الأربعاء، 28 يوليو 2010

العريش 1949

    
        في عام 1949 كان عمر عزيز 17 سنه وعمر جمال 16 سنه.
- ما تيجي نطلع رحله اليومين دول .
- نروح فين .
- نروح العريش .
- يا عم دي عاوزه تصاريح من سلاح الحدود  ، ثم حنام فين ؟
- ننام فى خيمه على البحر.
     ومن هنا بدأت رحله العريش عام 1949،اقنع جمال اخوه مصطفى 15 سنه وانضم رابع وخامس وانا،سته فتيان حول السابعة عشر ، فى المراحل النهائية من التعليم الثانوي. عزيز طول عمره حمار شغل وجمال شاطر فى الاداريات .نزل جمال وعزيز وكاله البلح،وفى منطقه بولاق بالقاهرة .واشتروا خيمه  من بتوع الجيش وزنها بمهماتها لا يقل عن 80 كيلو واوتاد ومستلزمات الرحلة وفانوسين هواء  وكانت هذه الاشياء تباع بلا قيمه تقريبا، حيث تركتها جيوش الحلفاء  بعد انتهاء الحرب .
      قام جمال باستخراج تصاريح السفر بطلب وصوره لكل فرد، وامام المهنة  كتب طالب، وامام الغرض من الذهاب ،كتب للزيارة. لا اذكر كيف اقنعوا الاهل بالغياب لمده خمسه عشر يوما دون توفر اي وسيله اتصال فى ذلك الوقت !! واى واحد من هؤلاء الفتيه لم ينم خارج منزله ليله واحده  ، ولا عند خالته .
    عزيز وجمال وضعوا الخطة  ، هنحتاج اكل ايه ؟ عيش.. ام محمد الغسالة تخبزه وتشققه وتنشفه او تقدده، طبعا كل الاكل اللى حيتاخد نواشف . ايامها ماكنوش اخترعوا المعلبات ، ما كانش فيه فى بر مصر كلها حاجه اسمها علبه حلاوة طحينيه  . البقال عنده كتله حلاوه لا يقل وزنها عن 15 كيلو يقطع منها ويبيع . العسل الاسود يباع بالزلعة ومش معقول حتتشال زلعه فى القطار. تم وضع العسل فى زجاجه كبيره اسمها جمدانه تشيل عشره كيلو تقريبا . عزيز وجمال كانوا شطار جدا .  قعدوا حوالى 20 يوم يحضروا ويجهزوا للرحلة .عيله عزيز ساكنه فى اول دور فى منزل بجنينه ، حيث جرت البروفة الجنرال لنصب الخيمة فى وجود كل اعضاء الرحلة. حجره عزيز لها باب على السلم ، وزياره الاصدقاء لا تزعج احدا ،وليس له اخوه صبيان.
    المهم عزيز وجمال خططوا وحضروا كل حاجه والباقي فى التراوه  ، مسلمين نفسهم ، لا يعرفوا يعنى ايه خيمه ولا يعنى ايه معسكر. كل اللى سمعوه من  جمال وعزيز تناموا فى خيمه على الارض كل واحد يجيب بطانية ومايوه وخمسه جنيه  ، وبس . وتحدد يوم الانطلاق  وساعة الصفر ، العاشرة مساء من غرفه عزيز بالعباسية.
    
      كل شئ تمام ،تذاكر القطر محجوزة واستمارة شحن بصحبه الراكب 400 كيلو ،وموعد قيام القطار السابعة صباحا. ايامها لم تكن السيارات قد اخترعت بعد ، فلا يملك احد من الاهل سياره ،وطبقا للخطة الموضوعة حضرت الساعة الواحدة بعد منتصف الليل عربه كارو4 wheel بحصان نشط وتم تحميل 1000 كيلو تقريبا مهمات ،وتحركت العربة فى الثالثة صباحا والفتيه حولها .
        تبعد العريش عن القاهرة 344 كيلو متر وهى بلد قديمه على حدود مصر الشرقية جنوب رفح المصرية ب40 كيلو ورفح الفلسطينية ب40 كيلو وعشره سنتي (حيث تم اقامه صرح مصر العميق المسمى الجدار الفولاذي) ، ويربطها بالقاهرة خط حديدي كان يصل الى باريس،وتوقف عند العريش بعد الاحتلال الصهيوني للساحل الفلسطيني فى العام 1948، ثم توقف نهائيا بعد الاحتلال الصهيوني لشبه جزيرة سيناء فى العام 1967،فالاحتلال فى الحقيقة موجه بالدرجة الاولى لهذا الخط الحديدي. وصل القطار بالفتيه محطه العريش السابعة مساء، والشمس تغرب .
    تعلو محطه العريش عن البحر حوالى 70 متر،وتم انزال المهمات بسرعه ونشاط على الشاطئ تحت النخيل الذى يبعد عن مياه البحر 20مترتقريبا  ،سته شباب زي الورد يكلوا الزلط ، وكلوه فعلا , تمت العملية بسرعه قياسيه وده كان خطا استراتيجي فادح ،الدنيا بقت كحل كانت الايام الاخيرة من شهر ذو القعدة،  لا قمر ولا اي ضوء ولا على يعد 10 كيلو. وحصل ارتباك ولا اللى جرى فى 67 .ماحدش  شايف اخوه، ينتص فيه يعرفه من صوته. فين الفانوس؟ فين الجاز؟ فين الكبريت؟ فين الوتد؟ فين الخيمه؟ كله تائه، كله على كله فعلا، وماتعرفش لما  تقابله تقوله ،لانك مش شايفه. ساعتين بدون اي تقدم الا اشعال فانوس هواء اضاءته لمبه سهاري 5 واط.
- الصباح رباح.... احنا بقلنا 40 ساعة ما نمناش ....فطسنا.
 وتساقط الفتيه واحد ورا التانى، وإستمر عزيز وجمال الذى كان يتمتع دائما بهدوء وابتسامه عذبه . وعندما اشرقت الشمس استيقظ الشباب ولقوا الشاي سخن باللبن المركز والافطار عدس بجبه  والحلو شعريه محمرة بالسكر. وكلوا وجريوا على البحر يخدوا غطس، ودخل جمال وعزيز للنوم ساعة.


       لا توجد مياه عذبه فى المكان مجرد بئر مياهه مش حادقه، الغريب انك تلاقيها دلعه لا تصلح بالذات لعمل الشاى. يبقى مطلوب 12لتر مياه يوميا ويوجد قربه تتسع ل30 لتر، واقرب مكان يمكن ان تحصل منه على مياه عذبه مدينه العريش التي تبعد 3 كيلو عن البحر
-اتنين يروحوا العريش يجيبوا ميه لحد القطر ما يوصل بالليل نبقى ناخد منه ميه
-طيب وغسيل المواعين؟
-الرمل وميه البحر تنظف اي حاجه
-والحموم؟
-انتوا مش عايشين على البحر وطول النهار فى الميه؟ يبقى حموم ايه بعد كده؟ ده حتى يبقى افتراء ، مية البحر مفيدة.
خمسه عشر يوما لم تلمس اي مياه عذبه جسد اي من هؤلاء الفتية

       فى العام 1949 كان قد مر على النكبة عام وبضعه شهور،وزار معسكر الفتيه صبى اسمه وليد ،13 سنه تقريبا ،وحكى كيف هرب مع نساء واطفال الاسرة فى قارب  شراعي من قريه على الساحل الفلسطينى، وانه كان فى مدرسه فرنساوى، وانه رغم مرور اكثر من سنه على اللجوء فى معسكر غوث اللاجئين التابع للامم المتحدة، الا انها ايام ويرجعوا بيوتهم، امه معاها المفتاح ، وعاش وليد تقريبا مع الفتيه ويروّح بالليل  ،طول النهار قاعد يحكى مع عزيز.

     هناك فرق بين العوم والسباحة ،الشباب كانوا قبل الفطار يسبحوا وباقى اليوم يعوموا ،ماينفعش تتكلم وانت بتسبح، لكن ممكن تغنى ، وتلعب كوره والكلب الحيران وانت عايم . وليد كان يجيد السباحة ولكن مايعرفش يعوم ،عزيز علمه العوم، وكانوا بيقعدوا ساعات عايمين يحكّوا.
   الmenu كان فى الفطار: عدس بجبه او بيض والحلو: شعريه محمره بالسكر او سخينه .السخينه عبارة عن فتّه عيش فى مغلي حلبه حصى ومحلاه بالعسل الاسود وطشه سمن بلدي على الوش. مش اي حد يقدر على الاكلة دي ،يجب ان يكون قوى البنية وخالي من الأمراض ،وان كان غير ذلك فمن الواجب ان يودّع اهله اولا. العسل الاسود مفيد ، كله حديد واقتصادى جدا كل ما تاكل منه يريد ،الشباب بدأ الرحله ومعاهم عشره كيلو عسل وانتهوا معاهم اكثر من العشرة كيلو ، تركوها فى العريش . كانوا يلاحظون ان العسل يزداد لدرجه فورانه من الجمدانه،اكتشفوافى اليوم الاخيرالسبب ، حين لم يقدر اي منهم الاقتراب منه ، حيث تحو ل من حراره الشمس الى خل ومشروع كحول.
الغذاء كان على التوالي:

  • فتة عدس بالخل والثوم 
  • نصف فرخه بلدي للفرد  ومعها بطاطس
  • خمس سمانات للفرد ،تلاثه مطبوخه بالفريك والصلصة وجوز محمر
  • سمكه نصف كيلو مقليه وارز بالزيت
تكرر هذا البرنامج ثلاث مرات وفى اليوم الاخير ، وكان يوم العيد الكبير، ارسل لنا جارنا الوحيد حارس محطة السكة الحديد  ، فخده ضانى،ربع الضحية للجار .
معلومات :الفرخة البلدي وزن صافى  كيلو تقريبا 20 قرشا  ، جوز السمان 3 قرو ش، رطل السمك من البحر مباشره 30 قرشا .الرطل الفلسطيني المتعامل به فى العريش يساوى6 ارطال مصري والرطل المصري نصف كيلو تقريبا .ممكن تقديرتكلفة الفرد بما فيها شراء المهمات والسفر والاكل وصور الرحله، رجّع جمال لكل فرد نصف جنيه من الخمسة جنيه.
  
خمسه عشر يوما نوم بعد المغرب على الارض،  على بعد 20 متر من البحر، واستيقاظ مع الشروق ،وطول اليوم فى الشمس والبحر،واكل خمس نجوم ،فيه جمال اكتر من كده؟

     حين قرأ عزيز رائعه رضوى عاشور "الطنطوريه" ،وحين وصل فى الرواية الى رقيه وهى تحكى :
  " ........المس المفتاح، أرفع الحبل عن رقبتي.اضعه حول رقبه الصغيرة. اقبل جبينها. أعطيها للرجل الطويل فيعيدها عبر السلك الى حسن، فتاخذها امها منه . قلت بصوت عالي: مفتاح دارنا يا حسن. هديتى الى رقيه الصغيرة"
      اجهش  عزيز فى البكاء وارتفع نحيبه. ترى هل تذكر صديقة وليد بعد ستين سنه ومفتاح بيته الذي تحتفظ به امه؟ ام ترى كان يبكى هزيمته وهزائم جيله ؟ام أن الرواية أهاجت الذكريات ؟

   

الخميس، 22 يوليو 2010

ميد يوكر

      
         ميد يوكر، مقبول  ،ماشى حاله ،بين بين ،نوت باد ، نص نص ،مستوى b، متوسط الخ  صفه للفرد او العمل الذى  لا يرقى الى الصعود الى منصه التتويج . صفات اغلب البشر . انسان لا هو نابغه ولا هو لامؤاخده جحش ،عمل لاهو شئ ماحصلش ولا هو ثرثره تهمل وتترمى فى الزباله، شئ مقبول ، ممكن يلاقى حد يحبه.
       لي صديق، زميل تخته، من ابتدائي ايام ما كانت الفصول فى المدارس فيها  تخت مزدوجه  ، مش العيال قاعده على الارض .،وكانوا بيوكلونا بيقدموا لنا غذاء  ،ما بنكلوش زيه في بيوتنا  .  زميلي وصديقي - اسمه عزيز- وهو فعلا عزيز عليا  ، بس كان رزل، واحيانا رزل جدا ، كثير الاسئله، كان يسأل السؤال اللي صعب تلاقي له جواب . فى حصه الدين- هو بالمناسبة مولود في عائله مسيحيه- وايامها كان المسيحين يتلموا ويقعد مدرس مسيحي يشرح الدرس قصدي  يشرح الدين. المهم المدرس كان بيشرح قصه سيدنا ابراهيم والحلم او الرؤيا اللي شافها،انه يدبح ابنه -فى المسيحية المدبوح اسحق ولكن فى كتابات المسلمين المدبوح اسماعيل ، القران الكريم لم يحدد ، والاختلاف ما زال قائما للان مين اللي وافق انه يندبح - والمدرس بيشرح ، وكان بيشرح حلو وحماس ، وعند نقطه ابلاغ سيدنا ابراهيم الابن بضروره الدبح  ، وموافقه الابن........... الا وعم عزيز من اخر الفصل وهو مفعم بالبكاء يقول :
  - مش معقول
  -  ايه اللي بتقوله ده يا ولد....روح هات ابوك .

       فى موضوع الدين مقولته الوحيدة : انت ملاكش فضل فى اختيار دينك ، زي ملاكش فضل فى اختيار لون عنيك او نعومه شعرك او لونك او جنسيتك.. انت اتولدت مسلم او مسيحي اوهندى او اسود او اشقر كل ده موروث، انت ماخترتوش . ومالكش فضل فيه.

      ومن يومها، ومن  يوم ما كان عنه 8 سنين ، يقت اى حاجه عنده يامعقول با مش معقول ،وبقت لازمه فى كلامه "معقولة دى " ، بقى رزل وكثير الاسئلة . وكبر عم عزيز وكل الصفات اللي فى اعلى الصفحه حظى بيها ، طول عمره بين بين، مقبول، ماشى حاله،  نوت باد ، نص نص ، عمره ما كان ممتاز او ارتقى  الى منصه التتويج  . وكبر واتجوز واشتغل وجاب عيال كثير ولاد وبنات كلهم للمفارقة من جيد جدا لما فوق  . عندة ابن ميكانيكي يصلح اي حاجه من غير ما يوسخ ايديه وجدع ، وابن تاني غاوي مغنى وانشاد غنى مره فى مسابقه الناس عشقته  وبقي معبود الشباب الحلوين . عنده بنت حكيمه بثدى حقن ايدها خفيفه جدا ، حنينه جدا ، تقول للعيان قوم وانا انام مطرحك ، عنده بنت عالمه ذره تعمل المسخن سندويتشات ، وعنده بنت حكيمه برضه ، تشرب صندوق البيره مايبنش عليها  . عنده ابن خباز ماحصلش ، اكتر من ممتاز ، عنده بنت بتقول انا ما بعرفش اتكلم بس اعرف اكتب ، وبتكتب حلو قوى ، تضحك النمله ، عنده عيال كثير كلهم ناجحين وللغرابه بامتياز. عمره ما زعل حد من عياله او ضربهم وهما اطفال .

      صدق نظريه النشوء والارتقاء بتاعه داروين، بس اختلف معاه فى جزئيه جوهريه.  داروين رأيه ان الانسان اصله قرد او ارتقى من قرد..............عزيز رائه ان الانسان اصله حمار ، عمرك شفت قرد يشتغل  ، القرد دايما بيلعب  . لكن الانسان حمار شغل وعزيز حمار شغل ، يعرف يعمل كل حاجه وعمره ما دخل صنايعى  بيته .نقاش تلاقيه ، نجار مايقولش لا  ، يفصل ويخيط هدومه ولا اجعصها ترزي  ، يعمل كل حاجه تتلبس الا الشربات ، يلزق ورق الحيطه  ،يركب سخان جديد ، يطبخ  ، يعمل عزومه لاربعين نفر يكلوا ويشبعوا ومايفضلش ايشى ، عزيز خبير جيد فى الكميات . ومخترع ايضا ، ويحب الاختراع ،  حقيقي اختراعاته غير قابله للتسجيل،  يعنى اخترع طريقه لتسليك الحوض المستعصي تسليكه . يعمل كل الحاجات دي بدرجه مقبول ، او نوت باد  . البنات اصحاب بناته دايما يقولوله نفسنا نتجوز واحد زيك . هي البنات بتحب الانسان المد يوكر الانسان البين بين  ، المتوسط وتفضله عن الانسان الممتاز او العبقري . علمي علمك .

      شاف مره واحد محترف بيرسم لوح زيتيه قال انا اعرف ارسم احس منه  ، ونزل اشترى العده من بوتشلاتى ورسم عشرات اللوح، طبعا لوح كالعاده بين بين فى رأيه ، مع ان بعض الناس عجبتهم واحتفظوا بيها، المهم فى يوم ، بعد فتره لما كثرت الصور وكان بطل الهواية دي ، جدفهم من الدور السادس فى الخرابة اللي جنب البيت  . جزء من اللوحات نزل واللوحة باينه ، ساعتها اعجب بيها جدا وقال بس ما ينفعش حد يتفرج على اللوحة من الدور السادس .

      الهواية عتده زي البزل(الصوره اللي من الف قطعه ) اول ما يعرف يركبها تبقى اللعبه انتهت ، مش ممكن حيفكها عشان يركبها تاني.  ينقل لهوايه اخرى. يربى عصافير ملونه  يعمل تربيزات بتطبق ، يعمل بدل بحر ، اول من عمل الشورت والقميص لون واحد ويهديها لاصدقائه . بدل ما يروح للواحد منهم وفى ايه تورتايه  ، يهديه بدله بحر. ويفرح جدا لما يلاقى بعض الاصدقاء من الجنسين لابسين هذه البدل  ، رغم مرور اكتر من عشرين سنه  على اهدائها .
        غاوي يصلح اي حاجه خسرانه يصرف عليها 20 حنيه عشان يصلحها بنقسه ، وهى جديده تمنها يمكن20 جنيه  ، مش  بقولك انسان رزل.

      يقرأ الروايه او يشوف الفيلم ويقول دي روايه حلوه او فيلم كوبس تقوله ليه يقولك ماعرفش ، انا النقد عندى عجبتنى او ما عجبتنيش ، نقطه  ، ولا يزيد. يحب يسمع اللي بينظروا ويفسروا لكن هو لا ينظر ولا يعرف يفسر ،غايته الروايه دي ابكتنى  ، حطيت فيها كوز دموع. وفى السياسه ما عندوش غير اؤيد  او اعارض ، تقوله ليه يقولك معرفش ، مش شغلتى . لعب كل انواع الرياضه ، كل العاب المضرب ، وسباحه كره ماء ، سلاح ، بلى . كل لعبه الا كره القدم ماعرفش ابدا يلعبها  ،عقله فى ايديه مش فى رجليه، كل الالعاب دي وماوصلش فى اي لعبه منها الى مستوى اكترمن نص نص او يجى منه ، لم يصعد او يقرب ابدا من منصه التتويج ، ميد يوكر . ما غواش الكومبيوتر ما حبهوش ، ولو كان غواه كان عمل مدونه طبعا كانت حتبقى........ بين بين .

  رغم انه صاحبى وصديقي الا انه رزل جدا فى المناقشه ، ينرفز الكتكوت  ، من اسئلته اللي بعد ما تتكلم ساعه فى شرح وجهه نظرك   باسهاب ، يسألك سؤال ، مجرد سؤال يشلفطها  . مش بقولك رزل .


    من سنتين عزيز صديقى سهى الناس ومات، والناس فرحت قوى ...........لانه مات من غير ما يقول لحد .



الاثنين، 19 يوليو 2010

شهقه الملوخيه



      زمان ماكنش فيه بوتاجاز ولا وابور الجاز ، فى الزمن ده كانت الناس بتطبخ على الكانون بالحطب او الخشب. ولما الاكل يستوى لابد من رفعه من على النار. ورفع حله ملوخيه بعد ما تغلى غلوه واحده فقط فى مكان فيه بشر وطيور واحيانا معزه صغيره تسعى فى الدار كان يمثل خطوره، اذ  ان اي حركه غير محسوبه قد تؤدى لكارثه .وتضيع طبخه الملوخية فى الارض فيما يشبه السونامى . لذلك كانت السيدة التي ترفع الاناء من على النار تشهق شهقه عاليه مفاجئه تخلى البشر والطيور والاغنام تدور الحرى والابتعاد لافساح طريق امن لوضع حله الملوخية بعيدا عن النار .واختلف ما يقال بعد الشهقة العظيمة المنذرة .صلى على النبي ،مطرح ما يسرى يمرى،اوشئ من هذا القبيل .الان لاداعى لرفع الحله ، فان مجرد اطفاء البوتاجاز يؤدى الغرض  ، ولكن حفاظا على التراث تتم الشهقة عند طش التقلية .
      اذا كان فيه ثلاثه فى بر مصر كلها يتقنوا عمل الملوخية فانا - بتواضع شديد - واحد منهم  ، وذلك باعتراف جهات  محايده . وللافادة ونقل المعارف رأيت شرح كيفيه عمل الملوخية . فى الزمن القديم  وكان الباعه ينادون حبشيه يا ملوخيه فهل الملوخية من الحبشة الله اعلم ، خصوصا وان الحبشة فى وقت من الاوقات كانت اسمها ملوخا. وكتب التاريخ بتقول ان الحاكم بامر الله  -وده كان عنده ربع ضارب -منع الشعب من اكل الملوخية وجعلها حكرا على الامراء فقط وسماها ملوكيه  ، فالشعب  استهبل وقال احنا ما نكلش ملوكيه يا خواجتا- ماحنا طول عمرنا بيحكمنا خواجات-اللي بنكلها اسمها ملوخيه ودى بتجيب خلل اوعى تيجى ناحيتها. ما علينا، ازاى نعمل الملوكية قصدي الملوخية اللي بتجيب خلل .
      اولا- العامل الرئسى فى جوده طبخه الملوخية هو نوع الملوخية نفسها  ، ودرجه طازجتها ،يعنى لا تستعمل ما مضى علي جمعها اكتر من يوم ، ما تنفعش تعمل بيها ملوخيه وتخش بها مسابقه.
     ثانيا-عند تقطيف الملوخية لا تاخذ الاوراق اسفل الساق اليابسة ، خذ القمه النامية فقط وهو عنق به بضع اوراق يانعه ،خد هذة الشواشى فقط واغسلها جيدا بمياه جاريه فى مصفاه  ، ودعها فى مكان هاوي لمده ساعه.
    ثالثا- ممكن عمل الملوخية بشوربه سلق الفراخ او اللحمه ، ضانى او بقرى ،او الارانب ، والسواحلية بيعملوها بالجنمبرى، وحب الهال واللورو ورقه واحده فقط ، وقليل من الفلفل الاسود ومكعب من مكسبات الطعم والرائحة ماجي او ما شابه ، وحبه طماطم ومعلقه سكر.وفص مستكه .
    رابعا- تخريط الملوخية من اهم العمليات فلا يجوز استعمال الالات مثل الفود بروسيسور فى التخريط حيث انها تعصر الاوراق، استعمل المخرطة التقليدية ، ومن غيرها تطلع الطبخه اي حاجه تانيه مش ملوخيه  ، ويستمر التخريط للوصول الى تقطيع الاوراق والعنوق ليس ناعما جدا ، يعنى في حدود 2,5 مللي متر مربع  كما فى الصوره ، بعض البشر يحبها مخرطه بالسكينة وتسمى فى هذه الحاله بوراني ،ويمكن اضافه قليل من الكسبرة الخضراء اثناء التخريط .
    خامسا- التقليه وهى عباره عن راسين توم لكيلو الملوخية يدق مع معلقتين كبار كسبره ناشفه وتوضع نصف هذه الكميه على الشوربه قبل عمليه اسفاط الملوخية مع بصله متوسطه مقطعه قطع صغيره 7مللى مربع تقريبا .
   سادسا-دع الشوربه تبدا فى الغليان  ، لتر تقريبا لكيلو الملوخية ،لاحظ اذا كانت الملوخية فى اول الموسم فقلل كميه الشوربه  . واسقط الملوخية تدريجيا مع التقليب ولا تدعها تغلى اكثر من دقيقة واحده. .اذ اغليت الملوخية 62 تانيه ، حتكل بساره مش ملوخيه.
   سابعا -حمر النصف المتبقي من التقليه فى سمن طبيعي- اذا كنت عاوز تاكل ملوخيه - الى درجه اصفرار لون الثوم ثم ضفها الى الملوخية  وانت بتشهق ، حتش  ، واذا ما طشتش تبقى الملوخية باظت .
   عمليه الاسقاط وطش التقليه  والشهفه طبعا تتم قبل الاكل مباشره يعنى الناس لازم تسمع الطش والشهقه فى وقت واحد ، حيث لا يجوز فى المذاهب الاربع  ، باى حال من الاحوال  ، تسخين الملوخية . بجانب الملوخية يمكن عمل اللحمه بالدمعه ودى طماطم وتوم .  وتقدم مع ارز ابيض .وخللي بالك الملوخية بتوكل ارز.
  فيه ناس بتشرب الملوخية وناس بتغمسها وناس بتحطها على الرز  كل واحد براحته .
    ده بالنسبه للملوخية الخضراء ،ولكن اي لون تاني او ناشفه او مجمده فدى حاجه تانيه  مش ملوخيه .
الملا حظ ان الكلام كله موجه للذكور،ليه  ؟؟؟؟؟؟؟؟؟؟ تلك قصه اخرى .


الخميس، 15 يوليو 2010

الميكروويف عطلان


                    


        جيت اسخن الفول لقيت المايكروويف كل حاجه فيه  شغاله ، الا انه لا يسخن الاكل ، عطل . كلت الفول بارد من التلاجه ، كسلت اجيب طاسه واولع البوتاجاز وبعدين اخش فى غسيل الطاسه والذى منه . التكنولوجيا اللي دخلت حياتنا فى الخمسين سنه الاخيرة خلتنا اكسل الكائنات على وجه الارض.
         انا عشت ايام معظم اللي سيقرأ الموضوع ده لم يحضرها . كان البيت المقتدر عنده تلاجه خشب موصله على مواسير البيت وفيها سربتينا رصاص (لاحظ رصاص اللي الان يعتبر سام) يتحط عليه كل يوم ربع لوح تلج بقرشين (اغلبكم لم يرى القرش  )  ومترتب انسان يجيب التلج كل يوم قبل الظهر، ويتلف الربع لوح  فى خيشه ويتحط فوق السربنتينه الرصاص وتفتح الحنفية تاخذ منها ميه ساقعه زي الرصاص ، وطبعا دايب فيها رصاص . اسلوب حفظ الاطعمة فى الثلاجة لم يكن معروفا ، يعنى الاكل يطبخ يوم بيوم  ، وكل شئ يشترى يوميا  .وكان فيه شئ اسمه نمليه يتحط فيها الجبنه والحلاوه  والعيش. اول ما دخلت الثلاجة الكهربية مصر كان بعد الحرب سنه 45 . وكانت ماركتها فريجيدير،واصبح اسم الثلاجة الكهربية فريجيدير ، وما زال البعض يستعمل هذا الاسم  للان .
         ماينفعش الواحد يتحمم وقت ما هو عاوز ،لان الحموم وخاصه فى الشتاء يحتاج مياه ساخنه، ولم يكن السخان الكهربي او سخان البوتاجاز قد دخل مصر بعد . فكان هناك ما يسمى بيوم الحموم.  يتولع وابور الجاز -اغلبكم لا يعرفه - ويوضع عليه صفيحه  او وعاء نحاسي اسمه طشت الحموم ، وبعد ان تصل درجه حراره المياه الى درجه عاليه نسبيا يدخل افراد العائلة واحد وراء التاني ‘ النفر منا كان يخرج من الحمام نعسان ، هو مش بالظبط نعسان هو دايخ من وش وابور الجار وبخار الماء الساخن المختلط باول وثاني واكسيد الكربون  يتقلب ينام على طول  . يعنى طوال طفولتنا الحموم يعنى النوم بعدها فورا ، ادمنا اول اكسيد الكربون  . دخلت السخانات في اول الستينات   وبقى الانسان يتحمم وقت ما هو عايز .
          انا بتكلم على بيوت الطبقه الوسطى .فى كل بيت كان مترتب انسانه تيجى فى يوم معين اسمها الغسالة ، وفى الغالب كان اسمها ام محمد ، مهمتها تغسل غسيل البيت كله ملايات وملابس وتنشره فوف السطوح وتلمه  ، وتجندر الملايات (تجندر الملايات دي عمليه معقده جدا اعجز عن شرحها ،شى قريب من المكواة بس بدون حراره ) وتاخذ 50 قرش فى اخر النهار . كان طشت الحموم يملا ماء لغلى الملابس ، وضروري من وجود عصايه الغليه ، وماكنش فيه بيت ما فهوش عصايه الغليه  . اذكر لما جبنا الغسالة الكهربية سنه 75 ، قعدنا نتفرج عليها  حوالى ساعه ونصف .  دلوقتى بتسخن الميه ، دلوقتى بتغسل ، دلوقتى بتشطف ، دلوقتى بتعصر الخ ، الان هناك غسالات بمجففات  ، يعنى ما تكلفش نفسك حتى تنشر الغسيل .
       كان الراديو يوضع فى اعلى مكان فى البيت حتى لا يطوله الاطفال . وكان يوضع فوق السطوح عرقين  خشب يمتد بينهم سلك يصل بالراديووالا مايشتغلش (ايريال ) وكنا ندفع للحكومه جنيه ضريبه سنويه (الجنيه كان يجيب 4 كيلو لحمه ) . حين دخل التلفزيون الابيض والاسود مصر فى يوليو60 والملون فى اول السبعينات كان حدثا توقفت  فيه الحركه فى الشوارع .وكان قناتين فقط الاولى والتانيه ،ولما تحب تعلى الصوت او تغير القناه لابد تقوم وتخبط مشوار لحد التلفزيون .دلوقتى فيه 500 قناه وريمود يقلب فى القنوات ،بالمناسبه انا لما بتقرج على التلفزيون ، وده قليل ، بتفرج على عشر محطات فى وفت واحد ،الريمود فى ايدى وانا حر . نزل السوق منذ فتره اجهزه بهارد دسك ممكن تسجل عليها لحد 800 ساعه ،وممكن ترجع الفقره المذاعه لست ساعات .يعنى جالك تيليفون وانتى بتتفرجى وانشغلتى فى المكالمه تعملى بوز(مش قصدى تعملى منظر ) توقفى العرض، وقمتى بعد كده فتحتى الباب وقعتى تتكلمي مع جارتك ساعه ، ممكن ترجعى وتشغلى التلفزيون ويبدأمن ساعه ما وقف . الان كل شئ وانت قاعد بالريمود تشغيل المروحه اوالمكيف، تشغيل الغساله ،تسخين الاكل وانت فى الشغل ، مجرد رنه موبايل ،حتى الستاير بقت تفتح وتقفل بالريمود .
         انا ما زلت اتكلم عن بيوت الطبقه الوسطى، اذا توفر فى الشارع تليفون عند بقال او اجزا خانه  يبقى ده كرم من عند ربنا ، .العمارة لو كان فيها شقه فيها تليفون يبقى اخر بغدده  ، الان الشقه فيها تليفونات اكتر من عدد افرادها ،ولو خمسه قاعدين سوا يبقى موجود 8 تليفونات وبقت التليفونات تسجل صور وفيديو ورسائل وتويتر وكمبيوتر ، وتصحيك من النوم ،وتقلها على المكان اللى انت رايحه تقولك خش يمين ولف فى الدوران اللى جى وماتمشيش فى الطريق ده فيه حادث معطل المرور ،ولو غلطت تشخط فيك ، الموبايل بقى يعمل كل حاجه ، ناقص يقمع باميه .
        فى اول الستينات كانت حرب اليمن والضباط رجعوا فى الاجازات  معاهم اختراع خطير اسمه مسجل ، نسمع ام كلثوم ونسجلها وبعدين نسمعها  فى اي وقت  ، سبحان الله ويخلق ما لا تعلمون . المسجل كان شي كبير نسبيا قد شنطه سفر صغيره  ووزنه حوالى 10 كيلو ، وشريط التسجيل قد رغيف العيش البلدي وكان اربعه تراك  ، يعنى تسجل عليه اربعه ساعات . بعد بضعه سنوات طلعت المسجلات الصغيرة الكاسيت ، سالت احد الاصدقاء اعمل ايه فى المسجل الداهية اللي عندي قالي حطه امام الشقه الزبال يخده ، للاسف الزبال مارضيش يخده .
     مش حخش فى الفيديو واللهارد دسك وا لاجهزه اللي قد مشط الكبريت اللي بيقولوا مسجل عليها اغاني وافلام عشرات الساعات والكمبيوتر اللي انا  ما بفهمش فيه وانتم بتفهموا فيه اكتر منى . اليوم قرأت في التويتر ان امن الدوله الاردني يقضى بحبس طالب استخدم الماسنجر للمس بالملك ،  سالت الصديق اللي نزل الخبر ايه هو الماسنجرعلشان  ابعد عنه، للاسف ما ردش عليا  .وللان مش عارف ايه الماسنجر  ده، وزعل الملك ليه .
           اذا كان تاريخ الانسان على الارض 24 ساعه  ، فقد عاش 23  ساعه وخمسون دقيقه  على الصيد وجمع الثمار. وتاريخ الانسان المعروف فى العشر دقائق الاخيرة فقط . وفى الخمسون سنه الاخيرة تحققت اختراعات تفوق   مئات المرات ما انجزه الانسان منذ ربط حجرا في عصا لاستعمالها فى الصيد . الغريب رغم كل هذه الاختراعات التكنولوجيه لم يخترع الانسان اّله تخرط الملوخية
            السؤال الذى يلح على دائما ما الذى قدمناه للبشريه من كل هذه الاختراعات .........لا شئ . احنا بنستهلك بس،لا بنخترع ولا بنصنع ، الصين فيها البركه مكفيانا.
كل اختراع او سلعه تدخل حياه الانسان يصبح عبدا لها ، يعنى ينفع الانسان يعيش من غير كلينكس مثلا  ؟؟؟
        المهم اعمل ايه فى الميكروويف العطلان ده ،  واذا قدرت اتغلب على مشكله عدم وجوده ،  قد ايه ممكن يعيش الانسان من غير ما يسخن الاكل اللي طالع من التلاجة ،وهل هناك ضرر من اكل الطعام ساقع .
            يقال ان الانسان سيتحول فى المستقبل الى راس كبيره وإصبع صالح للمسه كليك ، او ضغطه على ريمود ، وتذوى بقيه اعضاؤه.


السبت، 10 يوليو 2010

نصر حامد ابو زيد



ولد نصر أبو زيد في إحدى قرى طنطا في 10 يوليو 1943، ونشأ في أسرة ريفية بسيطة، في البداية لم يحصل على شهادة الثانوية العامة ليستطيع استكمال دراسته الجامعية، لأن أسرته لم تكن لتستطيع أن تنفق عليه في الجامعة، لهذا اكتفى في البداية بالحصول على دبلوم المدارس الثانوية الصناعية قسم اللاسلكي عام 1960م





 مسيرته الأكاديمية

حصل نصر علي الليسانس من قسم اللغة العربية وآدابها بكلية الآداب جامعة القاهرة 1972م بتقدير ممتاز، ثم ماجستير من نفس القسم والكلية في الدراسات الإسلامية عام 1976م وأيضا بتقدير ممتاز، ثم دكتوراه من نفس القسم والكلية في الدراسات الإسلامية عام 1979م بتقدير مرتبة الشرف الأولى.


مسيرته العملية

عمل نصر حامد أبو زيد بعدد من الوظائف منها:


  • فني لاسلكي بالهيئة المصرية العامة للاتصالات السلكية واللاسلكية 1961 -1972 م.
  • معيد بقسم اللغة العربية وآدابها، كلية الآداب، جامعة القاهرة 1972م.
  • مدرس مساعد بكلية الآداب، جامعة القاهرة 1976.
  • منحة من مؤسسة فورد للدراسة في الجامعة الأمريكية بالقاهرة 1976-1977م
  • مدرس بكلية الآداب، جامعة القاهرة 1982.
  • أستاذ مساعد بكلية الآداب ، قسم اللغة العربية وآدابها بجامعة القاهرة بالخرطوم خلال الفترة من {1983-1987}
  • أستاذ مساعد بكلية الآداب، جامعة القاهرة 1987.
  • منحة من مركز دراسات الشرق الأوسط، جامعة بنسلفانيا بالولايات المتحدة الأمريكية 1978-1980م.
  • أستاذ بكلية الآداب، جامعة القاهرة 1995.
  • جائزة عبد العزيز الأهواني للعلوم الإنسانية من جامعة القاهرة 1982م.
  • أستاذ زائر بجامعة أوساكا للغات الأجنبية باليابان 1985 - 1989م
  • وسام الاستحقاق الثقافي من رئيس جمهورية تونس 1993 م.
  • أستاذ زائر بجامعة ليدن بهولندا بدءا من أكتوبر 1995 م.
  • جائزة اتحاد الكتاب الأردني لحقوق الإنسان، 1996.
  • كرسي كليفرينخا Cleveringa للدراسات الإنسانية -كرسي في القانون والمسئولية وحرية الرأي والعقيدة- بجامعة ليدن بدءا من سبتمبر 2000م.
  • ميدالية "حرية العبادة"، مؤسسة إليانور وتيودور روزفلت2002.
  • كرسي ابن رشد لدراسة الإسلام والهيومانيزم، جامعة الدراسات الهيومانية في أوترخت، هولندة2002
  •  جائزه اتحاد المسلمين الديمقراطين بالدنمارك سنه 2006


     وعندما قدم أبحاثه للحصول على درجة أستاذ تكونت لجنة من أساتذة جامعة القاهرة بينهم د.عبد الصبور شاهين الذي اتهم في تقريره د.نصر " بالكفر "، وحدثت القضية المعروفة التي انتهت بترك نصر الوطن إلى المنفي، منذ 1995 بعد أن حصل على درجة أستاذ، بأسابيع.
انضم إلى جبهة عبد الصبور شاهين كلا من:
محمد بلتاجي و أحمد هيكل وإسماعيل سالم، وقاموا بتأليف الكتب للرد عليه حوت تكفيرا له.
فاز الدكتور أبو زيد بجائزة مؤسسة ابن رشد للفكر الحر (تيمناَ باسم الفيلسوف ابن رشد، 1126-1198، الذي أصبح بفلسفته جسراً ممتدا بين الثقافات) ، من معهد جوته ببرلين. (من أجل إعادة قراءة معانى القرآن قراءة مستقلة عن التفسير التقليدي.)

أثارت كتابات الباحث المصري ضجة إعلامية في منتصف التسعينيات من القرن الماضي. فقد أتُهم بسبب أبحاثه العلمية بالارتداد والإلحاد. ونظراً لعدم توفر وسائل قانونية في مصر للمقاضاة بتهمة الارتداد عمل خصوم نصر حامد أبو زيد على الاستفادة من أوضاع محكمة الأحوال الشخصية، التي يطبق فيها فقه الإمام أبو حنيفة، والذي وجدوا فيه مبدأ يسمى "الحسبة" طالبوا على أساسه من المحكمة التفريق بين أبو زيد وزوجته. واستجابت المحكمة وحكمت بالتفريق بين نصر حامد أبو زيد وزوجته قسراً، فحياة الزوجين باتت بعد ذلك في خطر، وفى نهاية المطاف غادر نصر حامد أبو زيد وزوجته د.
ابتهال يونس الأستاذة في الأدب الفرنسي بجامعه القاهرة الى المنفى فى هولندا، ليقيما هناك حيث عمل نصر حامد أبو زيد أستاذا للدراسات الإسلامية بجامعة لايدن.



 مؤلفاته

  • الاتجاه العقلي في التفسير (دراسة في قضية المجاز في القرآن عندالمعتزلة) وكانت رسالته للماجستير
  • فلسفة التأويل (دراسة في تأويل القرآن عند محيي الدين بن عربي)وكانت رسالته للدكتوراة، في كلية الآداب جامعة القاهرة قسم اللغة العربية
  • مفهوم النص دراسة في علوم القرآن
  • اشكاليات القراءة واليات التأويل (مجموعة دراساته المنشورة في مطبوعات متفرقة
  • نقد الخطاب الديني وهو الكتاب الذى كشف فيه دور عبد الصبور شاهين في الترويج لجريمه توظيف الاموال
  • المرأة في خطاب الأزمة (طبع بعد ذلك كجزء من دوائر الخوف)
  • البوشيد و(ترجمة وتقديم نصر أبوزيد)
  • الخلافة وسلطة الأمة نقلة عن التركية عزيز سني بك (تقديم ودراسة نصر أبوزيد)
  • النص السلطة الحقيقة (مجموعة دراسات ومقالات نشرت خلال السنوات السابقه)
  • دوائر الخوف قراءة في خطاب المرأة(يتضمن الكتاب السابق المرأة في خطاب الأزمة)
  • الخطاب والتأويل (مجموعة دراسات ،تتضمن تقدمة كتاب الخلافة وسلطة الأمة)
  • التفكير في زمن التكفير (جمع وتحرير وتقديم نصر أبوزيد عن قضية التفريق بينه وبين زوجته وردود الفعل نحوها)
  • القول المفيد في قضية أبوزيد(تنسيق وتحرير نصر أبوزيد عن قضية التفريق بينه وبين زوجته.
  • هكذا تكلم ابن عربي (يعيد فيها الباحث مراجعة دراسته عن ابن عربي)
  • الإمام الشافعي وتأسيس الأيديولوجية الوسطية
        فارق الحياة صباح الإثنين 5 يوليو 2010 وتم دفنه بمقابر أسرته بمنطقة قحافة بمدينة طنطا . كان الدكتور نصر ابوزيد قد عاد الى الوطن قبل أسبوعين من وفاته بعد اصابته بفيروس غريب ، فشل الاطباء في تحديد طريقة علاجه ، وقد دخل في غيبوبة استمرت عدة ايام حتى وافته المنية .
       كان رجلا عظيما وشجاعا .



الاثنين، 5 يوليو 2010

الفتاة التي لم تعدنا بشئ

الفتاةُ التي لم تعدْنا يشيءْ
 الفتاة التي تتلمّس أوصافها
بين جسمٍ يرنُّ بأوصافه الداويات
وروحٍ هشاشتُها خجَلٌ أو أَلَمْ
لفتاةُ التي تتمرجح في كوعها سلّةُ التين قاصدةً بيتَ جدَّتِها في الصباحْ
الفتاة التي كّرَّهَتْها تنانيرها بالرياح
الفتاة التي حَذَّروها من الضِّحْكَةِ الصاخبةْ
والتي علَّموها الرضى بالمتاحْ
 واعتياد الندمْ
 سترتها المتاريس عن أعين الجُنْدِ
لكنّها
 فضَحَت نفسَها، بالعَلَمْ::::  
مريد لبرغوثي