الخميس، 22 يوليو، 2010

ميد يوكر

      
         ميد يوكر، مقبول  ،ماشى حاله ،بين بين ،نوت باد ، نص نص ،مستوى b، متوسط الخ  صفه للفرد او العمل الذى  لا يرقى الى الصعود الى منصه التتويج . صفات اغلب البشر . انسان لا هو نابغه ولا هو لامؤاخده جحش ،عمل لاهو شئ ماحصلش ولا هو ثرثره تهمل وتترمى فى الزباله، شئ مقبول ، ممكن يلاقى حد يحبه.
       لي صديق، زميل تخته، من ابتدائي ايام ما كانت الفصول فى المدارس فيها  تخت مزدوجه  ، مش العيال قاعده على الارض .،وكانوا بيوكلونا بيقدموا لنا غذاء  ،ما بنكلوش زيه في بيوتنا  .  زميلي وصديقي - اسمه عزيز- وهو فعلا عزيز عليا  ، بس كان رزل، واحيانا رزل جدا ، كثير الاسئله، كان يسأل السؤال اللي صعب تلاقي له جواب . فى حصه الدين- هو بالمناسبة مولود في عائله مسيحيه- وايامها كان المسيحين يتلموا ويقعد مدرس مسيحي يشرح الدرس قصدي  يشرح الدين. المهم المدرس كان بيشرح قصه سيدنا ابراهيم والحلم او الرؤيا اللي شافها،انه يدبح ابنه -فى المسيحية المدبوح اسحق ولكن فى كتابات المسلمين المدبوح اسماعيل ، القران الكريم لم يحدد ، والاختلاف ما زال قائما للان مين اللي وافق انه يندبح - والمدرس بيشرح ، وكان بيشرح حلو وحماس ، وعند نقطه ابلاغ سيدنا ابراهيم الابن بضروره الدبح  ، وموافقه الابن........... الا وعم عزيز من اخر الفصل وهو مفعم بالبكاء يقول :
  - مش معقول
  -  ايه اللي بتقوله ده يا ولد....روح هات ابوك .

       فى موضوع الدين مقولته الوحيدة : انت ملاكش فضل فى اختيار دينك ، زي ملاكش فضل فى اختيار لون عنيك او نعومه شعرك او لونك او جنسيتك.. انت اتولدت مسلم او مسيحي اوهندى او اسود او اشقر كل ده موروث، انت ماخترتوش . ومالكش فضل فيه.

      ومن يومها، ومن  يوم ما كان عنه 8 سنين ، يقت اى حاجه عنده يامعقول با مش معقول ،وبقت لازمه فى كلامه "معقولة دى " ، بقى رزل وكثير الاسئلة . وكبر عم عزيز وكل الصفات اللي فى اعلى الصفحه حظى بيها ، طول عمره بين بين، مقبول، ماشى حاله،  نوت باد ، نص نص ، عمره ما كان ممتاز او ارتقى  الى منصه التتويج  . وكبر واتجوز واشتغل وجاب عيال كثير ولاد وبنات كلهم للمفارقة من جيد جدا لما فوق  . عندة ابن ميكانيكي يصلح اي حاجه من غير ما يوسخ ايديه وجدع ، وابن تاني غاوي مغنى وانشاد غنى مره فى مسابقه الناس عشقته  وبقي معبود الشباب الحلوين . عنده بنت حكيمه بثدى حقن ايدها خفيفه جدا ، حنينه جدا ، تقول للعيان قوم وانا انام مطرحك ، عنده بنت عالمه ذره تعمل المسخن سندويتشات ، وعنده بنت حكيمه برضه ، تشرب صندوق البيره مايبنش عليها  . عنده ابن خباز ماحصلش ، اكتر من ممتاز ، عنده بنت بتقول انا ما بعرفش اتكلم بس اعرف اكتب ، وبتكتب حلو قوى ، تضحك النمله ، عنده عيال كثير كلهم ناجحين وللغرابه بامتياز. عمره ما زعل حد من عياله او ضربهم وهما اطفال .

      صدق نظريه النشوء والارتقاء بتاعه داروين، بس اختلف معاه فى جزئيه جوهريه.  داروين رأيه ان الانسان اصله قرد او ارتقى من قرد..............عزيز رائه ان الانسان اصله حمار ، عمرك شفت قرد يشتغل  ، القرد دايما بيلعب  . لكن الانسان حمار شغل وعزيز حمار شغل ، يعرف يعمل كل حاجه وعمره ما دخل صنايعى  بيته .نقاش تلاقيه ، نجار مايقولش لا  ، يفصل ويخيط هدومه ولا اجعصها ترزي  ، يعمل كل حاجه تتلبس الا الشربات ، يلزق ورق الحيطه  ،يركب سخان جديد ، يطبخ  ، يعمل عزومه لاربعين نفر يكلوا ويشبعوا ومايفضلش ايشى ، عزيز خبير جيد فى الكميات . ومخترع ايضا ، ويحب الاختراع ،  حقيقي اختراعاته غير قابله للتسجيل،  يعنى اخترع طريقه لتسليك الحوض المستعصي تسليكه . يعمل كل الحاجات دي بدرجه مقبول ، او نوت باد  . البنات اصحاب بناته دايما يقولوله نفسنا نتجوز واحد زيك . هي البنات بتحب الانسان المد يوكر الانسان البين بين  ، المتوسط وتفضله عن الانسان الممتاز او العبقري . علمي علمك .

      شاف مره واحد محترف بيرسم لوح زيتيه قال انا اعرف ارسم احس منه  ، ونزل اشترى العده من بوتشلاتى ورسم عشرات اللوح، طبعا لوح كالعاده بين بين فى رأيه ، مع ان بعض الناس عجبتهم واحتفظوا بيها، المهم فى يوم ، بعد فتره لما كثرت الصور وكان بطل الهواية دي ، جدفهم من الدور السادس فى الخرابة اللي جنب البيت  . جزء من اللوحات نزل واللوحة باينه ، ساعتها اعجب بيها جدا وقال بس ما ينفعش حد يتفرج على اللوحة من الدور السادس .

      الهواية عتده زي البزل(الصوره اللي من الف قطعه ) اول ما يعرف يركبها تبقى اللعبه انتهت ، مش ممكن حيفكها عشان يركبها تاني.  ينقل لهوايه اخرى. يربى عصافير ملونه  يعمل تربيزات بتطبق ، يعمل بدل بحر ، اول من عمل الشورت والقميص لون واحد ويهديها لاصدقائه . بدل ما يروح للواحد منهم وفى ايه تورتايه  ، يهديه بدله بحر. ويفرح جدا لما يلاقى بعض الاصدقاء من الجنسين لابسين هذه البدل  ، رغم مرور اكتر من عشرين سنه  على اهدائها .
        غاوي يصلح اي حاجه خسرانه يصرف عليها 20 حنيه عشان يصلحها بنقسه ، وهى جديده تمنها يمكن20 جنيه  ، مش  بقولك انسان رزل.

      يقرأ الروايه او يشوف الفيلم ويقول دي روايه حلوه او فيلم كوبس تقوله ليه يقولك ماعرفش ، انا النقد عندى عجبتنى او ما عجبتنيش ، نقطه  ، ولا يزيد. يحب يسمع اللي بينظروا ويفسروا لكن هو لا ينظر ولا يعرف يفسر ،غايته الروايه دي ابكتنى  ، حطيت فيها كوز دموع. وفى السياسه ما عندوش غير اؤيد  او اعارض ، تقوله ليه يقولك معرفش ، مش شغلتى . لعب كل انواع الرياضه ، كل العاب المضرب ، وسباحه كره ماء ، سلاح ، بلى . كل لعبه الا كره القدم ماعرفش ابدا يلعبها  ،عقله فى ايديه مش فى رجليه، كل الالعاب دي وماوصلش فى اي لعبه منها الى مستوى اكترمن نص نص او يجى منه ، لم يصعد او يقرب ابدا من منصه التتويج ، ميد يوكر . ما غواش الكومبيوتر ما حبهوش ، ولو كان غواه كان عمل مدونه طبعا كانت حتبقى........ بين بين .

  رغم انه صاحبى وصديقي الا انه رزل جدا فى المناقشه ، ينرفز الكتكوت  ، من اسئلته اللي بعد ما تتكلم ساعه فى شرح وجهه نظرك   باسهاب ، يسألك سؤال ، مجرد سؤال يشلفطها  . مش بقولك رزل .


    من سنتين عزيز صديقى سهى الناس ومات، والناس فرحت قوى ...........لانه مات من غير ما يقول لحد .



هناك 10 تعليقات:

جبهة التهييس الشعبية يقول...

ايه ده؟
:((
وانت اخدتني على خوانة وبعد ما ضحكتني خليتني اعيط
!!!!!!!!!!!!!
:((
اعمل ايه انا دلوقت؟ انا عايزة اشوف عزيز

غير معرف يقول...

غريبه عزيز ده صاحبي انا كمان وراءيي انه عبقري و بنته قالت لي انه في فن الحياه صعد الى منصه التتويج بجداره ربنا يخليك لينا ياخليل اكمل

mourid يقول...

أيها الماكر الكبير، هذه رسالة مني أرجو أن تنقلها إلى عزيزنا: أنت المتوج بيننا. عرفناك وعاشرناك ورأينا أعمالك التي كلها "أعمال فنية" من طبخة على النار إلى خيط في ثوب إلى خط في لوحة إلى كلمة تقال ونص يُكتَب ورأي يذاع. عزيز ده أعظم أصدقائي وأحلى من عرفت ومنه تعلمت الكثير .. وانا وانت وعزيز شخصان لا ثلاثة:::: مريد

shmpongO citizen يقول...

that was one of your best master pieces ya uncle . please do not be that late posting us such precious things sorry for writting in english cause my arabic keyboard is "b3afya" shwaya
we all love you .

غير معرف يقول...

I do not have an Arabic keyboard, but this is one of the best i have ever read, written by a Master mesh bain bain wala average .Love u ya khalil Hala

Reem يقول...

متوج و نص يا عمو
إيه الروعة دي!! بس مينفعش خالص يعني وصف ميديوكر دة. أنا مش عارفة طبعا الكلمة المناسبة. إيه الكلمة اللي توصف حد مشروع حياته إنه يسعد أي حد يهوب منه؟ لأ و مش أي سعادة. دي سعادة طويلة المفعول من اللي تخلي الواحد بعيش طول عمره و هو متأكد إن الدنيا حلوة.
أنا فخورة أن أنا من البنات الشاطرة جدا اللي فضلت مستنية لغاية ما لقت أكتر واحد شبهك و اتجوزته. و على فكرة إنت يمكن ماتعرفش بس ناصف مسميك "زعيم القبيلة". يعني إحنا متوجينك من وراك و من زماااااان.

غير معرف يقول...

I love your comment ya reem,mesh keda bardo,dah abou kol el banat el nas7a elli etrabet 3ala eedo and he showed them the nice part of the Men kingdom :) Hala

Nadia Kamel يقول...

يا عزيز يا عزيز ضربة تاخد لنجليز
قبلاتي واشواقي ....
لعزيز ده اللي كأني يا ربي اعرفه من زمان..
على فكرة انا شفته قريب
كان بيحاول يخبي ابتسامته
هو ماماتش :)
ده بس زهق مننا
ومن رزالتنا
فراح يدور على هواية تانية
يمكن الكتابة

Mai_Jeneen يقول...

عارف يا عمو رغم إني معرفكش من فترة طويلة بس فعلاً فعلاً عندهم حق البنات اللي قالوا نفسهم في واحد زيك في حاجات كتير

نفسي انا اعرف ايه سر الحاجات دي, ما هو لو نعرف السر كانت ناس كتير طبقته وعاشت مبسوطة :)))

ربنا يكرمك و يحفظك يا عمو

شيماء ابوبكر يقول...

حلوة جدا جدا .. الله يرحمه ..