الثلاثاء، 31 أغسطس 2010

حوار اّخر الليل


-   هى هربت  من جوزها عشان تسلم ؟
-   لأ  هربت عشان تروح الأ زهر..
-   إنت كنت فين لغاية دلوقتى ؟
-   كنت بسمع الدرس ..
-   مين إللى ببقول الدرس ؟
-   موّلانا
-  يعنى هى أسلمت عشان تهرب ؟
-  لا هى هربت عشان تروح الازهر..
-  طيب ما كانت أسلمت من غير ما تروح الأزهر ؟
-  موّلانا قال ماينفعش…..
-  ليه ؟
-  عشان الواحد ضرورى يهرب عشان يروح الأزهر
-  هو مين إللى جاب التعميرة ؟
-   الظابط …
-  ومين إللى كان بيرص ؟
-   موّلانا..
-  يعنى انا أما أحب أهرب ضرورى أروح الأزهر ؟
-  تهربى لية مانتى عايشة كويس ؟
-  هو إللى بيهرب مش عايش كويس؟
- طبعا …….طيب عاوزة تهربى ليه
-  عشان أروح الأزهر  .
……………….

-  قصر الكلام يعنى الواحد  ما ينفعش  يسلم من غير ما يروح الازهر؟
-  لأ ماينفعش موّلانا قال كدة….
-  بس سيدنا عمر أسلم من غير ما يروح الأزهر …
- مولانا قال ما ينفعش ….لازم فى الأزهر..
-   طيب ما ينفعش الواحد يسلم من غير ما يهرب ؟
-  لأ…. ماينفعش مولانا قال كده ..
-  إنت إتسحرت ؟
-  ايوة عز بيه… جاب السحور
-  هو كان موجود ؟
-  طبعا….مولانا عايش فى حضنه
-  جاب  اية ؟
-  كنافة وقطايف ……وهو اللى كان بيطقتق ويولع....
-  ومرات مولانا فين  ؟
-   راحت الأزهر
-  والظابط قال إية ؟
-  كان مونون على الأخر……. جايب تعميره معتبرة ..
……….

-  هو ما فيش حتة الواحد ممكن يهرب فيها غير الأزهر؟
-  لأ مافيش …….مولانا قال كدة
-  وبعدما رجعوها حنيموها مع جوزها غصب عنها؟؟
-  مولانا قال ما ينفعش تنام مع جوزها ….لا غصب عنها…… ولا بخطرها ..
-  طيب وعملتوا اية؟
-  إتفقنا نروح نهتف ضد انها تنام مع جوزها…..وضد البابا…..
-  وإية دخل البابا فى الموضوع؟
-  أصل جوزها صاحبة .. وقالة إنها هربت منه……….ومش عايزة تنام معاه…..
-  والبابا عاوزها تنام معاة غصب عنها ………….  لية ؟
-  مولانا قال كدة……أصل ما عندهمش طلاق…
-   عشان كدة هربت ؟
-  لا عشان كدة أسلمت .
- هو ما ينفعش الواحد يسلم من غير ما يهرب ؟
-   لا مولانا قال كدة ..
-   والعالم اللى عاملة مظاهرة فى الكنيسة ليه ؟
-  عشان عوزينها تنام مع جوزها
-  قدامهم ؟؟؟؟؟؟؟؟
-  معرفش واللة ........روحى إسئلى البابا...
..............


-  طيب قوم نام …….
-  هما العيال  ناموا ؟
-  باين عليك مش ناوى تروح الشغل بكرة ؟
-  لأ حروح الجامع .
-  ناوى تصلى ؟؟؟
-  قولى يا باسط ………عشان ما تنامش مع جوزها.
- طيب وإنتم مالكم…. زعلانين لية؟؟؟؟
-  عشان الحكم لغى الجون ..
-  هى قريبة حسن شحاتة ؟
-  مولانا بيقول ما ينفعش تنام مع جوزها.. ما ينفعش تنام مع جوزها..
……………..

-   على فكرة نسيت أقولك ………….أنا ناوية بكرة أروح الازهر  .
-  تسلمى ؟
-   لأ أهرب



………………………………..

الأحد، 29 أغسطس 2010

لا للمحاكمات العسكرية للمدنين




لا تكتفي الدولة بتشريد وإذلال وقتل العمال بدم بارد نتيجة سياساتها المعادية لهم، بل تسعى أيضا لإسكات أصواتهم باستخدام أكثر الأساليب قهرا بتقديمهم للمحاكمة العسكرية التي لا يتوافر بها أي ضمانات أو حقوق دفاع.

يحاكم الآن ثمانية عمال من مصنع 99 الحربي (شركة حلوان للصناعات الهندسية) أمام المحكمة العسكرية بتهم إفشاء أسرار عسكرية والامتناع عن العمل والاعتداء بالضرب على اللواء محمد أمين رئيس مجلس إدارة الشركة، كان العمال الثمانية قد تم القبض عليهم مع 17 آخرين من زملائهم عقب اعتصام عمال المصنع يوم 3 أغسطس الجارى احتجاجا على انفجار أنبوبة نيتروجين ( غلاية ) داخل المصنع مما أدى إلى وفاة العامل أحمد عبد الهادي(37 عاما) وإصابة ستة عمال آخرين بجروح.

وعلى أثر تلك الاحتجاجات سعت أجهزةالدولة إلى ترهيب العمال وتأديبهم لتجرأهم على الاحتجاج فاتخذت ضد 25 عامل إجراءات تحقيق تلاها إحالة 8 من عمال المصنع إلى النيابة العسكرية تمهيدا لتقديمهم لمحاكمة عسكرية رغم أنهم عمال مدنين ورغم أن الأمر يتعلق بنزاع عمل تحكمه القوانين العادية.

وقامت النيابة العسكرية يوم السبت الموافق 14 أغسطس بحبسهم أربعة أيام على ذمة التحقيقات ثم تجديد حبسهم مرة أخرى يوم الثلاثاء الماضى، ثم تحويلهم للمحكمةالعسكرية التى بدأت أولى جلساتها الأحد 22 أغسطس ليتم تأجيل المحاكمة إلى الأربعاءالمقبل، كما رفضت النيابة العسكرية إعطاء المحامين صورةملف القضية للإطلاع عليه، وتحددت جلسة مفاجئه سريعة للمحاكمة.

وبالرغم من ادعاء وزيرة القوى العاملة عائشة عبد الهادي دائما في جميع المحافل بأنها تقف بجانب حقوق العمال، إلاأنها لم تحرك ساكنا إذاء ما يحدث للعمال، هذا بالإضافة للصمت المعهود من اتحاد عمال مصر و تقاعصه عن الدفاع عن حقوق العمال والتصدي لما يحدث لهم من انتهاكات.

ونعلن نحن المتضامنين مع العمال رفضنا لتقديم عمال مدنيين لمحاكمة عسكرية، وتطالب بإحالة القضية للقضاء العادي، وتطالب أيضا بمحاكمة المسؤلين عن موت العامل ومحاكمة إدارة المصنع التي تسببت في أكثر من انفجار وإصابات ووفيات بين العمال بسبب الإهمال، ونحذر أن تكون المحاكمة صورية وحكمها جاهز سلفا، ونعلن بدأ حملة تشهير واسعة محليا ودوليا ضد المسؤلين عن تلك المذبحة

وقع البيان  شكراhttp://www.gopetition.com/petition/38652.html

الخميس، 26 أغسطس 2010

طباخ ألملوك والأمراء




          فى نهاية ربيع 1949 تزوجت أخت عزيز وقررت الأسرة عمل الفرح فى البيت . أيامها ماكانوش إخترعوا أفراح الفنادق أو القاعات إللى بتتأجر فى ألنوادى .  أسرة عزيز تسكن ألدور ألارضى وولهم الحديقة  ، وفوقهم دورين تسكنها جيران طيبين ، زمان كان كل ألجيران طيبين  ، واكتر من الأهل . الفرح يتعمل فى الدور الأول والحديقة  ، والدور التانى تلبس وتتذوق فيه العروسة وأهل البيت ، وفى التالت ...البوفيه . جابوا طباخ  لإعداد الطعام ، وده مش أى طباخ .  طباخ الأفراح يبقى عنده عدّة ، عبارة عن حلل قطر الواحدة 40 سم وارتفاع 90 سم ، و موقد يعمل بالخشب ، وثلاجة خشب حجمها متر مكعب، تحتاج  3 الواح تلج يوميا ، وأدوات أخرى كثيرة . جاء الطباخ ومساعداة قبل الفرح بثلاثة ايام وحط عدّتة فوق السطوح . كان زمان كل شقة ليها أوضة فوق السطوح إسمها أوضة الغسيل - جاب سيرتها علاء الاسوانى فى رواية عمارة يعقوبيان -  فيها مياة وإضاءة .  فتكوا فى الكلام ، الطباخ كان فى وقت من الأوقات شغّال عند الأميرة شويكار إللى إتجوزها الملك فؤاد وإستولى على معظم ثروتها قبل ما يبقى ملك  ، وإتجوز بعدها نازلى أم الملك فاروق إللى إعتنقت المسيحية على كبر . كان طباخ درجة أولى ، وتخصص فى الافراح والعزايم الكبيرة . كان رغاى جدا ،  ما يبطلش كلام وحكاوى عن كل اللى إشتغل عندهم . المهم الطباخ ومساعداة قعدوا ثلاثة ايام يعملوا الأكل ل120 نفر، حمام مخلى،8 رومى، خروفين ‘ محاشى ، لحمة باردة،  حلويات ،أرز بالخلطة ،سمك بالمايونيز . كل دة  اتعمل فوق السطوح ، ثلاثة ايام بليلتين قاعدين يشتعلوا ،ومين قاعد  معاهم ……..صديقى عزيز . تلاثة ايام بلاياليهم عايش مع الطباخ ومساعداة .

        أيامها كانت غير الأيام دى، كانت سيدات الطبقة الوسطى ،أو سيدات الاسرة بتلبس على النمط الاوربى، فى الافراح فساتين سوارية عارية الاكتاف  . وكان الأختلاط تام الستات والرجالة فى مكان واحد ،إستمعوا للمنولوجست ثريا حلمى وهى بتغنى :
فتح يبنى فتح شوف مين بيكلمك..........
دنا واد مدردح وفتوة حتتك...........
وشاهدوا الراقصة هاجر حمدى .. فى هذا الوقت لم ترى سيدة او فتاة من الطبقة الوسطى او فى العائلة محجبة  ، ناهيك عن منقبة . بعض السيدات المتقدمات فى السن كانت تضع طرحة خفيفة على رأسها . الرجال يلبسون بدل بيضاء شار كسكين او بدل سهرة والطربوش ، كان منظرالطربوش مضحك . الشباب  إبتدئ يتمرد على الطربوش  . ضباط الجيش كانوا يحضروا الأفراح ببدله التشريقة . واذا  كان العريس  ضابط يتزف  بالبدلة الرسمى ومعلق السيف  فى وسطه . الفرح كان يبتدئ عشرة بالليل، والبوفيه واحدة بعد منتصف الليل وييتهى فى  الفجر.

        عزيز عرف من  الطباخ   حواديت ملهاش أول ولا أخر ……. منها ان أخو شويكار ضرب الأمير فؤاد بالرصاص وأصابة بعاهة مستديمة فى الحنجرة .  الملك فؤاد من أثرها كان لا يستطيع الكلام ببساطة .  وإذا إتكلم صعب حد يفهمه . وبعد طلاق شويكارمن فؤاد إتجوزت وخلفت الأمير وحيد يسرى ولطيفة هانم إللى إتجورت أحمد حسنين باشا  رئيس الديوان الملكى ، وحواديت اخرى كثيرة عن الناس إللى اشتغل عندهم  . الأهم  عرف من طباخ الملوك والأمراء ، زى ما كان مسمى نفسه  ، أهم أسرار الطبخ ، وكان يبالغ وبقول الأكل مش بطعمه الأكل بمنظره وبشكله ، العين هى اللى بتآكل……. مهما كان الأكل معمول كويس ومتقدم وحش يبقى أى كلام .

        ألنار ، ألحرارة هى اللى بتسوى الأكل  . أى شى بيتاكل يجب الا يسلق ، إلا البيض ،  أى أكل يتسلق يفقد أغلب  الاملاح إللى  بتديلة الطعم ،  بتذوب فى مية السليق . إطبخ  الأكل على البخار او فى الفرن. طباخ الملوك والأمراء حط العظم الى طالع من تشفيه اللحم والفراخ والأجنحة  وما شابة مع قليل جدا من المياه فى قاع  الحلة الاسطوانية إللى إرتفاعها 90 سم وبعد ذلك وضع  عروق اللخمة الباردة ،ثم اللحم البقرى ثم البتلو ثم الرومى فالفراخ ، ثم حلل المحاشى، وبغطاء حيد ونار هادئة كلة يستوى على البخار ،وإللى خد حقة فى السوا يطلعة .

        طيب نعمل اية فى البيت ، والطبيخ على القد  . اللحوم فى الفرن ، او نضع مصفاة مقلوبة فى قاع الحلة وقليل من الماء بحيث لا يصل  الى  اللحم . …….و نعرف استوت ازاى ؟؟؟ ……فية مقياس حرارة عبارة عن عمود مدبب يصل الى مركز كتلة اللحم ويبين  الحراره . اللحوم تعتبر إستوت عندما تصل درجة الحرارة فى مركزها إلى  70 مئوية ، الفراخ عند 80مئوية . وهناك طريقة اخرى اسهل، الشيش إللى بيعملوا بية التاووك ، خيزران  رفيع يغز فى القطعة الى المركز ثم يرفع ، اذا المكان فرز سائل تبقى... لسة  ، اذا ما طلعش سائل تبقى خلاض إستوت .   أهم شئ معرفة وقت النضنج بالضبط ، أى وقت زائد ينشف اللحم ، ويبان كانة نىّ، و لو سيتة أكثر من أللا زم…… لا يؤكل . الكبدة مستوية قبل ما تشم  النار ، وكل وقت يمر عليها وهى على النار تزداد صلابة  . على العموم كيلو اللحم يحتاج ساعة فى الفرن المنزلى فى درجة حرارة 200 ،  لو فخده بتلو 10 كيلو صحيحة ممكن تاخد 6 ساعات…… الخضار على البخار سوتية ، وإذا كان بالصلصة فأقل كمية من المياه..... وارفعه من على النار وهو نىّ، ما تقلقش …….وآنت بتكله   حتلقية مستوى .

      ماجبناش سيرة التدبيل ..........لاتضع الملح على اللحوم بأنواعها أثناء إنضاجها، لأنة يأخر الانضاج وبيقولوا عليها بيجرمز اللحم . بعد ما يستوى اللحم إبدأ فى عمل الدرسينج . إذا طبختها  فى الفرن حتلاقى بعض السوائل البنية، خذها وضع عليها فلفل اسود من المطحنة مباشرة ، الفلفل السابق طحنه  لا يعتبر فلفل اسود . ممكن قليل من الملح، الحم البقرى مالح لا يحتاج الى ملح  تقريبا ، الفراخ تحتاج الى ملح أكتر.   يقطع اللحم إلى شرائح عمودية على اتجاه الأنسجة  ثم تدهن بالدرسنج  ، ممكن إذابة ورقة جيلاتين مع الدرسنج ، يتعطى لمعة مستحبة . من أهم قواعد الطبخ أن لا يغلب او يظهر أى طعم مميزعند التناول ........ ورقة واحدة من ورق اللورو  ، حب الهال  5 فصوص فقط، ،  جوزه الطيب رشة خفيفة . إذا ميّز  المتناول أى من هذة الاضافات فقد فشلت . الأكل الطيب لا يعرف المتناول لية هو طيب .

     طيب عاوزين نأكل فتة ولحمة مسلوقة نعمل اية  . أسلق القطع التى لا تؤكل  للمرق ، اما اللحم فعل البخار . اللحم هو عضلة فى الذبيحة ، العضلة اللى بتشتغل كثير تبقى عصية فى الأكل . أطرى لحم فى الذبيحة هو الفلتو العضلة إللى شايلة الكلوة  ما بتشتغلش تقريبا ، إلا لما الثور، لا مؤاخذة ، يجيله مغص كلوى …… وده عمره ما يحصل….. لأن الثور ما بيرمرمش….. أما تعمل كباب حلة ستحتاج للإنضاج وضع  قليل من المياه  ، لا تضعها مرة واحدة ، ضع  شقشاق مية  ،تسمع اللحمة بتشقشق... مش بتغلى ……….. اذا حبيت تعمل شواء، فية ناس عنها مفهوم خاطئ إنها ترقد اللحم فى البصل أطول مدة ممكنة ، ودة خطأ فاحش . إنت بتشوى اللحم وترمى البصل المتشبع بكل االاملاح المعدنية الموجودة فى اللحم . الطريقة الصحيحة على عهدة طباخ الملوك والأمراء - لو عايش كنت حطبت الرابط بتاعة وقلتلك دوس هنا - اقطع البصل قطع صغيرة وتبله ، وقبل وضع قطعة اللحم على الفحم مباشرة ، غمسها أو عصها بالبصل المتبل بالملح والفلفل الاسود فقط . الكفتة يجب أن تكون دسمة.....25% دهن وإذا عاوزها طرية أفرم عليها قطعة فشّة ، وعشان متقعش من السيخ كتر لها الملح شوية.

      هذة بعض  المعلومات اللى عرفها صديقى عزيز من طباخ الملوك والأمراء  فى دورة مطبخيه لمدة ثلاثة أيام بلياليهم فوق سطوح منزلة بالعباسية ، فى بداية صيف 1949، وكانت دورة ناجحة ،  والاستفادة منها عالية جدا........
 
         لم يحضر صديقى عزيز زفة  العروسة ، ولا حضر افتتاح البوفيه   ،ولا سمع ثريا حلمى ولا شاف رقص هاجر حمدى ………………لانة راح فى سبات عميق .


الأحد، 22 أغسطس 2010

فيديو يسخر من امل مصر

   اذاعت احدى محطات التليفزيون فيديو يسخر من الشباب الايجابى الذى اهتم بالشأن العام واشترك فى الفعل السياسى وحقق نجاحات ملحوظة ، تحت عنوان………. "ازاى تبقى مناضل"
        فاجأت هزيمه 1967 الامة العربية ،والتى ادت الى احتلال كل الارض الفلسطينية وسيناء والجولان . سقطت كل الانظمة العربية  التى احتكرت العمل السياسى  وحرمته على  الجماهير .  وحين القى السادات خطابة مبررا تأجيل الحرب بسبب الضباب ، دعا طلاب جامعة القاهرة لمؤتمر موسع،وامتلأت جدران الجامعة بالملصقات ومجلات الحائط وتم تشكيل اللجنة الوطنية العليا  من محمد عبد الله  وسهام صبرى قلب الحركة الشجاع واحمد بهاء شعبان وغيرهم وانتخب احمد عبد الله رزة رئيسا، و طالبت بإعداد الجبهة الداخلية لحرب تحرير شعبية طويلة ، وتسليح الجماهير  ، وفرض ضرائب على الدخول الكبيرة ، و دعم الثورة الفلسطينية .  جرت مفاوضات بين الطلبة وقادة مجلس الشعب . والقى السادات خطابا قال فيه "الطلاب طيبين ولكن هناك فئة منحرفة يشتموا اساتذتهم وبيشربوا سجاير،اولاد على بنات مسخرة وقلة ادب  انا ما اقعدش ابدا مع رزة…."يقصد احمد عبد اللة .
      كون الادباء لجنة تناصر حركة الطلبة ضمت رضوى عاشور والشاعر احمد عبد المعطى حجازى وعبد الرحيم قاسم واحمد الخميسى وعز الدين نجيب وآخرين ودعت لمؤتمر موسع لمناقشة الاوضاع  . وانضمت الصحفية صافيناز كاظم للاعصام مع الطلبة فى جامعة عين شمس. وبدأت المياة الراكدة فى التحرك.
        فى 24 يناير خرج الطلبة من الاعتصام واحتلوا ميدان التحرير طوال الليل والشعار المرفوع" اصحى يا مصر " وبعدها بأيام انشد امل دنقل رائعته   " الكعكة الحجرية"

أيها الواقفون على حافة المذبحة

أشهروا الأسلحة!
سقط الموت، وانفرط القلب كالمسبحة.
والدم انساب فوق الوشاح!
المنازل أضرحة، والزنازن أضرحة،
والمدى.. أضرحة،
فارفعوا الأسلحة
واتبعوني!
أنا ندم الغد والبارحة
رايتي: عظمتان.. وجمجمة،
وشعاري: الصباح

           بعد زيارة السادات للقدس وتوقيع اتفاقية السلام مع اسرائيل . وانهزم من انهزم . تكونت لجنة الدفاع عن الثقافة القومية ممن بقى متمسكا بمقاومة اسرائيل وعدم التطبيع معها….. لطيفة الزيات  و رصوى عاشور وأمينة رشيد وسيد البحراوى  ومحسن عوض ومحسنة توفيق وغيرهم وأصدروا نشرة المواجهة، وأخذت اللجنة تزوى الى ان توقفت بوفاة لطيفة الزيات . مرت مصر بمرحلة جزر سياسى عميق. كان الندوة السياسية التى تدعو اليها اللجنة يحضرها 8 افراد، فتتحول الى دائرة حوار  . وقفة للاعتراض على عدوان اسرائيلى امام جامعة الدول العربية لا يحضرها اكثر من 50 فردا  . نفس الوجوه المسنة والغائب يا اما مريض يا اما مات. 
       بانتصار المقاومة اللبنانية سنة 2000 ، والانتفاضة الفلسطينية 2001 ،تكونت لجان دعم الانتفاضة واشترك فيها جيل جديد شاب و عفى. ظهر ذلك جليا فى اول مظاهرة تدعو اليها لجنة مناصرة الانتفاضة الفلسطينية، حيث حضر المظاهرة فى ميدان التحرير فى 10 سبتمبر 2001 اكثر من 3000 فرد اغلبهم من الشباب والصبايا .وتوالت الحركات والتحركات وانخرط عدد من الشباب والشابات فى العمل السياسى بعيدا عن الاحزاب القديمة حتى فوجئنا بالأعداد الضخمة من شباب 6 ابريل والغد فى مظاهرات المحلة . طرح جديد انجنتة مصر الولادة . وفى حادثة اغتيال الشهيد خالد سعيد ووقفات الحداد الصامتة بآلاف للشباب وتكراره كل اسبوع فى اكثر من مدينة ، كانت الحركة السياسية فيها بائسة .     تدفقت دماء جديدة واعية الى الشارع حاملة قضايا الوطن وأحلامه ، الامر الذى اربك النظام ولم يعد يدرى ما يفعله امام طوفان الشباب والصبايا الذين انخرطوا فى الشأن العام .
        رصدت الاموال لإنتاج ما يسخر من هذه النوعية من الشباب وكان اولها فيديو " ازاى تبقى مناضل " وهدفه الاول ان لا يكون لهؤلاء الشباب هوية.  سخروا من الكوفية ، والشباب والشابات لا يلبسون الا الكوفية الفلسطينية تعبيرا وإعلانا عن هويتهم وانتمائهم للقضية الفلسطينية ،سخرت من الصبايا الاغلبية الفاعلة والمشجعة  فى اى تحرك او وقفة احتجاجية ، سخرت من الكتب،  سخرت من كل ما هو طيب وهادف . وخاصة الوقفات الاحتجاجية والمظاهرات.
      الاسلاميون بيربوا ذقونهم ويلبسوا باكستانى للإعلان عن هويتهم، الفنانين بيربوا شعورهم  ويعملوا سكسوكة للإعلان عن هويتهم كفنانين. لماذا لا يعلن  المناضلون الذين يحملون الهم العام  ويلبسوا الكوفية الفلسطينية للإعلان عن هويتهم كمناضلين ، لن يتخلوا  عن الدفاع عن قضاياهم ، كما لن يتخلوا عن الكوفية الفلسطينية كشعار ، مهما سخر منهم النظام وعملاءه .
     وكلمة للى عمل الفيديو :   بعينك……… ،احلى ما فى مصر شبابها وصباياها اللى هدفك السخرية منهم ، دول شرفها اللى حامل حلمها ……وحتشوف حيعملوا اية……..وحينجحوا….


الخميس، 19 أغسطس 2010

ادى اللى كان

 
 
       أبو عزيز يملك قطعة ارض فى منطقة قريبة من القاهرة اّلت اليه بالميراث ، يقوم بزراعة جزء منها ويؤجر او يشارك الفلاحين فى زراعة  الباقى. كل يوم جمعة  يذهب الاب  يشق على الزراعة، وأحيانا يأخذ عزيز  معاة . فى صيف عام  1942 اشتدت غارات الالمان على معسكرات الجيش الانجليزى فى العباسيه ،الحى الذى تقطنه عائلة عزيز  . قرر الاب الانتقال بالعائلة الى العزبة .
     العزبة تبعد عن اقرب قرية ب 2 كيلو متر., واعرض مدق يصل اليها لا يزيد عرضة عن 2 متر . تتوسط الارض ساقية خشبية على بئر مياه ، بجوارها شجرة كبيرة،يعيش تحتها اعرابى عجوز جدا ، وحولها مخزن متسع . وعشره بيوت لفلاحى العزبة . سكنت الأسرة القاهريه المخزن حيث الحمام عبارة عن دروة على حفره ، والمياه من طلمبة يدوية وسط مبانى العزبة ، والإضاءة لمبة جاز نمرة 5 . والمبانى كلها من الطوب اللبن مسقوفة بجريد النحل وعليه حطب عيدان الذرة الجافة وقود الفلاحين  . ما عدا المخزن فكان مسقوفا بعروق خشب تحت الجريد .
           عزيز كان بياخد تعريفة (نصف قرش ) مصروف فى اليوم، وأجرة الفلاح مقابل عمل من صباحه ربنا لبعد العصر خمسة  تعريفة . بيت الفلاح عبارة عن حجرة واحدة 9 متر مربع يشغل نصفها فرن مبنى بارتفاع متر تقريبا تنام الاسره علية.  وإذا ربنا كرمهم يبقى عندهم حصيرة ييناموا عليها .دة كل الاثاث اللى بيملكة الفلاح. االعيلة كلها بتنام فوق الفرن وما تسألنيش  يجيبوا عيال ازاى  .الوحيد اللى كان متنطق  شوية كان ناظر العزبة، عنده حرام بجانب الحصيرة يطلعه لما يجئ البية يشق على الارض والزراعة ، ويفرشهولة تحت الشجرة  . وبيقبض جنية كل شهر . فقراء ،مرضى . العزبة يعيش فيها 50 انسان محدش  فيهم بيفك الخط . يأكلون عيش ذرة ومش (سائل كاوى بة بعض قشور البرتقال وملايين الديدان )يفطروا مش ويتغدوا مش واذا ايتعشوا  بردة مش،وفى بعض المواسم يجدون بجانب المش بعض الحشائش اللى بتطلع شيطانى بين الزراعات (سريس وجعضيض وإذا ربنا كان راضى عنهم يجدون بعض نبات الرجله )
    -   الذره غلى…… بقى القمح ارخص منة ..
    -  طيب ما تخبز قمح ..
    -  ماينفعش القمح بيوكل  …. الدرة بيصد..
   يتذكر عزيز ،والى الان، المرأة فى الريف ، حين يثار موضوع عمل المرأة والداعيين لبقاها فى المنزل وعدم نزولها للعمل. المرأة فى الريف تعمل ضعف عمل الرجل.فبالإضافة لعملها بالأجرة( قرشان فى اليوم وليس قرشان ونصف كالرجل)فإنها تقوم بالعجين والخبيز و لم الجلة(روث البهائم )وتقرصها مع قش الرز وتجفيفها على كوم السباخ ونقلها لاستعمالها فى احماء الفرن وملا المية ..الخ . طول النهار وهى تعمل،لم يرى عزيز فلاحة  ممتلئه . الجفاف صفة المرأة قى الريف.
     طول الاجازة وأسرة عزيز الهربانة من القاهرة ومن غارات الالمان قرفانة من العيشة ، عزيز وحدة سعيد  بالمكان  ، وبيشارك اطفال الفلاحين فى ردم الزريبة وتحميل الحمار بالسباخ .
   -  انت تقعد فى الظل  وحجبلك الفلوس لحد عنك يا بية…… بس اصبر على شوية..
   - لا يا سيدى اقعد  انا فى الشمس ..   وناولنى  الايجار ولا سيبها…….
عزيز ابن العشر سنوات ادرك ما لم يدركة الاب……….عزيز حب الفلاحين.

       فى 23 يوليو قامت الثوره و استولت   على السلطة بسهولة . بسبب التحلل الذي اعترى النظام الملكي ، وعدم قدرة أو رغبة المعارضة  والتنظيمات السياسية على الفعل.  اصدرت الثورة قانون الاصلاح الزراعى فى 9 سبتمبر 1952 بتحديد الملكية الزراعية ب200 فدان و300 فدان للأسرة ، وعدم طرد الفلاحين من الاراضى المستأجرة  ،وتخفيض ايجارات المنازل 35%  . ورغم ازمة 1954 وانتهائها لصالح الجانب المعادى للديمقراطية ، ورغم الحكم على 6 بالإعدام وحبس 861 من جماعة الاخوان المسلمين فى حادث محاولة اغتيال جمال عبد الناصر، فالشعب كان راضيا .  العدوان الثلاثى الدى استهدف البلاد،بسبب:
. 1-توقيع مصر اتفاقية مع الاتحاد السوفييتي تقضي بتزويد مصر بالأسلحة المتقدمة و المتطورة بهدف تقوية القوات المسلحة لردع إسرائيل،
2. دعم مصر للثورة الجزائرية ضد الاحتلال الفرنسي و إمدادها بالمساعدات العسكرية مما أغضب فرنسا و حرّضها على المشاركة في العدوان.
3. تأميم قناة السويس الذي أعلنه الرئيس جمال عبد الناصر في يوم 26 يوليو عام 1956.
     وخروج مصر منتصرة بدعم العالم :
• معارضة الاتحاد السوفييتي للعدوان الثلاثى.
• تأييد الاتحاد السوفييتي لمصر و تهديده بالتدخل العسكري لوقف العدوان.
• وقوف الشعوب العربية إلى جانب مصر.
• معارضة الولايات المتحدة الأمريكية مبدأ استخدام القوة .
• تنديد هيئة الامم المتحدة بأعمال الدول الثلاث في مصر .
      وبانسحاب القوات البريطانية والفرنسية فى ديسمبر 1956 وانسحاب القوات الاسرائيلية فى مطلع عام 1957 ووقوف قوات الطوارئ الدولية.على الحدود بين مصر وإسرائيل   ،تدعمت سلطة الثورة . وكان خطاب جمال عبد الناصر فى جامع الازهر محرضا على المقاومة والقتال ومشاهد البطولة فى بور سعيد ومعركة البرلس البحرية حين فجر الفدائى العربى اللاذقى المسيحى جول جمال  بطربيدة البحرى بارجة فرنسية ، وإضراب العمال العرب ومقاطعتهم خدمة وتموين سفن الدول المعتدية من اهم عوامل الانتصار . ا
      ازدادت  شعبية جمال عبد الناصر والخط السياسي الذي ينتهجه ، وازدادت هذه الشعبية أكثر بعد إعلان قيام الاتحاد العربي بين سوريا ومصر كنواة لدولة عربية متحدة من المحيط الى الخليج ، وتشجعت كل حركات التحرر  الوطنى فقامت ثورة العراق فى 14 يوليو 1958 وساعدت مصر الثورة الجزائرية ، وحركات تحرر اخرى عربية وافريقية . الدور البارز الايجابى والمشرف الذى لعبته مصر فى مؤتمر باندونج ومؤتمر دول عدم الانحياز  . قيام ثورة اليمن فى 1963  . ……مد ثورى …..كل يوم ثوره، وكل ساعة خبر يشرح القلب  ، وذلك رغم وجود مئات من اشرف المناضلين المصريين  من الشيوعيين  والإخوان فى المعتقلات ، فى الوحات وأبو زعبل ،تجاوزنا وبصبنا الناحية الثانية وفرحنا بالانجازات .
    صدور القرارات الاشتراكية وتامييم كل شى لصالح الشعب ومنع طرد العمال من اعمالهم .
    فتح تبدا النضال المسلح فى اول يناير 1965 .
   بن بلا وجميلة بوحريد وانتصار ثورة الجزائر..
   حركة مناهضه العنصرية فى امريكا  ومالكم اكس وكارميكل   جيفارا وكاسترو وثورة كوبا
   فيتنام  وهوشة منة 
   صلاح حسين و لجنه تصفية الاقطاع
طول ما انت ماشى تقابل مناضلين من كل انحاء العالم احتضنهم النظام المصرى ،من كوبا  وفيتنام ومناضلي فتح والجبة الشعبية والمغرب وإفريقيا  ……. سنوات  الانتصار.. وانتصارات  يومية .
       الصحافة فيها صلاح حافظ وحسن فواد  ومشيل كامل، وتلاقى الشعراء صلاح جاهين وعبد الصبور وحجازى  والسينما بتصرف عليها الدولة ورئسها نجيب محفوظ ومصلحة الفنون رئسها يحيى حقى ، والثقافة الجماهيريه  ورئيسها التقدمى سعد كامل والعالم رئس هيئة المسرح . التقدميون يحتلون اغلب المراكز الثفافية.    حياة تشفى النفس  وتملأ القلب والعقل ،وتفرح القلب الحزين .
                 
     فى 14 مايو 1967 تقرر رفع درجة الاستعداد للفوات المسلحة الى درجة الاستعداء الدائم .
     فى 15 مايو تحريك جزء من التشكيلات الى سيناء حيث تشير المعلومات ان اسرائيل قد بدأت بالفعل فى حشد قواتها امام الجبهة السورية .
    فى 16 مايو1967ارسل الفريق اول محمد فوزى رئيس هيئة اركان حرب القوات المسلحة الى الجنرال ا.ريكى قائد قوات الطوارئ الدولية يطلب سحب القوات.
   فى 18 مايو 1967 انسحبت قوات الطوارئ الدولية .
   فى 22مايو 1967اعلنت مصر اغلاق مضيق تبران امام السفن الاسرائلية المتجهة الى ميناء ايلات ، واعتبرت اسرائيل ذلك اعلان حرب.
…………………………………
………………………

                    قامت إسرائيل في الساعة 8 و 45 دقيقة صباح الاثنين 5 يونيو 1967و لمدة ثلاث ساعات بغارات جوية على مصر في سيناء والدلتا والقاهرة ووادي النيل في ثلاث موجات الأولى 174 طائرة والثانية 161 والثالثة 157 بإجمالي 492 غارة  ، دمرت فيها 25 مطاراً حربياً وما لا يقل عن 85% من طائرات مصر وهي جاثمة على الأرض.
………………………………………………………………….
…….
….
     فى مساء 9 يونيو ذهب عزيز وزوجته بهية لسماع خطاب الرئيس جمال عبد الناصر عند أحد الاصدقاء ، وقبل ان ينتهى الخطاب ،وبعد ان اتضحت كل الامور ،اندفعت بهية الى الشارع  صارخة :
لأأأأأأ  انا بهية  بقول لأ  ،  حنحارب…حنحااااااارب
       لم ينهزم عزيز فى هذا اليوم……….انهزم بعدها بعشر سنوات حين زار السادات اسرائيل……



الاثنين، 16 أغسطس 2010

حريق القاهرة

cairo_fire1952
                                                       سينما ريفولى تحترق

          نبذة  تاريخية


  •   في 18 اكتوبر 1951أعلن النحاس باشا رئيس الوزراء فى مجلس النواب الغاء معاهدة 1936  وملحقاتها ، الموقعة بين مصر وبريطانيا العظمى، وسط تأييد حافل من نواب الحكومة والمعارضة .
  • وفي 21 من أكتوبر 1951 اتخذ مجلس الوزراء بجلسته السرية مجموعة من القرارات تعبر عن جدية الحكومة في قرار إلغاء المعاهدة.  فقررت اتخاذ جميع السبل المؤدية إلى عدم تعاون العمال المصريين مع القوات البريطانية، وصرف أجور هؤلاء العمال، وتوفير الأعمال البديلة لهم. كما قررت مقاومة القوات البريطانية إذا ما اجتازت منطقة القناة، مهما كانت النتائج، والدفاع عن القاهرة حتى النهاية.
  • أدى إلغاء المعاهدة إلى إلغاء الامتيازات والإعفاءات التي كانت تتمتع بها القوات البريطانية الموجودة في مصر، وإلغاء جميع الإعفاءات المالية التي تشمل الرسوم الجمركية على المهمات العسكرية والأسلحة والعتاد والمؤن، وكذلك الرسوم المستحقة على السفن التي تمر بالمياه المصرية لخدمة القوات البريطانية. وامتنعت السكك الحديدية عن اداء اي خدمات للقوات البريطانية ومنع دخول الرعايا البريطانيين إلا بتأشيرة مسبقة وأنهت تصاريح الرعايا البريطانيين الذين يخدمون القوات العسكرية.
  • توقف المتعهدون عن التوريد للقوات البريطانية فى القنال لاعاشة 80 الف جندي .
  • بدأت التنظيمات السياسية “الاخوان ،الشيوعيون ،الحزب الاشتراكي فى تنظيم عمليات المقاومة المسلحة وتدريب الشباب فى الجامعة وبعض الاحياء على استعمال السلاح.
  • تحقق تكبيد القوات البريطانية خسائر فى الارواح بالإضافة الى خسائر مادية مؤثرة .
  • فى عملية اإستعراضية لإحراج حكومة الوفد قامت القوات البريطانية بهدم كفر احمد عبده (قريه صغيرة ) بالسويس بواسطة 250 دبابة و500 مصفحة .
  • ردت الحكومة المصرية على هذا العمل المستفز بسحب السفير المصري من لندن، وطرد جميع المواطنين البريطانيين من خدمة الحكومة المصرية، وإصدار تشريع جديد يقضي بتوقيع عقوبات على المتعاونين مع القوات البريطانية، وإباحة حمل السلاح.
  • تم اشعال النار اثناء غارة على مدينة السويس فى كنيسة لاحداث فرقة بين الشعب المقاوم .
  • فى 12 يناير  استشهد الطالبان بجامعة فؤاد (القاهرة) عمر شاهين اخوان واحمد المنيسى القريب من الشيوعيين فى عملية مقاومة ناجحة ،وشيع الشهداء فى  جنازة مهيبة خرج فيها طلاب الجامعة واساتذتها  تتقدمهم اعلام الكليات  الى جامع الكخيا بشار ع ابراهيم باشا (الجمهورية ) وحين وصلت اول الجنازة الى الجامع كان اخرها ما رال فى جامعة فؤاد (القاهرة).وكانت اكبر جنازة منظمه شهدتها البلاد .
  • في صباح يوم الجمعة  25 يناير  1952 استدعى القائد البريطاني بمنطقة القناة "البريجادير أكسهام" ضابط الاتصال المصري، وسلمه إنذارا بأن تسلم قوات البوليس المصرية بالإسماعيلية أسلحتها للقوات البريطانية، وتجلو عن دار المحافظة والثكنات، وترحل عن منطقة القناة كلها…..رفضت المحافظة الإنذار البريطاني .
  • وقبل غروب شمس ذلك اليوم حاصرت الدبابات والمصفحات البريطانية مبنى المحافظة في سبعة آلاف جندي بريطاني مزودين بالأسلحة، ومدافع الميدان، بينما كان عدد الجنود المصريين المحاصرين لا يزيد على ثمانمائة في الثكنات وثمانين في مبنى المحافظة، لا يحملون غير البنادق القديمة زخيرة محدودة . واستخدم البريطانيون كل ما معهم من الأسلحة في قصف مبنى المحافظة، واستمر الجنود المصريون البواسل يقاومون حتى نفذت آخر طلقة معهم ، وبعد ساعتين من القتال، وسقط  خمسون شهيدًا، وأصيب نحو ثمانين آخرين، وأسر من بقي منهم.

وصل الخبر الى البلاد.

  • تمرد عمال الطيران فى الثانية من صباح 26 يناير فى مطار الماظه- فلم يكن مطار القاهرة قد انشئ بعد –ورفضوا تقديم الخدمات لاربعة طائرات تتبع الخطوط الجوية البرطانية، وتمرد جنود بلوكات النظام(الامن المركزي حاليا)فى ثكنات العباسية تضامنا مع زملائهم الذين تعرضوا للقتل والأسر، وخرجوا من المعسكر واتجهوا الى جامعة فؤاد (القاهرة)،معقل النضال الوطني فى ذلك الوقت .
         فى صباح السبت 26 يناير 1952 حين وصل صديقي عزيز  الى الجامعة وجد مئات جنود بلوكات النظام يملأون ساحة      الجامعة ، فلاحون فقراء لم يملك الاهل تدبير  مبلغ 20 حنية لدفع البدلية  لاعفاءهم من التجنيد ، اميون  حزانى، فى مثل سنه ،يلبسون ملابس كاكى شورت الى الركبه وصندل وبلوفر صوف ،وعرف مهم  الحكاية .

        تحركت مظاهرة الطلبة ومئات من جنود بلوكات النظام  ، الذين تعودنا ان نراهم يستخدمون فى ضرب المتظاهرين ،وضابط جيش بملابسة الرسمية يقود الهتافات محمولا على الاعناق، متجهة الى مجلس الوزراء مطالبين بقطع العلاقات واعلان الحرب على القوات البريطانية. طل من شرفة مجلس الوزراء الوزير عبد الفتاح حسن وخطب خطبه عصماء لم  يفهم منها صديقي عزيز شيئا الا ان الملك هو العقبه ، فقصد المتظاهرون  قصر عابدين  يهتفون" يسقط الملك".


      تآكلت اعداد المتظاهرين المتجهة الى قصر عابدين وكانت الساعة قد بلغت الثالثة بعد الظهر . وفى ميدان الاسماعيلية ( التحرير )  شاهد صديقي عزيز الدخان يتصاعد من عده اماكن ........وا لقاهره تحترق .


       بدأت الشرارة الأولي للحريق فى الظهر من ميدان ابراهيم باشا باشعال النيران في كازينو أوبرا ، و انتشرت النيران في فندق شبرد و نادي السيارات و بنك بركليز ، و غيرها من المتاجر و مكاتب الشركات و دور السينما و الفنادق و البنوك ، و كان التركيز علي الأماكن والملاهي الليلية و المؤسسات ذات العلاقة بالمصالح البريطانية .طالت الحرائق أيضا أحياء الفجالة و الظاهر و القلعة و ميدان الاسماعيلية و ميدان محطة مصر ، وسادت الفوضى.

     التهمت النيران 700 مكان ما بين محلات وسينما وكازينو وفندق ومكتب ونادى في شوارع وميادين وسط المدينة ، وأكبر وأشهر المحلات التجارية في مصر آنذاك و30 مكتبا لشركات كبرى و117 مكتب أعمال وشقق سكنية و13 فندقا كبيرا مثل شبرد ومتر وبوليتان وفيكتوريا ، و40 دار سينما منها ريفولي وراديو ومترو وديانا وميامي، و8 محلات ومعارض كبرى للسيارات ، و10 متاجر للسلاح ، و73 مقهى ومطعم وصالة ، و92 حانة  ، و16 ناديا ، أي أن النيران أحرقت كل كل ما تصورتة الفوضى فسادا .

         اتجه صديقي عزيز الى شارع فؤاد (26 يوليو )وشاهد سينما ريفولى وهى تحترق والنيران مشتعلة فى اكثر من مكان دون اي مقاومه. اتجه الى ميدان العتبة فشارع كلوت بك ، حيث الخمر مراق ممتزج بوحل الطريق ورائحته المميزة تملا الصدور الى ان وصل الى منزله بالعباسية بعد المغرب ، حيث النيران فى اكثر من مكان ،و بدون مواصلات ،وبدون اي سلطة او سلطان ،وبدون اي تنظيم سياسى قادر على الفعل ..........لم يبقى الا سلطان الفوضى.


       في نفس التوقيت كانت هناك حفلة ملكية فى قصر عابدين للاحتفال  بالمولود الجديد للملك ، ولى العهد ، دعى اليها كبار ضباط الجيش والبوليس .  اتصل فؤاد سراج الدين وزير الداخلية آنذاك بالملك يطلب منه الاستعانة بالجيش للسيطرة على الموقف لأن الأمر أصبح فوق طاقة الحكومة وخرج الامر من يدها . وتلكأ الامر للجيش بالنزول الى القاهرة حتى المساء. 

 

           يسكن بجوار عزيز  فى شقه ارضية صديق  فى مثل سنة ، له اخان اصغر ، تلمذة فى ثانوي .كانوا يعيشون وحدهم ،حيث توفى الاب المستشار فى القضاء وإلأم فى سنة واحدة ، ويرعاهم من بعيد اخ اكبر كثيرا . يعنى شقة عزاب تحولت الى ما يشبه المقهى او النادي ، اللي فاضى يعدى  ، لم يكن لهم اي اهتمام بالقضايا العامة .

       مرّ عزيزعلى الشقة/ القهوة  بعد ما اكل وريح :

          -   فين اخواتك؟؟

       - فيه محل سلاح فى شارع احمد سعيد  بيتنهب راحوا يجيبولنا حتتين سلاح ما حدش عارف الدنيا

حيحصل فيها اية .

     ركب عزيز ورا صاحبه اللامبريتا (موتوسكل زي الفسبا) وجرى على محل السلاح .

    محل السلاح كان انتهب من بدري .بس جنب محل السلاح   بقال افرنجي اسمه" زوزو"يونانى فيه كل انواع الخمور من الويسكي الفاخر والشمبانيا الى أردأ انواع الخمور، الطافيا والروم شراب القراصنة . محل زوزو كان بيتنهب . واخوات صديق عزيز التلمذة الصغار ابناء المرحوم  سيادة  المستشار حولوا مش اقل من 100 زجاجة خمر مختلفة الانواع الى الشقة/القهوة.

      بالليل كانت الشقه فيها بين 15 وعشرين فرد سكارى......... مافيش فيهم واحد قادر يتحرك من مكانه . موتى او شبة موتى. كانت الدنيا شتا  و ساقعة ، واحد واحد على الدش وهو بهدومه ، عزيز  وصاحبه قعدوا يفوقوا فيهم يجى ساعتين . وعملوا يومها  كيلو بن قهوة . قرر صديق عزيز  التخلص من كميه الخمور . اعتقد انه باعهم .

        غادر عزيز شقة السكارى، لانة ماقدرش يعمل حاجة ، متفرج ….من صباحة ربنا وهو بيتفرج….. فى المظاهرة ماشى يتفرج لا بيعرف يهتف ولا حتى يرد الهتاف …..والدنيا بتولع لا بيشترك فى التوليع ولا بيحوش……. ومحل زوزو بيتنهب قدامة لا اشترك ولا حاش…  .سلبي للغاية…. . اتفرج وخزن . رجع البيت فى منتصف الليل ، لقى ابوة مع واحد صاحبة يتتبعوا الاخبار فى الراديو ….

         قدم رئيس الوزارة "النحاس باشا" استقالته، ولكن الملك رفضها، واجتمع مجلس الوزراء، وقرر مواجهة الموقف بإعلان الأحكام العرفية في جميع أنحاء البلاد، ووقف الدراسة في المدارس والجامعات إلى أجل غير مسمى.

     تعيين رئيس الوزراء حاكما عسكريا عاما "اللي هو النحاس باشا زعيم الاغلبية " فأصدر قرارا بمنع التجول في القاهرة والجيزة من السادسة مساء حتى السادسة صباحًا، وأصدر أمرا عسكريا بمنع التجمهر، واعتبار كل تجمع مؤلف من خمسة أشخاص أو أكثر مهددا للسلم والنظام العام يعاقب من يشترك فيه بالحبس……

        امر ملكي باعفاء النحاس باشا رئيس وزراء حكومة الاغلبية، ا وتكليف حسين سرى بتاليف حكومة جديدة .


         يظل حريق القاهرة أكثر الحوادث غموضا في تاريخ مصر ولم تثبت اي دراسه محترمة ولا اي تحقيق محايد، ولا أحد يدري حتى الآن من الذى قام بحريق القاهرة ؟ هل رتبته قوات الاحتلال البريطاني لتوقف المقاومة التي اشتد عودها واصبحت تسبب خسائر فادحه للقوات واحتضنها الشعب ؟  ام رتبة الملك للتخلص من حكومة الوفد ؟  .......أم بدأ عفويا تلقائيا  ؟؟؟. ام ان عزيز وامثالة هم المسئولون عن حريق القاهرة بسلبيتهم؟؟






الجمعة، 13 أغسطس 2010

معتقل القلعة


051510040546klq33xp6606qp
   

                فى العام 1954، وأزمة مارس الشهيرة بين محمد نجيب  فى جانب ، ومجلس قيادة الثورة بقيادة عبد الناصر فى الجانب الاخر . انقسم المجتمع المصرى بين استمرار حركه الجيش بقراراتها المنحازة للفقراء – الاصلاح الزراعى وتخفيض ايجارات المنازل - وبين المطالبين بالديمقراطية وعودة الحياة السياسية .
       كان حزب الوفد اكثر الاحزاب شعبية ، والإخوان المسلمين اقوى التنظيمات عددا وانضباطا وتنظيما . بعد شهور قليلة من قيام الثورة طلب من الاحزاب تطهير نفسها، وتم القبض على زعماءها  ، باستثناء النحاس باشا زعيم حزب الوفد . وفى يناير 53 صدر قرارا بحل الاحزاب ومصادرة اموالها باستثناء جماعة الاخوان المسلمين، وأعلن تشكيل هيئة التحرير واعتبارها الحزب الواحد المعبر عن اهداف الثوره . وفى فبراير 53 صدر دستور مؤقت لمدة ثلاث سنوات يتيح لمجلس قيادة الثورة تولى السلطتين التشريعيه والتنفيذية . استمرت العلاقة بين مجلس قيادة الثورة والإخوان المسلمين جيدة لفترة قصيرة ، ثم ظهر  الخلاف علنيا فى بداية العام 54 . ففى احتفال جامعة القاهرة بذكرى شهداءها "عمر شاهين اخوان" ، "واحمد المنيسى القريب من الشيوعيين " الذين استشهدوا فى معركة القناة ضد القوات البريطانية المحتلة فى نفس التاريخ من العام  52.  الاخوان هتافهم الوحيد "الله اكبر ولله الحمد"،وهيئه التحرير هتافها "الله اكبر والعزة لمصر " . وساحة جامعه القاهره مزدحمة بآلاف الطلاب  . .. دخلت عربه جيب تتبع هيئة التحرير وفيها ميكروفون. وعندما بدا الهتاف من الميكروفون الله واكبر ……. وعينك ما تشوف الا النور …  اتشد سلك الميكروفون قبل ما تطلع والعزة لمصر . وفى خمس دقائق كانت العربية الجيب مولعة  …. وطلبه اعضاء  هيئه التحرير مدورين الجرى  ….. الاخوان ايدهم طرشة وماعندهمش يامّا ارجمينى ، استطاع الاخوان بتنظيمهم المحكم ضرب  الطلاب المنضمين الى هيئة التحرير علقه اللى هىّ،  وامتلكوا ساحة  الجامعة .
          فى 14 يناير اصدر مجلس قيادة الثوره قرارا بحل جماعة الاخوان المسلمين واعتقال قيادتها. وبدأ الخلاف يظهر بعمق بين نجيب -  الذى كانت لة شعبية كبيرة على عكس مجلس قيادة الثورة - ومجلس الثوره ، فهو وجه الثورة الذى عرفه الشعب  ، وقامت مظاهرات فى فبراير بدعم من الاخوان المسلمين تطالب بعودة الحياة السياسية والإفراج عن المعتقلين.
          الشيوعيون كانوا منقسمين حدتو تأيد الثوره وباقى التنظيمات تطالب بالديمقراطية  ، الاحزاب كانت ضد مجلس قياده الثوره ،حتى الضباط الاحرار انفسهم كانوا منقسمين، ضباط الفرسان ضد ضباط المدفعية.
           قام  الطلاب الشيوعيون والحزب الاشتراكى والاخوان المسلمين والوفد بتشكيل  الجبهة الوطنية التى طالبت الجيش بالعودة الى الثكنات واستعادة الحياة النيابية وتامين الحقوق السياسية والنقابية .
          اتخذ مجلس قيادة الثورة قرارات لدعم صلاحيات حمال عبد الناصر وأصبح محمد نجيب مجرد رئيسا للمجلس بدون صلاحيات تقريبا ، فقدم استقالته وقبل المجلس الاستقالة وعين عبد الناصر رئيسا للوزراء.  رفض سلاح الفرسان وطالب بعودة نجيب  . حضر عبد الناصر اجتماع  سلاح الفرسان الرافض لقرارات مجلس قيادة الثوره ،وفى ثكنات  سلاح الفرسان. ووافق على طلباتهم.
        اجتمع مجلس قيادة الثورة فى 25 مارس 1954 وأعلن حل مجلس قيادة الثورة  وعودة الجيش الى ثكناته وعودة محمد نجيب رئيسا للجمهورية وتعيين خالد محى الدين رئيسا للوزراء وتشكيل حكومة انتقالية لمدة ستة شهور تقوم خلالها بإجراء انتخابات ووضع دستور دائم  وعودة الحياة السياسية .    زار المرشد العام للاخوان عبد الناصر  فى نفس يوم اتخاذ هذة القررات ووعد بالحياد فى الصراع الدائر .
       رفضت هيئة التحرير هذه القرارات وقامت ، بمعاونة صاوى محمد صاوى سكرتير عام نقابة النقل  ، بالدعوة للإضراب العام  حتى الغاء هذه القرارات . واضرب عمال التروماى…… ووقف حال  البلد . عقد طلاب جامعة القاهرة مؤتمرا اعلنوا فيه تشكيل لجنة الاتحاد الوطنى من الطلبة المنتمين الى الوفد والشيوعيين والحزب الاشتراكى والإخوان وطالبوا بإلغاء الاحكام العرفية والإفراج عن المعتقلين السياسيين  وإلغاء مجلس قيادة الثورة.  تحرك عمال مديريه التحرير ونزلوا القاهرة.  وقام بعض العمال بقياده البوليس الحربى بالتوجه الى مجلس الدولة والاعتداء على رئيسه الدكتور السنهورى اثناء انعقاد الجمعيه العمومية للمجلس .
       حسمت المعركة لصالح مجلس قياده الثورة. ولم ينفذ من قرارات 25 مارس الا عودة محمد نجيب رئيسا .

             اثناء ذهاب عزيز الى الجامعة فى اول ابريل مهزوما،  فقد كان كعادته  دائما  ضمن  الفريق الخاسر ، تم القبض عليه ،أخذ الى قسم اول الجيزة ، وأول ما دخل الحجز فرش جرنال ونام نوما عميقا وصحوه الساعة 2 ظهرا وأخدوه على معتقل القلعة .

        بعد ان  انتقل الخديوى اسماعيل الى قصر عابدين امر ببناء سجن للأجانب بالقلعه ، يتكون السجن من كريدور طوله حوالى 50 مترا  على كل جانب 21 زنزانة كل زنزانة بها سريران و شباك علوى صفير حديد بارتفاع  2,5 متر وباب حديد يغلق من الخارج به فتحة قطرها 10 سنتى . و8 غرق مفرد للحبس الانفرادى ومطبخ  ودورة مباه متسعة .  سجن شيك ممكن اعتباره فندقا نجمه واحده.
         ايامها كان فى المعتقل ما بين 80 و100 معتقل والعدد يتحرك يوميا . لو قلنا 10 وفدين و10 شيوعيين و10 اخوان و10 حرب اشتراكى و10 طلبة من مختلف الاتجاهات و10 نقابيون  …….الباقى يبقى مين لو جدع تقول………….كانوا من عمال القناة اللى رفضوا يسيبوا الشغل وفضلوا يشتغلوا مع الانجليز و قامت الحكومة باعتقلتهم فى سجن القلعه مع السياسيين .
       ايامها ماكانوش بيقفلوا الزنازين  . يعنى كل المعتقلين بحريتهم داخل المعتقل  وكل واحد قاعد مع زميل فى الغالب مختارين بعض .  وممكن الواحد يعزل من زنزانة الى اخرى وإدارة السجن ما لهاش دعوة .وكانت المعامله طببه  بل طيبه جدا ،فقد كانت الثوره مجروحة تطبب جراحها وكان اغلب المعتقلين من جراحها .
        المتعهد يورد الاكل تلات وجبات ، بس فى الحقيقة رغم جوده الخامات كانت زباله معمولة وحش.  تانى يوم من دخول عزيز اضرب المعتقلين عن استلام الطعام لرداءته ، مأمور السجن قال نتفاوض بس ما ينفعش أتفاوض مع 90  فرد . انتخب بسرعة نفر من كل مجموعه، 7 معتقلين طلعوا يتفاوضوا مع المأمور ومن ضمنهم عم عزيز عن الطلبه .
        الحكومة بتصرف للمتعهد 13,5 قرشا عن كل معتقل ، الاغلبية الان ماتعرفش يعنى اية قرش ، الجنيه 100 قرش . تم الاتفاق على توريد خامات الطعام ويقوم المعتقلون بطبخها . ضمن عمال القناه المعتقلين كان فيه طباخ ومساعدة . اللجنة اللى من 7 معتقلين تقعد مع المتعهد عصر كل يوم وتطلب خامات الطعام لعدد المعتقلين بقيمة 11,5قرشا للفرد وقرشان للمتعهد . المطبخ كان مجهز بشكل جيد وبه ادوات كثيرة متوفرة وطباخ درجة اولى ومساعدة جاهزين للعمل مقابل علبة سجاير .
      يوم والتانى اللجنة صفصفت على عم عزيز والطباخ.  الطباخ ومساعدة يطبخوا وعم عزيز يدير ويتعامل مع المتعهد ، ويغرف ويوزع الاكل، كل واحد لوحده زى الوكاندات. الفطار كان فول وشاى بلبن والغدا لحمة وخضار ورز او كمرونة وحلو  والعشاء جبنه وحلاوة. استفاد عزيز جدا من الشغلانة دى و بقى استاذ فى تحديد الكميات . كيلو السكر يعمل كام كبايه شاى، النفر يأكل قد ايه رز  قد ايه خضار…….الى اخره .
        فى اول رمضان كان يوم 5  مايو 1954 كانت قائمه طعام معتقل القلعه عباره عن مكروبه بالبشامل وكبده ومخ بانية وسلاطة خضراء والحلو كنافة.
          بس للأسف عزيز ما كلش يومها ، فقد افرج عنه عصر ذلك اليوم وفطر فى بيتهم . ومن يومها عزيز ما وردش على معتقل.


الأحد، 8 أغسطس 2010

عزيز كاردان



      فى المجتمعات ما قبل الرأسمالية والإنتاج الوفير كانت العلاقة بين الصانع والمستهلك مباشره وحميمه الى حد ما . يعنى فى مصر وحتى السبعينات من القرن الماضى ، وقبل الانفتاح السداح مداح ، لا يمكن لاى انسان ان يقتنى بدله جاهزة يشتريها من محل ملابس . كان فيه جاهز ولكن شي بائس للغاية  . كان  الانسان يذهب الى الخياط (الترزى ) ياخد مقاساته بالمتر (المازوره)وبسجلها فى دفتر . وبعد ذلك بروفة اولى ثم بروفة تانيه ثم الاستلام .كان يشترى القماش من مكان ويحمله الى الترزى لتفصيله وخياطته . ومع تقدم المجتمع  اصبح هناك ما يسمى” تاجر وترزى “، تجد عنده بعض الاقمشه تختار منها ما تشاء  ويفصله على مقاسك . حتى القمصان كان كل واحد عنه القمصانجى بتاعه . كذلك الفساتين كل عائله تتعامل مع خياطه معينه ، بل ان بعض السيدات كانت الخياطه تحضر للمنزل صباحا  ، ويصبح القماش فستانا فى المساء ، . واى بيت من بيوت الطبقه الوسطى كان فيه ماكينة خياطه سنجر  ، لان ماكنش فيه ماركه تانيه .وكانت دى الاله  الميكانيكيه الوحيدة فى البيت هى ومطحنه البن .

        صديقى عزيز  ، لأنه حشرى،  وبيحب يتفرج على اى صنايعى بيعمل اى حاجه ،ويدعى دائما انه يعرف يعمل نفس الشئ  ، واحيانا يتقنزح ويقول اعرف اعمل احس منه ، فقد كان يتقن فى سن صغيره التعامل مع ماكينة الخياطه وتشغيلها ابرع من اخواته البنات .ولأنه كان حشرى فكان احيانا يتفرج على ست اولجا الخياطه لما تيجى تخيط الفساتين فى البيت للعائلة.
       صديقى عزيز  انيق يعرف يلبس  ورياضى ايضا، بيلعب اسكواش . فى الستينات وأوائل السبعينات كان لبس اى رياضه ، ما عدا التنس طبعا ،  صناعه محليه  ، عياره عن تى شرت فوق، وشئ اسمه ready  تحت ،شى قريب من الانروير البوكسر تيل ابيض وله جيب خلفى. يقوم عم عزيز يطلع فى دماغه انه يفصل شورتات بنفسه بجيوب زى البنطلونات بس ماسكه شويه، لان البنطلونات ايامها كانت واسعة زى البراشوت. هو الوحيد اللى بيلعب بشورت زى لعيبه التنس اللى بيلبسوا المستورد ( السنييه )،بل عمل ماركه  لنفسه  ، اشتراها من الموسكى عبارة عن طائر البنجوين يلصق بالمكواة . أحد اصدقائه خفيفى الظل سماه” عزيز كاردان “على وزن  “بيير كاردان “ نجم عالم الموضة الشهير .
     قلنا ان عرير كان يهتم بأناقته بعنى عايق شويتين  ، كان بيفصل بدله عند الترزى اللى يفصل عنده عبد الحليم حافظ فى اول شارع ابراهيم باشا (الجمهوريه ). ولأنه بيحب الصنيعيه وبيتكلم معاهم كتير ،يمكن عشان يلقط الصنعه .عرف من الترزى ان عبد الحليم دراعه اطول من مقاسات الانسان العادى ب7 سنتى.وممكن تلاحظ ذلك فى فيلم ابى فوق الشجره ، فى اغنيه دقوا الشماسى ، تلاحظ  وهو بمرجح ذرعته  انها وصله لركبه .ومش ممكن تيجى سيره حليم من غير ما الواحد يداعب خياله
    يبقى القمر تاليتنا
   والليل بحر مهاودتا
  والنسمة اللى تخذنا
  ترجع شايله الحكاية
الله دى بقت حكاية  ، ودخلت كتب الاغانى كمان …….مع فيس وليلى ،  وحسن ونعيمه  ، وروميو وجوليت ، وياسين وبهية ، وشفيقة ومتولي ، لا دا متولى اخوها اللى قتلها ، طيب وهيبة ومحمد رشدى ويا ما كلوا برتقال .محمد رشدى مش قريب احمد رشدى الوزير اللى حصل فى عهده انتفاضه الامن المركز ى وحرقوا كباريهات شارع الهرم ، ونزل الجيش بدباباته وطائراته…….والطيران رغم فوته الرهيبة لا يمكن ان يحسم المعركة ، وعلى ذكر الطيران لا يمكن ان ننسى صاحب الطلعه  الجوية الاولى معبود النساء احمد سالم ………
- يا خليل الموضوع حفرشح منك ومش حتعرف تلمه  ……انت رغاى ليه  ؟ دانت معروف عنك انك بتكلم بالتيلة ……ارجع للموضوع

         المهم عزيز قرر يفصل بدّله بنفسه  راح  للترزى المشهور  واختار قطعتين قماش وقاله اعملهم بدلتين بس مش مره واحده ، واحده ورا التانيه ، يعنى قعد يعمل فيهم اكتر من شهرين ، وعزيز مش مستعجل، واستدعى ذلك اكثر من 12 زيارة لمحل الترزى ، اعتبرهم 12حصه حضرها  عزيز  عند واحد من اشهر الخياطين فى مصر .  لقط فيها  الصنعه  وخباياها .

           ابسط شئ فى هذه الصنعه التفصيل . الباترون الجاهز من اى مجله تفصيل مثل يوردا او غيرها يحل مشكله التفصيل . اهم شئ اتقان التركيب ونظافة الخياطه . اشهر ترزى ما يضيعش وقته فى خياطه البنطلون  ، يفصله ويبعنه لخياط البنطلونات . اصعب شئ فى الجاكتة تركيب الكم،  ودى لها خياط مختص  .  عمنا عزيز اتقن التلاته ،  ومن سنه 1980 عزيز يقوم بخياطه بدّله بنفسه ،  وعمره ما لبس ما يسمى بالبوشرت . دائما بيلبس  بدّل فى الصيف  من اقمشه تيل كاكى مثلا او كتان ابيض او جينز ، لا يجرؤ اى انسان بالذهاب بها لاى ترزى ليدفع 150 جنيه  تفصيل – بأسعار ذلك الوقت - فى قماش لا يساوى 15 جنيه . كانوا زمايله يداعبوه :
      - يا عم مين قدك ، انت ما بتكلفش غير المكوه..

           نعمان عاشور الكاتب المسرحى الرائع صور الانهيار الاقتصادى للطيفه الوسطى ممثله فى بطل روايته عيله الدوغرى  الاسطى سيد الدوغرى الترزى (توفيق الدقن) الاخ الاكبر فى عيله الدوغرى، حيث تراجعت المهته امام انتاج المصانع، وشكواه لزوجته (ناديه السبع )عن سوء الحال  وتفكيره فى بيع المحل :
- الترزى راحت عليه خلاص ،الصنعه ما بقتش تجيب همها
وشقيقه مصطفى  الدوغرى استاذ التاريخ (كمال حسين) الذى يعلق  على الاحداث بسخرية  وعمق ،وكابتن الكره حسن الدوغرى(عيد المنعم ابراهيم )اللى  الدنيا ماشيه معاه ، وقراره شراء حذاء للطواف ( شفيق نور الدين )خادم الاسرة العجوز اللى عمره ما انتعل شيئا في قدميه:
- ولا تكملها حافى احسن يا طواف
-اخص عليك يا حسن ، لا انا عايرها بنى
وزينب الدوغرى الاخت المسيطرة (ملك الجمل )على زوجها الموظف الصغير الاقل كسبا( احمد الجزيرى) ،والأخت الصغرى عيشة الدوغرى (رجاء حسين ) وخطيبها (عبد الرحمن ابو زهره) واقتناعهم  ببيع دبل الخطوبه لأنها شكليات لا ضرورة لها . كل ذلك فى قالب كوميدى ما تبطلش ضحك طول عرض المسر حبه، وتقعد بعدها تتناقش ايام فى القضايا التى اثارها. مسرح بحق ،متعه ما بعدها متعه وفى نفس الوقت يخاطب العقل ويطرح قضايا المجتمع.
     نعمان عاشور من احسن من صور  الانهيار الاقتصادى للطبقة الوسطى ،فى مسرحياته الناس اللى فوق و المغناطيس والناس اللى تحت وعيله الدوغرى وغيرها، فقد كان من اهم كتاب المسرح فى الستينات والسبعينات.

      انتهى عصر المنتج الصغير او فى طريقه الى الزوال ، ولم يعد له مكان فى المجتمع الرأسمالى . اندثرت  او فى طريقها للاندثار  فى مصر مهنة الترزى او ا لقمصاتجى المستقل . فقد اكتسح الانتاج الكبير صغار المنتجين وانتهت بذلك الى الابد العلاقة الحميمة بين المنتج والمستهلك ، وانسحقت فئة صغار الحرفين . فبعد ان كان انسانا  يملك عمله اصبح شغيلا فى مصنع وانضم الى الطبقه العامله ،وقد تراه الان فى اعتصام امام مجلس الشعب مطالبا بزيادة الاجور .


        والدور جاى على طبقه الفلاحين اللى مش حيقدروا يدفعوا تمن الميه اللى بتروى اراضيهم ،و اللى حتفرضها الحكومة بحجة ترشيد الاستهلاك ، وبعد ألازمه المفتعله  لدول حوض النيل ،التى تخدم  بالدرجة الاولى مصالح الرأسمالية العالميه  والمصرية . الفلاحين مش حيقدروا  على تكاليف تطوير  اساليب الرى الى الاساليب الحديثه ، ولأنهم فقراء حيبيعوا الارض ،ويتحولوا الى شغيله ، ويسود الانتاج الزراعى الكبير  ، وتنسحق طبقه الفلاحين وتندثر كما اندثرت طائفة اصلاح وابور الجاز ومبيض النحاس.

الثلاثاء، 3 أغسطس 2010

نجيب سرور


البحر بيضحك ليه
البحر بيضحك ليه و أنا نازلة أتدلع أملا القلل
البحر غضبان ما بيضحكش..أصل الحكاية ما تضحكش !
البحر جرحه ما بيدبلش..جرحنا ولا عمره دبل !
البحر بيضحك ليه..و أنا نازلة أتدلع أملا القلل
مساكين بنضحك م البلوة ..زي الديوك والروح حلوة
سرقاها م السكين حموة
ولسه جوا القلب أمل !
البحر بيضحك ليه..و أنا نازلة أتدلع أملا القلل

قللنا فخارها قناوي .. بتقول حكاوي وغناوي
يا قلة الذل اللى أنا ناوي ما أشرب ولو في الميّة عسل
البحر بيضحك ليه..و أنا نازلة أتدلع أملا القلل

ياما ملينا وملينا .. لغيرنا وعطشنا سقينا
صابريــن وبحر ما يروينا ..شايلين بدال العلة علل !
والبحر بيضحك ليه .و أنا نازلة أتدلع أملا القلل

في بالي ياما وعلى بالي .. وإللى بيعشق ما يبالي
ما يهمينيش من عزالي .. يا حلوة لو مرسالي وصل !
والبحر بيضحك ليه..و أنا نازلة أتدلع أملا القلل

بيني وبينك سور ورا سور .. وأنا لا مارد ولا عصفور !!
في إيدي ناي و الناي مكسور .. وصبحت أنا في العشق مثل !
البحر بيضحك ليه..و أنا نازلة أتدلع أملا القلل

الشعر مش بس شعر لو كان مقفى وفصيح ............الشعر لو مس قلبى وقلبك شعر بصحيح

                  ولد الشاعر الكبير نجيب سرور فى اول يونيو 1932 بقريه اخطاب المجاورة لقريه بهوت محافظة الدقهليه ، والذى جرى فيها اشتباك مسلح سنه 1951 بين الفلاحين المضطهدين وعائله البدراوي عاشور الاقطاعيه، حينما كان نجيب طالبا بمدرسه مغاغه الثانوية .

كان ياسين أجيرا من بهوت
جدعا .. كانَ جدعْ
شارباً من "بزِّ" أمه
من عروقِ الأرضِ .. من أرضِ بهوتْ ..

حكي عن ياسين وعن بهية وعن بهوت ووصف المعركة شعرا جميلا فى مسرحيه ياسين وبهيه التي اخرجها صديقه المبدع كرم مطاوع ، ولاقت نجاحا كبيرا
تذهبُ البنتُ إلى القصر خفيفهْ ..
ولطيفهْ ..
كالفراشهْ ..
بعد عامٍ ترجعُ البنتُ ثقيلهْ ..
مثل قربهْ ..
وذليلهْ ..
مثل كلبهْ ..
لم تعدْ بنتاً ففي البطنِ جنينٌ "ابنُ كلْبْ" ..
وهْي أيضاً "بنتُ كلبْ" ..
ولهذا يتحتّمْ
أن تموتْ
ثمَّ تُدفنْ
هكذا العارُ يوارى في بهوت

ويرفض ياسين ان تذهب بهيه لتخدم فى بيت الباشا…………….

يا أبي .. يا نصفَ فدَّانٍ يتيمْ ..
يا سيولاً منْ عَرَقْ ..
يا حصاداً للهشيمْ ..
كل عامْ ..
أيها الغولُ اللعين!
أنت لن تأخذَ منِّي ما تبقّى
قبلَ أنْ تأخذَ روحي
"فاضل ايهْ في الدنيا ليّهْ
فاضلْ ايهْ غيرْها بهيّهْ؟"
مستحيلْ!!
مستحيلْ!!

ويموت ياسين في معركة الهجوم على قصر الباشا………


هي تدري أنّنا حين نموتْ
لا نعودْ ..
لمْ يعدْ يوماً من الموْتِ أحدْ
لبهوتْ
رغمَ هذا فالبذورْ
ليس تفْنى حينَ تُدفَنْ
ربما الإنسانُ أيضاً .. ليس يفْنى ..
حينَ يُدفَنْ
ولهذا قدْ يعودْ
هو ياسينُ لها ..
ذات يومْ !
ذات يومْ !

       ترك دراسه الحقوق فى السنه النهائيه وكان قد التحق بالمعهد العالى للفنون المسرحيه وحصل على الدبلوم فى العام 1956. وانضم الى المسرح الشعبى التابع لمصلحه الفنون  (المجلس الاعلى للفنون والاداب الان ) والتى كان يراسها الاديب يحى حقى.

       حصل على بعثه الى موسكو لدراسه الاخراج المسرحى فى  العام1959 ،وبعد ثلاثه شهور فقط ، اثر كتابه قصيدته الطويله "فرج الله الحلو.. والجستابو" فى رثاء المناضل الشيوعى اللبنانى الذى اختفى، واتهمت المخابرات المصريه باذابته  فى الحامض ، واستغلاله فرصة انعقاد أحد المؤتمرات التضامنية مع الشعب الكوبى فى جامعة موسكو فقفز الى المنصة , و اطلق بيانا ضد "استبداد النظام فى مصر و سوريا. , و فصل من البعثة(هو و ماهر عسل الذى ترجم له البيان و ألقاه بالروسية) و ألغى جوازا سفرهما، وطلب منه العوده ، ولكنه رفض وتكفلت الحكومه السوقيتيه بمصاريف اكمال دراسته .
      تروج من الطالبه الروسيه ساشاكور ساكوفا ام ولديه شهدى وفريد اللذين سميا على اسماء شهيدى الحركه الشيوعيه المصريه ، شهدى عطيه الشافعى وفريد حداد .
           
     فى العام 1963حدثت مشاحنة بينه و بين انسان تصور نجيب انه يهينه. و تدخل رجال الشرطة و حاولوا اقتياده .و كان نجيب قوى البنية فتخلص منهم بقوة ، اعتبر ذلك مقاومة , واجتمعوا عليه و اقتادوه الى مبنى الشرطة حيث اوسعوه ضربا. و قال نجيب و هو يروى هذه الواقعة: لقد بكيت آنذاك ليس من الألم بل على انهيار المثال و احسست انه لا فرق , فكلها اجهزة قمع, و انما نحن الذين صدقنا الاوهام عن "انسانية الاشتراكية" .وكان نجيب يقول قولته المأثوره  "لكل ثوره معاويه" والثورة الاشتراكية انتهت بعد ان استولى عليها معاويه . كان شديد الرمانسية وتحطم المثال امام عينيه ، فارتبك.
      ترك الاتحاد السوفيتى الى المجر،وعمل بالاذاعه،ولكن عاوده الاحساس الذى سيطر عليه  دائما بتغلغل النفوذ  الصهيونى  فى كل مكان.
    تشرد وجاع وقرر العوده الى القاهرة

"يا مصر يا وطنى الحبيب!
يا عش عصفور رمته الريح فى عش غريب,
يا مرفأى آت انا آت.. و لو
فى جسمى المهزول آلاف الجراح..
و كما ذهبت مع الرياح..
يوما اعود مع الرياح..
و متى تهب الريح؟ أو هبت..
فهل تأتى بما يهوى الشراع؟
ها انت تصبح فى الضياع..
فى اليأس.. شاة عاجزة..
ماذا لها ان سلت السكين غير المعجزة؟!

      فى العام 1964 كانت مصر والقاهرة تمر بازهى عصورها الثقافية وخاصه فى المسرح . ميخائيل رومان وعبد الرحمن الشرقاوى ونعمان عاشور وسعد الدين وهبه مؤلفين . حمدي غبث وكرم مطاوع وسعد أردش مخرجين .وعبدالله غيث وسميحه ايوب ومحسنه توفيق و سناء جميل ممثلين  . محمود امين العالم  وصافيناز كاظم وعبد القادر القط ورجاء النقاش نقاد. كانت حياه ثقافيه رائعه احتضنت نجيب سرور  الذى عاد فقد كان  مؤلفا وممثلا ومخرجا وناقدا ايضا.
 
      كان يجيد القاء الشعر خاصة شعره ، و قد اجتمعت له ملكة الصوت الجهير العميق, مع القدرة على التحكم بمخارج الالفاظ. و لم يكن يقرأ الشعر بل يعيشه، مؤديا بصوته أدوار الشخصيات المختلفة , أو مختلف العواطف، و حتى الأبيات العادية، كانت تنبض بالمشاعر الجياشة فى القاء نجيب بصوته المتفرد , و تهزك الى الاعماق .

      بعد موت عبد الناصر فصل من عمله وتشرد وجاع  ، مريضا مفلسا وحيدا ، بعد ان ذهبت زوجته الى موسكو لرعاية ولديه وتعليمهم بعد سدت ابواب العيش امام الاسرة  ، كوميديا سوداء كتبها عن ايلول الاسود واخرجها  . منعت الرقابة عرضها.  قبضت عليه الشرطة شاردا مهلهل الثياب، فقال لهم انه الشاعر نجيب سرور الممثل والمخرج المسرحى والاستاذ المفصول من اكاديميه الفنون، فاودعوه مستشفى الامراض العقليه ،  وهم يعلمون انه صادق ، تخلصا منه كشاعر معارض سليط اللسان، وكان قد بدأ فى كتابه واذاعة رباعيات"…..اميات نجيب سرور" التي كان يهجو فيها السلطة والمجتمع والمثقفين والعملاء بصياغه غير قابله للنشر . قام ابنه شهدى بعد وفاته بعشرين عاما بنشرها على النت ، الامر الذى عرضه للسجن.

        ذات مساء فى بيتنا ، ونجيب سرور فى ضيافتنا وحضر بعض الاصدقاء والشاعر احمد فؤاد نجم . وتداعى نجيب سرور، فكتم بعض الاصدقاء الضحك ، واذ باحمد فؤاد نجم  - الضاحك دائما - ينفعل ويظهر عليه الالم  والغضب ويقول :
  - عيب عليكم ، ده احسن شاعر جابته مصر
    و بكى…….

        فى 27 اكتوبر 1978  صدرت جريده الاهرام وفى أهم صفحة فيها ،الصفحه الاخيرة التي كان يشرف عليها كمال الملاخ خبربعرض الصفحة عن وفاه عازف الجيتار ابن توفيق الحكيم، لا اتذكر اسمه ،واحتل الموضوع كامل الصفحة . وفى احدى الصفحات الداخلية خبر من ثلاث اسطر "توفى من ثلاثه ايام الشاعر نجيب سرور فى منزل أخيه بقرية أخطاب عن عمر يناهز 46 عاما."