الأربعاء، 30 مايو، 2012

يوم عند الميكانيكى

image001
 
        السيارة فى مصر بنسميها عربية رغم ان العرب لم يشتركوا فى اى مرحلة من مراحل اختراعها  ..الغرب هو من اخترع وانتج السبارة لتصبح مناسبة له ولاجواءه الباردة ..الدنبا عندهم  فى الصباح ساقعة وعند ادارة موتور السيارة فلا يحتاج لمياة المبرد.. فيسك عليه ..ولما الموتور يسخن يفتح منفذ لدخول المياة عن طريق جهاز اسمة سيرمو ستات ...بلادنا حر كفاية  لا تحتاج لهذا الجهاز.... والموتور عايز يتبرد اول  ما يدور  .



      راجع من الرحلة الاسبوعية للسوبر ماركت لشراء مستلزمات الاسبوع مع ابنى  لقيتنا العربية بتسخن ، نزلنا وحطينا  ميه فى الردياتير… الردياتير يرجعها كلها.... وتكرر الامر  اكثر من 8 مرات فى مسافة 2 كيلو خدنا فيهم  اكثر من ساعتين زمن  .قلنا الصباح رباح… وائل قالى سبنى اتصرف  وكنت استويت ما علقتش.


امس  كلمت المكانيكى  وشرحت له  الموضوع قاللى
- هات العربية الورشة
- اجبلها ازاى ؟؟؟ العربية  بتسخن حتولع
- حبعتلك  الواد حمقه يتصرف
وجاء  صبى صغير   ومعه بنسة ومفك  ويعد ما شرحت له  الموضوع فتح الكبوت
- حتعمل ايه ؟؟
- حناخد لها هواء وهى باردة !!
- خدلها هوا انشالله يكون بفايدة..

خدلها هوا وماطلعش بفايدة ... ودرجة  الحرارة توصل 110 فى 3دقائق

- نخدها الورشة
- ازاى يا حمقه
- انا حتصرف



      يفصل المهندسبن حيث اسكن ، وارض اللواء  حيث الورشة خط سكك حديد الوجة القبلى  وترعة الزمر  المملوءة بكل مخلفات الكرة الارضية… المسافة بين النقطتين على الخريطة لاتزيد عن 600 متر اما بالطريق فتصل الى  4 كيلو متر
      عربية كارو بحمار معدية 

- صباح  الفل ياحلاوة  عازين عربيتك  تقطر العربية  دى لارض اللواء

اتفقوا على الاجرة... وبسلبة العربية الكارو ربطو ا العربية البيجو  وابتدينا نمشى …فكرت اركب الحمار  (على فكرة .. الحمار كائن طيب جدا..  عمرك ما تشوفة ميسوط...  فى عينه دائما حزن دفين )ولكن حمقة  قاللى اركب العربية وامسك الريكسيون.



       ارض اللواء هو الحي الشعبي المقابل للمهندسين الذى سكنت فيه   من اكثر من 40 سنة ....وارض اللواء الذى يفصلها عن المهندسين شارع السودان والسكة الحديد وترعة الزمر  ونصل اليها عن طريق كوبرى بدائى كانت عبارة عن غيطان مزروعة .وواضح انها كانت مملوكة للواء ما... وقام بتقسيمها عشوائيا وبيعها كارض مبانى فسميت باسمة ..وتعتبر الان من العشوائيات الشهيرة بجانب بولاق الدكرور.. ويسكنها بشر اكثر تعدادا من ساكنى القاهرة فى الخمسينات

وصلنا الورشة واعدت شرح الموضوع للاسطى محمد وهو  شاب اربعينى كان يعمل فى شركة بيجو واستقال وفتح الورشة


- فك الكوع يا حمقه ... حروح اصلى الظهر

فك حمفه الكوع لقيت داخلة سوسته مصدية او تقول كتلة صدا
عاد الاسطى محمد من الصلاة
- حتعمل اية يا محمد
-حفور الترموستات

فور الترموستات واصبح الكوع عبارة عن ماسورة فاضية وركب يا حمقة ..ودور يا حج ..  الحرارة 100 فل  ما بتزيدش عن 80   وخلصت العملية
- كدة تمام يامحمد
- تمام
- مافيش حاجة تانية  دانا بقالى يومين لايص تخلص فى 10 دقايق ..شوف العربية عايزة ايه؟
اتفقنا نغير بالمرة سير الكاتينه وسير المجموعة  وتيل الفرامل والكبالن اللى  ابتدت تتقتق وبالمرة نجيب كوع جديد
- حنجيب كوع جديد ونفور الترموستات
- فى مصر الكوع بيتباع من غير ترموستات
- والموضوع دة ياخد  قد ايه؟؟
- يخلص انشاء الله بعد صلاة العصر


       فى مصر رغم ان  كل الناس معها ساعات لكن الوقت يحسب بواعيد الصلاة ..اقابلك بعد صلاة العشا ..مازلنا نعيش رواسب واعراف المجتمع الزراعى.


         المكانيكى فى الاحياء الشعبية  اجرته حنينة.. المحل ايجارة بسيط.. الصنايعية ساكنين حول المحل او بيباتوا فى المحل بالاضافة ان الزبون اثناء اصلاح سيارته يبقى زيه زى الواد بلية
- دور ياحج ..دوس فرامل يا حج ..كرك يا حج ..روح هات مسمار زى دة من المحل اللى جنب الشارع يا حاج .. تتمشور ميت مشوار.

المهم قلت من صلاة الظهر لصلاة العصر قريبة .. والجو كان لطيف قلت اقعد اتفرج.


     بجانب الورشة قهوة مساحتها لاتزيد عن 4 متر مربع.. واحد واقف على النصبة والتانى بيوصل الطلبات.. راجل كبير لايزيد وزنه عن 40 كيلو..والقهوة   بجوار خرابة فيها ما لايقل عن 100 كرسى .. حمقه سحب كرسى وحطه فى الظل وقاللى استريح يا حج.
- عندك كام سنه يا حمقة
- 15 سنة
اكسفت اقولة بتعرف تقرأ ولا تكتب... ولكنى تاكدت من خبرته فى التعامل مع السيارة انه يعمل من سن 8 او عشرة سنوات  …فك سير الكاتينة وسير المجموعة وكوبلن وحطهم فى كيس واشار بما معناة روح هاتهم من عند المسيرى…


       التكاتك امام المحل رايحة جاية بتجرى  كانها مدينة ملاهى.. تحمل البشر والعائلات ويقودها صبية من عمر 12 سنه فكرت اخد توكتك  ولكنى خفت
شفلى تاكس يا حمقه

سنوات طويلة لم ارى مصر .. فى ارض اللواء يعيش مصريين غير المصريين الذين يعيشون فى المهندسين او فى نادى الصيد او فى المسلسات او حتى فى العمل
بيوت متلاصفة وعالم كتيرة...زحمة .. اغلبية البشر فى ارض اللواء اطفال .. حتى الامهات اطفال -اسكن فى منزل من 20 شقة اقل الجيران سنا تعدى الستين -_ سؤء التغذية واضح على الجميع... فى عدد الساعات التى مرت بى على كرسى القهوة امام المكانيكى...  لم ارى انسانا واحدا رجلا او سيدة متناسق البنيان  تلاقى الراجل رفيع جدا ولة كرش شكلة غريب ..بشر لم تعرف يوما ان تمارس الرياضة



الحوائط عليها ملصقات  انتخابات الرياسة ... الاغلبة لمحد مرسى وحمدين وابو الفتوح
- انتخبت مين يا حمقه
- ماعيش تذكرة انتخاب ابويا انتخب حمادين وامى انتخبت شفيق واختى انتخبت ابو الفتوح
-ما حدش انتخب مرسى
-كلهم انتخبوا الاخوان فى مجلس الشعب  وحرموا
- وانت لو معاك تذكرة كنت حتنتخب مين
- حمادين طبعا
- هو اسمه حمدين ولا حمادين
- اسمة حمادين ياحج
- انت اسمك حمقه ولا ليك اسم تانى 
- انا اسمى ياسر ولكن اهل الحتة سمونى حمقه

اذن لصلاة العصر والاسطى راح يصلى وحمقه شغال فى العربية ببيراعة رغم انى مش عارف هو بيعمل ايه... بينام تحت العربة على صاجة ويقوم يشتغل فى الكبوت ولكنى حاسس انه عارف هو بيعمل ايه
-بقينا العصر يا حمقه  والعملية باين حتطول
-الفك صعب وبياخد وقت... التركيب قوام قوام ما تقلقش
انا قلت حنخلص بعد صلاة العصر.


      الجو ابتدا يطرى والناس ابتدات تيجى القهوة او الخرابة واتفرشت الكراسى و تليفويون شاسة 40 بوصة شغال على كل قنوات الكون
بتتفرج على التلفزيون يا حمقه
- احيانا يوم الحد
-اشمعنى الحد
- بشتغل من 10 الصبح ل12 بالليل بروح هلكان
- عندكو دش
-مافيش فى ارض اللواء حد عندة دش كلهم عنهم وصلات  الوصلة بعشرة جنية فى الشهر  تجيب عشر محطات غير الارضى

رغم ان ارض اللواء يسكنها ادنى شريحة  من الطبقة الوسطى  الشعبية فكل النساء والفتيات والصبايا محجبات.. وواضح ان بها عدد من المسيحين ملحوظ... فعلى ناصية ورشة المبكانيكى كنيسة ويبعد عنها ايضا جامع ولكن ترى البشر تعيش حياتها... الصبايا بيركبوا عجل... والزوجة تسير مانجه زوجها.



      العمل فى الورشة يتم بدون كلام.. الاسطى محمد وحمقه وزميلة الذى يبدو اصغر سنا واقل خبرة ..يتجه الواحد للاخر فى الوقت المناسب.. الاسطى  يعمل طول الوقت.. والكل عارفين بيعملوا اية ما فيش حد بيلطش
عندما اقتربنا من المغرب  
- جرب يا حاج
- يا محمد جرب انت
- تمام التمام

رغم انى فى الايام الاخيرة لم  اظل خارج المنزل فترات طويلة  الا انى سعدت جدا فقد ظللت خارج المنزل سبع ساعات ...وما تعبتش قوى


      من اكثر الصور التى ظلت تلازمنى بعد ما تحممت وخلدت للراحة.. حمقه او ياسر  الصغير البارع الذى اعتقد انه كان قد اصيب فى صغره بشلل اطفال بسيط ما زال ظاهرا فى حركته النشطة 




هناك 4 تعليقات:

محمد عبد الغفار يقول...

تعالى لك يوم بقى عندنا المصنع هتشوف عالم تانى خالص هيبهرك كما ابهرتنا بيوم الميكانيكى

Unknown يقول...

جميلة ياخليل.... استمتعت بيها وشفت "حمقة" بعينيك... من قريب شوية.... يالل بقي... قوم بالسلامة واحكيلنا ...

Unknown يقول...

هالة

mohamed samah يقول...

ياااااااااااااااااااااة