا فيها ، بيساعدوا في المطبخ بالتبادل وبينضفوا المكان كله بنفسهم تحت إشراف مسئوله النظافة ، يعنى هما اللى بيخدموا نفسهم تحت اشراف مسئولين ، طبعا بيرجعوا لبيوتهم اكثر استقلالا عن الأهل واكثر قدره علي تحمل المسئوليه ، الممنوع الوحيد فى المدرسه  التدخين والكحوليات . ناديه دخلت المدرسة الداخلية دى وعندها ١٥ سنه  ، وقضت سنه دراسية كامله اتقنت فيها العزف على الترمبيت ، ولانها بارعة الى حد ما فى العزف على البيانو كانت بتعلم ابناء وبنات مديرة المدرسه العزف عليه وتاخد اجرة طبعا عن كل حصة ٥٠ كرونه يعنى اكثر من ٥٠ جنيه بشويه. المدرسة فيها عدة صالات مجهزة بكل الالات  الموسيقية ، المدرسة ما فيهاش مسرح ولكن فيها قاعة العاب رياضيه متسعة يقوم الطلبه بتجهيزها قبل كل حفلة  ب ٢٠٠ كرسى تقريبا وخشبة مسرح  .  يقيم الطلاب والطالبات  اكثر من حفلة اخرها حفلة التخرج يحضرها الاهل ، حضرتها ....وكانت مبهرة كاى حفله يقدمها محترفون متمكنون . الطالبات والطلبه هما اللى بيقوموا بكل الاعمال من تاليف العرض الغنائى والتاليف الموسيقى الى الاخراج والاضاءه والصوت وتجهيز المسرح ، يشيلوا الحفل كله لوحدهم معهومش الا مشرف او مشرفة وظيفتها مجرد التنسيق .  بيقعدوا يشتغلوا للحفلة ١٥ ، ٢٠ يوم بحماس كل واحد بيحاول يقدم مهمته كاحسن ما يكون .

تجهيز قاعة المسرح 
 
         ناديه بتلعب الان  ترمبيت في فرقتين اتكونوا من ايام المدرسه الداخلي واحده اسمها بانينكا ، والتانيه سيبوا سارينا. ورغم ان اعضاء الفرقتين من مدارس مختلفه بس لقوا بعض . فرقة "سيبوا سارينا"فتحولها حساب في البنك بيحطوا فيه الفلوس اللي بيتيجي لما يعملوا حفلات وسجلوا نفسهم في حاجه شبه اتحادالموسيقيين . بيأجروا مكان يدربوا فيه مره في الأسبوع .وسجلوا اول شريط غنائي . وبتجيلهم دعوات للعزف  فى اماكن مختلفة ومهرجانات .
  
   
        
           ناديه الجميلة السنه دى فى الثانوية العامة وهى فى مدرسة فيها ٨٠٠ طالب وطالبة و١٠٠ مدرس ومدرسة !!!!اشتركت السنه الماضيه. فى عرض عملته المدرسه عن مسرحيه لبيكت فى انتظار جودو ، عملوا رؤية موسيقية غنائية راقصة للمسرحيه عملو كل حاجة بنفسهم ، قامت نادية بالاشتراك فى التاليف الموسيقى وقادت الاوركسترا.


بوستر المسرحية 

      ولكن ما يشغلها الان موضوع اللاجئين ، تذهب الى معسكرهم  الذى يبعد عن ارهس ٥٠ كيلو  كل ويك اند ، تطوعت للمساعدة والأطفال بينبسطوا لوجود زيارات زي دي . بتقعد كام ساعه تتكلم او تلعب معاهم وانبسطوا باللهجة المصرية  بتاعها وساعات تاخد الجيتار. الأطفال سموا زيارتها "الحفله" وهي ماشيه بيسألوها حتيجي الحفله الجايه ؟ المرة الاخيرة  عملتلهم كيكه .
        صعبان عليها الولاد السوريين اللي في سنها فقررت تقول للأولاد الدنماركيين اللى تعرفهم وممكن يتحمسوا انهم يطوعوا ويروحواالمعسكر لان الاولاد السوريين شاعرين بغربة ووحدة ،   بتقول الاطفال اكيد مش مستوعبين اللى حصل  بس الشباب حياتهم متوقفة تماماً وغالبا مدركين وضعهم اكتر ، المرة الاخيرة  رجعت متأثرة جدا لان الولاد اللي قدها  مفيش حاجة يعملوها وحياتهم حزينة ، الأطفال علي الأقل عندهم مدرسه بس الشباب في حالة انتظار ممل !!

الأربعاء، 9 سبتمبر، 2015

مستشفى مايو كلينك العلمين

         
   
معقوله دى، فى ١٢ ساعة عربية اسعاف اخر شياكة ومن مركز طبى لمستشفى و٨ رسم قلب و٧ تحليل انزيمات و١٦ واحد بيخدموا عليك وكل واحد عارف بيعمل ايه ......  نحكى الحكايه من البدايه! 

         من اسبوع اصابنى وجع خفيف فى فم المعدة ، دقيقة ويروح قلت من اكل الشطة بلاها ، بطلت الشطة ،  امبارح ٨ سبتمر بعد الغذاء وكان خفيف جدا استلمنى وجع من الساعة ٥ بس مستمر ، عزة بنتى طبيبة وبتحضر مؤتمر فى امريكا دخلت حكتلها 
- بابا اطلب الاسعاف فورا وروح اعمل رسم قلب فى المركز الطبى فى مارينا 
- افضل اروح بكره بالنهار
- طيب بس ضرورى تروح بكره 
الساعه ١٠ مساء طلبت بنفسى من الوجع سويش شركة الادارة 
- عايز عربية الاسعاف واديته العنوان 
خمس دقائق مش سته عربيه الاسعاف قدام البيت
قولت العبها صح هاتو الترولى وربطونى فوق الترولى وفى سيارة الاسعاف المجهزة المكيفة وعلى المركز الطبى ودخلنا من باب الطوارئ ، لقيت اتنين دكاترة شباب وثلاث اربع ممرضات وعلى الترولى عملوا رسم القلب.
طبعا انا رايح بالشورت والتي شيرت اللى كنت نايم بيهم ومش حالق دقنى وشكلى عفش للغاية 
- استاذ احمد لابد تروح فورا مستشفى العلمين، التجهيزات هناك افضل وهنا مش حنقدر نعمل حاجة غير رسم القلب ، ورسم القلب طلع  مش حلو! 
بنفس سيارة الاسعاف وعلى مستشفى العلمين التى تبعد حوالى ٢٠ كيلو ودخلنا بالترولى لقيت يجى ١٦ انسان اللى بيشيل فيا واللى بياخد  عينة دم واللى بيركب اجهزة رسم القلب
- يا جدعان انتم مكبرين العملية جدا الموضوع ما يستاهلش 
اجاب كبيرهم 
- احنا حنحطك تحت الملاحظة فى العنايه المركزة لمدة ٢٤ ساعة
السواق والممرض اللى خدونى من البيت قالوا احنا ماشين وبقيت انا بالتيشرت والشورت اللى مش مكوى والشبشب على بعد ٢٠ كيلو من بيتى
- استاذ احمد معاك بطاقة 
- يا جدعان انا ماعيش حاجة ابدا!! 
على حجرة العنايه المركزة او بالاصح على ملعب العناية المركزة ، مساحتها كما ملعب كرة سله وبها عشر بارتيشن كل واحد ٣ فى ٣ متر ، وكل بارتيش به سرير حديث جدا وكل الاجهزة التى تخطر على البال 
قلعونى هدومى ولبسونى هدوم ورق قلتهم اوعى ترموهم رغم هما فعلا يستحقوا الرمى .
وابتدى اللعب اللى على اصله،  اربع ممرضات وشاب يبدو انه الريس عليهم ، اللى بتاخد عينه دم واللى بتحط كالونه
-  نحط لك قسطرة
،-يا جدعان انا بتحرك ، لسه امبارح كنت بعوم فى البحر 
- ما ينفعش يبقى لازم تروح التواليت على الكرسى

الملاحظ ان الممرضات فى منتهى الشياكة ملابس مكويه ، كحلى،  ولبنى،  وابيض ، ورمادى ،وكلهم معاهم موبيلات حديثة جدا وكلهم مبتسمين  
- يا شباب انا سايب مراتى لوحدها وتليفوني قاطع شحن 
- النمرة كام واحنا نطمنها 
- حط الحبايه دى تحت لسانك 
- اندغ الحبوب دى 
واسئله ويسجلوا ،. اسئله فى كل الاتجاهات بتشرب سجاير ، كحوليات ، عندك ضغط ومن امتى ، عملت عمليات قبل كده ، كان ناقص يسالونى امك اسمها ايه 

خلص الكلام دا فى ساعتين وابتدى الوجع يروح وابتدوا الممرضات يختفوا وبقى المشرف على العشر برتيشنات الفارغة  وانا المريض الوحيد فى غرفة العناية المركزة 
- الدور ماشى ازاى، انتم مين ومنين؟ 
رد الشاب  
- احنا اكفأ العاملين فى وزارة الصحة ننتدب للعمل فى مستشفى العلمين لمدة اربع شهور الصيف !!

حاولت انام ما عرفتش فكل شويه ناخد عينة دم ونعمل رسم قلب ، فى التاسعة جاء الطبيبين اللى قابلونى اول ما جيت 
- ايه الاخبار 
- بالصراحة الوجع راح من بالليل تماما،  ولكن هناك وجع تانى حل ، انا ميت من الجوع 
ابتسما 
- فى الغالب انت حتخرج النهاردة ، رسم القلب بقى كويس الى حد ما واحنا منتظرين نتيجة تحليل انزيمات القلب 
ابتدت النبطشيه تتغير وممرضات جداد يظهروا وعليهم ريس كما الان  ديلون 

جاء الطبيبان ومعهم كيس انا اتخضيت 
- دا اللى لقناه فى البوفية 
كروسان وباتيه وساندوتش شيك مش عارف فيه ايه وعلبه عصير بيور ولوح شكولاته كاتبورى وزجاجة مياة  !! بالصراحة انا ازبهليت ، واحد رايح المستشفى بتى شرت وشورت مش مكوى وشبشب وماعهوش بطاقة والموبايل بتاعة قاطع شحن ، غريبه يتعمل معاه كل دا 
فى الثانية عشر جاء قرار الافراج وابتدوا يقلعوني  القميص الورق والبس الهدوم اللى جيت بيهم  ومع السلامة يااستاذ احمد هات الدوا اللى كتبنهولك ويبدو ان اللى بيكلمنى مدير المستشفى . 

المهم بعد الهلولة دى تسالونى دفعت كام ؟؟
ولا مليم احمر فهكذا خدمة الطوارئ فى البلاد المتحضرة ، وطلعت مارينا العلمين من ارقى البلاد المتحضرة !!

الجمعة، 29 مايو، 2015

الذكر والانثى


       هو يلعب دور الذكر، وتلعب هي دور الأنثى، وهو يلعب دور الذكر لأنها تلعب دور الأنثى. وهي تلعب دور الأنثى لأنه يلعب دور الذكر !!

    عاش الانسان مليون سنه على الصيد وجمع الثمار قبل ان يكتشفذ عملية الاستنبات المعقدة " الزراعة" منذ نحو عشرة آلاف سنة . كان الناس جميعا صيادين وجامعي ثمار. الرجال لانهم الاقوى  والاسرع عدوا يقومون بمعظم عمليات الصيد. وكانت النساء يجمعن الحبوب والبذور والجوز والفواكه والجذور والبيض واليرقات والحيوانات الصغيرة . فعمل النساء كان مطردا ومنتظما، وكان هذا العمل يزود الجماعة بالقوت الضروري ويجنبها الجوع حتى ولو عاد الرجال من الصيد بأيد خاوية .
    
        المجتمع الذي لا يملك القدرة على توفير طعامه أو تنقصه المعرفة بسبل الاحتفاظ بالطعام  يضمحل ، فكان الانتظام اليومي لعمل النساء أكثر من حاجته إلى الترف العرضي الذي تمثله المؤن التي قد يأتي بها الرجال من الصيد فكانت النساء هى الموفرة للبقاء وبالتالى كانت القوامة صاحبة الكلمة العليا .
     ولم تقتصر مهمة النساء بطبيعة الحال، على ضمان استمرار الحياة عن طريق جمع الطعام بشكل منتظم وكاف يضمن البقاء، وإنما كن أيضا يخرجن الحياة من أحشائهن. ولابد أن سحر الولادة قد مس شغاف البدائين . فكانت المراة هى المعبود واهبه الحياة .  وكانت  الآلهة في أقدم المجتمعات البشرية لم تكن أربابا بل كانت ربات. .

     طوال مليون سنه كانت المراة هى المتوجة فى المجتمع هى التى تضمن وتوفر الطعام المنتظم وهى واهبه الحياة ، وهى التى تختار الرجل الافضل لها  الذى تريد ان تلد منه ، وهى التى اكتشفت الزراعة . 

       تخلف دور المراة فى العشرة الاف سنه الاخيرة فقط ، بعد اكتشاف الزراعة وتدجين الحيوانات . وظهور مفهوم الملكية الفرديه ، فتقدم الرجل القادر على حمايه ممتلكات العشيرة ثم القبيلة !! 

طوال مليون سنه عاش الانسان يعمل ساعات قليلة كل يوم ، الرجال فى الصيد والنساء فى جمع الثمار ، وباقى الوقت فى الرقص والغناء ، عاش الانسان مليون سنه فى سعادة قبل سيادة مفهوم الملكية الفرديه !!!
    
       عالمة الأنثروبولوجيا الأمريكية مرجريت ميد حين أخذت على عاتقها بحث هذا الموضوع في الثلاثينات، لم تحاول أن تبحث عما إذا كان هناك اختلاف في المزاج بين الرجال والنساء ؛ وإنما تصدت للبحث في كنه هذه الاختلافات. فحطت عصا الترحال في غينيا الجديدة وعاشرت جماعات بدائية اختارتها كيفما اتفق.

        كان أول مجتمع حلت به يطلق على نفسه اسم الأرابيش. وقد اتضح لها أن وجوب الاختلاف بين شخصيتي الرجل والمرأة فكرة لا تدور في خلد هذه القبيلة الجبلية المنزوية. فغاية الحياة في نظر الرجال والنساء على السواء هي الحمل و"تربية" الأولاد. والفعل في لعبة الأرابيش الذي يعني " حامل " قد ينصرف إلى الأب أو الأم. وهم يعتقدون أن الرجل يعاني آلام المخاض كالمرأة سواء بسواء. وما أن يولد الطفل حتى يشارك الأب في جميع واجبات رعاية الوليد. بل إنه ليضطجع بجوار زوجته ويضع رأسه على وسادة خشبية حرصا على تسريحة شعره التي بذل وقتا طويلا فيها. ويقول عنه بنو عشيرته إنه "في فراشه في حالة وضع" 

وأثناء نمو الطفل يساعد الأب  في كل التفاصيل المتعبة : 

      رجال الأرابيش  أشد "أنوثة" حتى من نسائهم. فالرجال، هم الذين يقضون الساعات في تصفيف الشعر وهم أيضا الذين يتزينون ويلبسون الأزياء الخاصة في المناسبات ويرقصون. والرجال وحدهم هم المشهود لهم بالكفاية في الرسم بالألوان. فرجال الأرابيش يعدون أكثر إحساسا بالفن من نسائهم.

      في قبيلة تشامبولي، تجد عكس المواقف السائدة في حضارتنا تجاه الجنس، فالمرأة هي الطرف السائد المتجرد من العاطفة وهي الآمرة الناهية، أما الرجل فهو الأقل إحساسا بالمسئولية، الذي يعتمد على غيره من الناحية العاطفية" 

      فنساء تشامبولي يقمن بصيد السمك وجمع الطعام، في حين يرتب الرجال خصل شعرهم ويحملون أقنعتهم أو يتدربون على نفخ الناي. أما الفنون - الرقص والحفر والتصوير - فهي غير هامة بالنسبة للنساء، ولكنها أهم أوجه النشاط المتاحة للرجال. وهكذا يتدرب رجال تشامبولي على السيرالهويني ويحاولون اكتساب الرقة المتوترة الساحرة للممثلات. فمعظم حياتهم يقضونها كأنها دور مسرحي يمثلونه بشكل واع على خشبة المسرح، على أمل أن تستمتع النساء بهذا الدور. وعلى حين أن نساء تشامبولي يعملن سويا في جو يسوده الشعور بالمودة والإحساس الزائد بالأنس، فإن العلاقات التي تسود بين الرجال، هي دائما مشوبة بالتوتر والترقب، وملاحظاتهم تتسم عادة بالخبث. وتصنع نساء تشامبولي ثروة القبيلة بنسج وبيع شباك لصيد، أما الرجال فهم يقومون بالتسوق وهم في أبهى الرياش ومحارات للزينة، يساومون في سعر كل سلعة يشترونها، ولكنهم يشعرون دائما أنهم ينفقون من ثروة المرأة :

      إن الأملاك الحقيقية، التي يقتنيها المرء بالفعل، تأتيه من المرأة، في مقابل نظرات حالمة وكلمات رقيقة... أما موقف النساء تجاه الرجال فيتسم بالتسامح والتقدير. إنهن يستمتعن بالألعاب التي يلعبها الرجال، كما يستمتعن بصفة خاصة بالحركات المسرحية التي يقوم بها الرجال من أجلهن . 

    ويتوقع المجتمع من النساء أن يأخذن بزمام المبادرة في النشاط الجنسي. بينما يترقب الرجال مبادرات النساء في استحياء حينا، وفي خجل وخوف حينا آخر وإذا لم تبادر الأرملة باتخاذ خليل آخر، دهش القوم لتعففها الزائد.

             ان السلوك الانسانى مكتسب فلا يوجد سلوك يسمى طبيعى بالنسبه للرجل او المراة . إن إحدى القبائل في الفلبين مقتنعة بأنه "لا يمكن ائتمان رجل على سر". وقبيلة مانوس Manus، وهي قبيلة أخرى في المحيط الهادي، تعتقد أن "الرجال وحدهم هم الذين يستمتعون بملاعبة وتربية الأطفال". وتعتقد قبيلة تودا Toda أن "جل العمل المنزلي أقدس من أن تمارسه النساء فهو واجب الرجال .