الأربعاء، 9 سبتمبر 2015

مستشفى مايو كلينك العلمين

         
   
معقوله دى، فى ١٢ ساعة عربية اسعاف اخر شياكة ومن مركز طبى لمستشفى و٨ رسم قلب و٧ تحليل انزيمات و١٦ واحد بيخدموا عليك وكل واحد عارف بيعمل ايه ......  نحكى الحكايه من البدايه! 

         من اسبوع اصابنى وجع خفيف فى فم المعدة ، دقيقة ويروح قلت من اكل الشطة بلاها ، بطلت الشطة ،  امبارح ٨ سبتمر بعد الغذاء وكان خفيف جدا استلمنى وجع من الساعة ٥ بس مستمر ، عزة بنتى طبيبة وبتحضر مؤتمر فى امريكا دخلت حكتلها 
- بابا اطلب الاسعاف فورا وروح اعمل رسم قلب فى المركز الطبى فى مارينا 
- افضل اروح بكره بالنهار
- طيب بس ضرورى تروح بكره 
الساعه ١٠ مساء طلبت بنفسى من الوجع سويش شركة الادارة 
- عايز عربية الاسعاف واديته العنوان 
خمس دقائق مش سته عربيه الاسعاف قدام البيت
قولت العبها صح هاتو الترولى وربطونى فوق الترولى وفى سيارة الاسعاف المجهزة المكيفة وعلى المركز الطبى ودخلنا من باب الطوارئ ، لقيت اتنين دكاترة شباب وثلاث اربع ممرضات وعلى الترولى عملوا رسم القلب.
طبعا انا رايح بالشورت والتي شيرت اللى كنت نايم بيهم ومش حالق دقنى وشكلى عفش للغاية 
- استاذ احمد لابد تروح فورا مستشفى العلمين، التجهيزات هناك افضل وهنا مش حنقدر نعمل حاجة غير رسم القلب ، ورسم القلب طلع  مش حلو! 
بنفس سيارة الاسعاف وعلى مستشفى العلمين التى تبعد حوالى ٢٠ كيلو ودخلنا بالترولى لقيت يجى ١٦ انسان اللى بيشيل فيا واللى بياخد  عينة دم واللى بيركب اجهزة رسم القلب
- يا جدعان انتم مكبرين العملية جدا الموضوع ما يستاهلش 
اجاب كبيرهم 
- احنا حنحطك تحت الملاحظة فى العنايه المركزة لمدة ٢٤ ساعة
السواق والممرض اللى خدونى من البيت قالوا احنا ماشين وبقيت انا بالتيشرت والشورت اللى مش مكوى والشبشب على بعد ٢٠ كيلو من بيتى
- استاذ احمد معاك بطاقة 
- يا جدعان انا ماعيش حاجة ابدا!! 
على حجرة العنايه المركزة او بالاصح على ملعب العناية المركزة ، مساحتها كما ملعب كرة سله وبها عشر بارتيشن كل واحد ٣ فى ٣ متر ، وكل بارتيش به سرير حديث جدا وكل الاجهزة التى تخطر على البال 
قلعونى هدومى ولبسونى هدوم ورق قلتهم اوعى ترموهم رغم هما فعلا يستحقوا الرمى .
وابتدى اللعب اللى على اصله،  اربع ممرضات وشاب يبدو انه الريس عليهم ، اللى بتاخد عينه دم واللى بتحط كالونه
-  نحط لك قسطرة
،-يا جدعان انا بتحرك ، لسه امبارح كنت بعوم فى البحر 
- ما ينفعش يبقى لازم تروح التواليت على الكرسى

الملاحظ ان الممرضات فى منتهى الشياكة ملابس مكويه ، كحلى،  ولبنى،  وابيض ، ورمادى ،وكلهم معاهم موبيلات حديثة جدا وكلهم مبتسمين  
- يا شباب انا سايب مراتى لوحدها وتليفوني قاطع شحن 
- النمرة كام واحنا نطمنها 
- حط الحبايه دى تحت لسانك 
- اندغ الحبوب دى 
واسئله ويسجلوا ،. اسئله فى كل الاتجاهات بتشرب سجاير ، كحوليات ، عندك ضغط ومن امتى ، عملت عمليات قبل كده ، كان ناقص يسالونى امك اسمها ايه 

خلص الكلام دا فى ساعتين وابتدى الوجع يروح وابتدوا الممرضات يختفوا وبقى المشرف على العشر برتيشنات الفارغة  وانا المريض الوحيد فى غرفة العناية المركزة 
- الدور ماشى ازاى، انتم مين ومنين؟ 
رد الشاب  
- احنا اكفأ العاملين فى وزارة الصحة ننتدب للعمل فى مستشفى العلمين لمدة اربع شهور الصيف !!

حاولت انام ما عرفتش فكل شويه ناخد عينة دم ونعمل رسم قلب ، فى التاسعة جاء الطبيبين اللى قابلونى اول ما جيت 
- ايه الاخبار 
- بالصراحة الوجع راح من بالليل تماما،  ولكن هناك وجع تانى حل ، انا ميت من الجوع 
ابتسما 
- فى الغالب انت حتخرج النهاردة ، رسم القلب بقى كويس الى حد ما واحنا منتظرين نتيجة تحليل انزيمات القلب 
ابتدت النبطشيه تتغير وممرضات جداد يظهروا وعليهم ريس كما الان  ديلون 

جاء الطبيبان ومعهم كيس انا اتخضيت 
- دا اللى لقناه فى البوفية 
كروسان وباتيه وساندوتش شيك مش عارف فيه ايه وعلبه عصير بيور ولوح شكولاته كاتبورى وزجاجة مياة  !! بالصراحة انا ازبهليت ، واحد رايح المستشفى بتى شرت وشورت مش مكوى وشبشب وماعهوش بطاقة والموبايل بتاعة قاطع شحن ، غريبه يتعمل معاه كل دا 
فى الثانية عشر جاء قرار الافراج وابتدوا يقلعوني  القميص الورق والبس الهدوم اللى جيت بيهم  ومع السلامة يااستاذ احمد هات الدوا اللى كتبنهولك ويبدو ان اللى بيكلمنى مدير المستشفى . 

المهم بعد الهلولة دى تسالونى دفعت كام ؟؟
ولا مليم احمر فهكذا خدمة الطوارئ فى البلاد المتحضرة ، وطلعت مارينا العلمين من ارقى البلاد المتحضرة !!