الخميس، 15 يوليو، 2010

الميكروويف عطلان


                    


        جيت اسخن الفول لقيت المايكروويف كل حاجه فيه  شغاله ، الا انه لا يسخن الاكل ، عطل . كلت الفول بارد من التلاجه ، كسلت اجيب طاسه واولع البوتاجاز وبعدين اخش فى غسيل الطاسه والذى منه . التكنولوجيا اللي دخلت حياتنا فى الخمسين سنه الاخيرة خلتنا اكسل الكائنات على وجه الارض.
         انا عشت ايام معظم اللي سيقرأ الموضوع ده لم يحضرها . كان البيت المقتدر عنده تلاجه خشب موصله على مواسير البيت وفيها سربتينا رصاص (لاحظ رصاص اللي الان يعتبر سام) يتحط عليه كل يوم ربع لوح تلج بقرشين (اغلبكم لم يرى القرش  )  ومترتب انسان يجيب التلج كل يوم قبل الظهر، ويتلف الربع لوح  فى خيشه ويتحط فوق السربنتينه الرصاص وتفتح الحنفية تاخذ منها ميه ساقعه زي الرصاص ، وطبعا دايب فيها رصاص . اسلوب حفظ الاطعمة فى الثلاجة لم يكن معروفا ، يعنى الاكل يطبخ يوم بيوم  ، وكل شئ يشترى يوميا  .وكان فيه شئ اسمه نمليه يتحط فيها الجبنه والحلاوه  والعيش. اول ما دخلت الثلاجة الكهربية مصر كان بعد الحرب سنه 45 . وكانت ماركتها فريجيدير،واصبح اسم الثلاجة الكهربية فريجيدير ، وما زال البعض يستعمل هذا الاسم  للان .
         ماينفعش الواحد يتحمم وقت ما هو عاوز ،لان الحموم وخاصه فى الشتاء يحتاج مياه ساخنه، ولم يكن السخان الكهربي او سخان البوتاجاز قد دخل مصر بعد . فكان هناك ما يسمى بيوم الحموم.  يتولع وابور الجاز -اغلبكم لا يعرفه - ويوضع عليه صفيحه  او وعاء نحاسي اسمه طشت الحموم ، وبعد ان تصل درجه حراره المياه الى درجه عاليه نسبيا يدخل افراد العائلة واحد وراء التاني ‘ النفر منا كان يخرج من الحمام نعسان ، هو مش بالظبط نعسان هو دايخ من وش وابور الجار وبخار الماء الساخن المختلط باول وثاني واكسيد الكربون  يتقلب ينام على طول  . يعنى طوال طفولتنا الحموم يعنى النوم بعدها فورا ، ادمنا اول اكسيد الكربون  . دخلت السخانات في اول الستينات   وبقى الانسان يتحمم وقت ما هو عايز .
          انا بتكلم على بيوت الطبقه الوسطى .فى كل بيت كان مترتب انسانه تيجى فى يوم معين اسمها الغسالة ، وفى الغالب كان اسمها ام محمد ، مهمتها تغسل غسيل البيت كله ملايات وملابس وتنشره فوف السطوح وتلمه  ، وتجندر الملايات (تجندر الملايات دي عمليه معقده جدا اعجز عن شرحها ،شى قريب من المكواة بس بدون حراره ) وتاخذ 50 قرش فى اخر النهار . كان طشت الحموم يملا ماء لغلى الملابس ، وضروري من وجود عصايه الغليه ، وماكنش فيه بيت ما فهوش عصايه الغليه  . اذكر لما جبنا الغسالة الكهربية سنه 75 ، قعدنا نتفرج عليها  حوالى ساعه ونصف .  دلوقتى بتسخن الميه ، دلوقتى بتغسل ، دلوقتى بتشطف ، دلوقتى بتعصر الخ ، الان هناك غسالات بمجففات  ، يعنى ما تكلفش نفسك حتى تنشر الغسيل .
       كان الراديو يوضع فى اعلى مكان فى البيت حتى لا يطوله الاطفال . وكان يوضع فوق السطوح عرقين  خشب يمتد بينهم سلك يصل بالراديووالا مايشتغلش (ايريال ) وكنا ندفع للحكومه جنيه ضريبه سنويه (الجنيه كان يجيب 4 كيلو لحمه ) . حين دخل التلفزيون الابيض والاسود مصر فى يوليو60 والملون فى اول السبعينات كان حدثا توقفت  فيه الحركه فى الشوارع .وكان قناتين فقط الاولى والتانيه ،ولما تحب تعلى الصوت او تغير القناه لابد تقوم وتخبط مشوار لحد التلفزيون .دلوقتى فيه 500 قناه وريمود يقلب فى القنوات ،بالمناسبه انا لما بتقرج على التلفزيون ، وده قليل ، بتفرج على عشر محطات فى وفت واحد ،الريمود فى ايدى وانا حر . نزل السوق منذ فتره اجهزه بهارد دسك ممكن تسجل عليها لحد 800 ساعه ،وممكن ترجع الفقره المذاعه لست ساعات .يعنى جالك تيليفون وانتى بتتفرجى وانشغلتى فى المكالمه تعملى بوز(مش قصدى تعملى منظر ) توقفى العرض، وقمتى بعد كده فتحتى الباب وقعتى تتكلمي مع جارتك ساعه ، ممكن ترجعى وتشغلى التلفزيون ويبدأمن ساعه ما وقف . الان كل شئ وانت قاعد بالريمود تشغيل المروحه اوالمكيف، تشغيل الغساله ،تسخين الاكل وانت فى الشغل ، مجرد رنه موبايل ،حتى الستاير بقت تفتح وتقفل بالريمود .
         انا ما زلت اتكلم عن بيوت الطبقه الوسطى، اذا توفر فى الشارع تليفون عند بقال او اجزا خانه  يبقى ده كرم من عند ربنا ، .العمارة لو كان فيها شقه فيها تليفون يبقى اخر بغدده  ، الان الشقه فيها تليفونات اكتر من عدد افرادها ،ولو خمسه قاعدين سوا يبقى موجود 8 تليفونات وبقت التليفونات تسجل صور وفيديو ورسائل وتويتر وكمبيوتر ، وتصحيك من النوم ،وتقلها على المكان اللى انت رايحه تقولك خش يمين ولف فى الدوران اللى جى وماتمشيش فى الطريق ده فيه حادث معطل المرور ،ولو غلطت تشخط فيك ، الموبايل بقى يعمل كل حاجه ، ناقص يقمع باميه .
        فى اول الستينات كانت حرب اليمن والضباط رجعوا فى الاجازات  معاهم اختراع خطير اسمه مسجل ، نسمع ام كلثوم ونسجلها وبعدين نسمعها  فى اي وقت  ، سبحان الله ويخلق ما لا تعلمون . المسجل كان شي كبير نسبيا قد شنطه سفر صغيره  ووزنه حوالى 10 كيلو ، وشريط التسجيل قد رغيف العيش البلدي وكان اربعه تراك  ، يعنى تسجل عليه اربعه ساعات . بعد بضعه سنوات طلعت المسجلات الصغيرة الكاسيت ، سالت احد الاصدقاء اعمل ايه فى المسجل الداهية اللي عندي قالي حطه امام الشقه الزبال يخده ، للاسف الزبال مارضيش يخده .
     مش حخش فى الفيديو واللهارد دسك وا لاجهزه اللي قد مشط الكبريت اللي بيقولوا مسجل عليها اغاني وافلام عشرات الساعات والكمبيوتر اللي انا  ما بفهمش فيه وانتم بتفهموا فيه اكتر منى . اليوم قرأت في التويتر ان امن الدوله الاردني يقضى بحبس طالب استخدم الماسنجر للمس بالملك ،  سالت الصديق اللي نزل الخبر ايه هو الماسنجرعلشان  ابعد عنه، للاسف ما ردش عليا  .وللان مش عارف ايه الماسنجر  ده، وزعل الملك ليه .
           اذا كان تاريخ الانسان على الارض 24 ساعه  ، فقد عاش 23  ساعه وخمسون دقيقه  على الصيد وجمع الثمار. وتاريخ الانسان المعروف فى العشر دقائق الاخيرة فقط . وفى الخمسون سنه الاخيرة تحققت اختراعات تفوق   مئات المرات ما انجزه الانسان منذ ربط حجرا في عصا لاستعمالها فى الصيد . الغريب رغم كل هذه الاختراعات التكنولوجيه لم يخترع الانسان اّله تخرط الملوخية
            السؤال الذى يلح على دائما ما الذى قدمناه للبشريه من كل هذه الاختراعات .........لا شئ . احنا بنستهلك بس،لا بنخترع ولا بنصنع ، الصين فيها البركه مكفيانا.
كل اختراع او سلعه تدخل حياه الانسان يصبح عبدا لها ، يعنى ينفع الانسان يعيش من غير كلينكس مثلا  ؟؟؟
        المهم اعمل ايه فى الميكروويف العطلان ده ،  واذا قدرت اتغلب على مشكله عدم وجوده ،  قد ايه ممكن يعيش الانسان من غير ما يسخن الاكل اللي طالع من التلاجة ،وهل هناك ضرر من اكل الطعام ساقع .
            يقال ان الانسان سيتحول فى المستقبل الى راس كبيره وإصبع صالح للمسه كليك ، او ضغطه على ريمود ، وتذوى بقيه اعضاؤه.


هناك 9 تعليقات:

Mai_Jeneen يقول...

(الغريب رغم كل هذه الاختراعات التكنولوجيه لم يخترع الانسان اّله تخرط الملوخية.)
ههههههههههههههه, تصدق عندك حق دي مشكلة من مشاكل الطبيخ D:

تاريخ الانسان الحديث المعروف فعلاً عشر دقايق... بس في العشر دقايق دول مش بس أنتج ده كله لأ ده استهلك اكتر من اللي تم استهلاكه في التلاتة و عشرين ساعة و خمسين دقيقة بمراحل... في معلومة سمعتها ان في التلاتين سنة اللي فاتوا بس تم استهلاك تلت موارد الأرض!

كتير مننا فعلاً بقى بيدور في دايرة استهلاكية و الحاجات نشتريها و نرميها و نجيب غيرها و كله في جيب التجمعات الاقتصادية الرأسمالية ... و كتير من الحاجات دي بتبقى زيادة رفاهية... يعني انا كنت عايشة كويس قبل ما يخترعوا البويلر الكهربائي و باعمل الشاي ع البوتجاز دلوقتي لو اتعطل كام يوم حياتي تقف

و المشكلة عندنا احنا كسكان الدول النامية مش بس اننا مش بننتج... لأ ... ده الدول المتقدمة عشان تنتج تيجي تستغل أراضينا و تاخد مواردنا و تيجي تبيعهلنا تاني بأسعار مضاعفة!

في لينك حلو عايزاك تشوفه بخصوص الحكاية دي

http://www.storyofstuff.com

بس انتو شفتوا الدنيا أيام ما كانت بسيطة و رايقة مافيهاش خمسميت زرار و ألف زمارة عربية... أكيد الحياة كانت أحلى بشكل ما

حلوة اوي اوي التدوينة دي بجد... ولذيذة اوي و مهمة جداً...

khalil يقول...

مايا-جين
كتير مننا فعلاً بقى بيدور في دايرة استهلاكية و الحاجات نشتريها و نرميها دة حقيقىواحنا بنشترى الحاجات الجديده بنتصور انها ستضيف لنا بعض السعاده وبعد فتره نجد العكس ونبحث عن حاجات جديده نشتريها .فى الفتره اللى عاش الانسان على الصيد وجمع الثمار بعض الاراء بتقول انه كان اكتر سعاده من انسان اليوم اللى بيلهث وارا احتياجاته المتجده يوميا، كان بيشتغل 4ساعات فى اليوم الرجال فى الصيد والنساء فى جمع الثمار وواضح ان النساء كانت تعمل اكتر ولذلك كانت قياده العائله فى يدها ،اما باقى الوقت ففى الرقص والغناء

mourid يقول...

عرض حلو للموضوع وسلّم لي على عصا البشير

Egy Help يقول...

يمكنكم اليوخم اصلاح الاجهزة الكهربائيه فى توكيلات صيانة فريجيدير بارخص الاسعار وعلى يد مختصيين فى الصيانة والتركيبات

Syanat 3 يقول...

اشترى اليوم غسالات الملابس من ماركة زانوسي وقوموا بصيانة كافع الغسالات فى توكيل صيانة زانوسي والذى يتواجد به ايضا قطع الغيار الاصليه

Syanat 3 يقول...

اتصل الان عميلنا العزيز على مركز صيانة بيكو للاستفسار عن اماكن وفروع المركز المنتشره فى كافه انحاء الجمهورية والمتخصصة فى صيانة الاجهزة الكهربائيه

drhishamazab2011 يقول...

الآن لديهم آلة الخرطالملوخية.

صيانة كريازي يقول...

اعمال صيانة كريازي التي يجب ان تتم للجهاز بصور دورية يجب الاهتمام بالحصول عليها من المركز المعتمد للحفاظ علي الجهاز لاطول فترة ممكنه
للتواصل عبر

http://kiriazi-maintenance.com

Syanat 3 يقول...

الان تمتعوا باعمال صيانة فخمه ومميزة من خلال صيانة فيليبس التى تعمل دائما على ادراك الاعطال التى توجد فى الثلاجات , للمزيد من المعلومات تابعونا فورا
http://www.maintenanceg.com/Philips-Agent-Center.html