الخميس، 28 أكتوبر، 2010

بمناسبة الانتخابات

  
       خرجت مصر منتصرة بعد انسحاب قوات  العدوان الثلاثي على مصر  العام 1956 . وفى صيف 1957 اجريت اول انتخابات برلمانية بعد قيام ثورة 1952، كان .الاتحاد القومي هو التنظيم السياسى  الذى انشأته الثورة بعد تجربة فاشلة لهيئة  التحريرالذى سيطر عليها اعداء النظام..  . . الاخوان المسلمون فى السجون بعد محاولة اغتيال عبد الناصر . وحزب الوفد مات بعد محاكمات الفساد ، وباقي الاحزاب اختفت من الوجود ..وبقي الشيوعييون كقوة سياسية حاضرة فى الجامعة والمصانع بشبرا الخيمة والمحلة وكفر الدوار وغيرها  ، وخاصة بعد الدور المشرف  الذى قامت به مختلف التنظيمات الشيوعية  فى المقاومة الشعبية ضد  العدوان على  بور سعيد .  كان عدد من التنظيمات قد توحد فيما يسمى الحزب الشيوعي المتحد ، وبقيت منظمة طليعة العمال والفلاحيين خارج هذا الاتحاد ، ومعها  عدد كبير من التنظيمات الصغيرة   ، ما تعدش ... كل ثلاثة يعملوا تكتل فانفصال  فتنظيم جديد ..ولكن كان  تاثير الشيوعيين كبيرا  فى الشارع المصري  والمصانع والنقابات العمالية .

       كان للحكومة ، ممثلة فى الاتحاد القومي لها  حق الاعتراض على اي مرشح يتقدم للانتخابات . وبالفعل اعترضت على كل المرشحين الشيوعيين ، طه سعد عثمان وحسين توفيق طلعت وحلمي ياسين  وغيرهم وابقت فقط على الدكتور عبد العظيم انيس   المرشح فى دائرة الوايلى.... الدائرة اللي انا اتولدت  ومتربى  فيها .

      عبد العظيم انيس من مواليد 1923  فى حي الازهر، من عائلة لها ثمانية ابناء.. اربعة ذكور واربعة اناث ، كان  عبد العظيم اصغرهم . انتقلت العائلة بعد ذلك  الى حي العباسية  . وفى اثناء دراسته الثانوية اعتقل فى مظاهرات 1936 وسنة 13 عاما . اتم دراسته الثانوية سنة 1940 . والتحق  بكلية العلوم .. وكان فعالا فى اللجنة  الوطنية للطلبة والعمال التي قامت بمظاهرات ضد حكومة اسماعيل صدقي ، وتم القبض علية واودع السجن فترة . وتم اعتقاله مجددا خلال المشاركة فى الاحداث التي اعقبت حرب فلسطين ، وامضى فى السجن سنة ونصف . خرج لاستكمال دراسته العليا فى انجلترا ، حيث حصل على الدكتوراة من الكلية الملكية للرياضيات الاحصائية بجامعة لندن  فى العام 1951 وعمل مدرسا فيها . استقال من جامعة لندن  احتجاجا على العدوان الثلاثى على مصر وعاد . عمل  بالتدريس فى جامعة القاهرة...... فصل من الجامعة فى العام 1954ضمن  حملة تطهير الجامعات من الاساتذة اصحاب الميول السياسية......واصدر مع صديق عمرة محمود امين العالم "فى الثقافة المصرية" العام 1955 الذى اثارضجة فى عالم الادب ... ثم عمل  كاتبا فى جريدة المساء التى انشئت العام 1956 خلال مرحلة تامييم قناة السويس ، ونولى مسؤليتها خالد محى الدين بعد عودتة من المنفى ...   فهو عالم رياضيات وناقد ادبي وباحث فى التراث ومفكر ماركسى  ،  وسنه 34عاما   .. عبد الناصر رئيس الجمهورية  فى ذلك الوقت كان  سنة 39 عاما !!!!!!!

        كان مرشح الاتحاد القومي فى الدائرة امام الدكتور انيس عبد العزيز مصطفى  من نقابة  عمال الترام..... واغلب هؤلاء العمال  يعيشون  فى العباسية ، حيث مخزن الترام . بالاضافة الى عدد اخر  من المرشحين ليس لهم قوة ملحوظة .  التف شباب الحى حول عبد العظيم انيس وقاموا بحملة الدعاية  والتوعية الانتخابية فى الدائرة، واسس فى كل منطقة مقر انتخابي يجتمع فبه النشطاء والمؤيدون. ..لم يكن عبد العظيم انيس عضوا فى الحزب الشيوعي الموحد  الذى رفض تأييده وقرر  الوقوف خلف  عبد العزيز مصطفى !!! وقامت منظمة طليعة العمال والفلاحين بتاييد عبد العظيم انيس، حين تبنى برنامجها الانتخابى  ، وشارك  كثير من كوادرها مع شباب الحى وخاصة الطلبة فى الدعاية والتوعية الانتخابية  ...,لاحظ هنا شبوعبون بؤبدون عبد العزيز مصطفى لمجرد انه عامل..... وشيوعيون بؤيدون عبد العظيم  انيس لانة كادر  شيوعي وطنى  مثقف .

      وجرت الانتخابات وحصل عبد العظيم على اعلى الاصوات ، ولكن اقل من 50 % ، وجاء الثانى  عبد العزيز مصطفى ، بعده بفارق كبير فى الاصوات .  وكان لابد من الاعادة ...  وفى مرحلة اعادة الانتخابات   قرر الحزب الشيوعي المتحد  ترك الحرية لكل عضو بتأييد من يراه!!!!.  كل واحد وشوقه  !! ..انحازت الحكومة بكل اجهزتها  بالطبع لعبد العزيز مضطفى، وكان عبد الرحمن عشوب رئيس قسم مكافحة الشيوعية فى وزارة الداخلية يقود حملته الانتخابية ، ومتواجد يوميا فى الدائرة هو ومعاونوة . فكل شيوعيو البلد اتلموا فى دايرة واحده تحت عينه!!!

       انحازت جماهير الوايلى بشكل واضح  لعبد العظيم  انيس .. واقيم سرادق انتخابي فى ميدان الوابلية حضرة ما لا يقل عن عشرة الاف انسان،  شباب ورجال ونساء وصبية وصبايا .واطفال .....ناس اول مرة فى حياتها تحضر مؤتمر سياسى ...وتسمع ناس بتتكلم بالقاف والنون ....مهرجان سياسى يفرح ....وبدأت الخطب ، وكنت ضمن منظمي المنصة مع بعض النشطاء  فى حملة الدعاية لعبد العظيم انيس.......  وتوالى الخطباء  ...وعندما قام  مقدم الحفل واعلن  فى الميكروفون:  والان تستمعون الى كلمة بنت من الوايلى !!! ..وعينك ما تشوف الا النور!!!!!!! .كرسى فى الكلوب بالمعنى الحرفى وليس المجازى.... .و.جحافل من الجنود يهجمون على مدخل  السرادق ضربا بالعصي والناس دورت الجري الى ناحة المنصة للهرب ،والستات  اللى اول مرة تحضر مؤتمر سياسى   تصوت ، والعيال تصرخ والشباب والرجال يعيقون تقدم العسكر برمى الكراسى عليهم   ، والساحة بقت كراسى  مقلوبة وجزم وشباشب  ملهاش صاحب ...وبقت بوليكة   ..وجدتني امسك بيد الصبية الرقيقة اللى كانت حتلقى كلمة  بنات الوايلى ، واخذنا فى الجرى  ليس من الجنود ..ولكن فى اتجاه الجنود  عكس  الناس كلها  ... هبل ما بعدة هبل .. .لقطوني وعلى البوكس حطوني وعلى قسم الوايلى حجزوني ..كنا حوالى 100 فرد تم القبض عليهم ، فيهم يوسف درويش ونبيل الهلالي ومجدي ابو العلا  وكان ساعتها وكيل نيابة... اربع خمس ساعات فى الحجز .....وروحوا  .والليلة اتقفلت !!

         وبعدها بايام ، جرت انتخابات الاعادة ، والفرز ثانى يوم الصبح ، ده كان النظام !!!!. وكنت مندوب عبد العظيم ضمن اخرين فى لجنة الفرز . تم فرز الصناديق الخاصة بالمنطقة الشعبية فى حى الوايلى وعبد العظيم مكتسح باكثر من 80%من الاصوات ...لدرجة ان بعض الزملاء خرجوا يحتفلوا بالنصر المبين.... وصلنا الظهر ..ثم بدا فرز النصف الثاني من الصناديق الخاصة بمنطقة الذوات فى العباسية ..منطقة سكن الطبقة الوسطى.اللى احنا وعائلة عبد العظيم  الكبيرة بنتخب فيها ... . كانو حوالى 40 صندوق ....الصندوق الاول عبد العظيم 8 اصوات وعبد العزيز مصطفى 390 صوت...... الثاني 420 عبد العزيز مصطفى  ولا شئ لعبد العظيم انيس  ... الثالث ...الرابع ...الخامس.. بان الملعوب ... اتضحت الامور ،وتأكد ما سبق قولة من الشباب الذين كانوا يتابعون قسم البوليس طوال الليل من شباك منزل مجاور: ان الصناديق تم تغيرها فى الفجر !!! غادرنا لجنة الفرز قبل الانتهاء  فرز باقى الصناديق ... كسب عبد العزيز مصطفى الانتخابات  وكان اول المهنئين عبد الرحمن عشوب رئيس قسم مكافحة الشيوعية فى وزارة الداخلية ..
وخرجنا من المعركة حزانى غاضبيين !!!


         فتكوا فى الكلام ، الصبية الجميلة الرقيقة اللي مسكت ايدها وكانت حتلقى كلمة بنات الوايلى وجرينا فى اتجاه العسكر واتقفشت يومها , اتجوزنا  انا وهي بعد اريع سنين  ..، وخلفنا  عزة ووائل .....عزة جابت   مريم ونادية .....مريم 18سنة كاتبة قصة ، تكتب بالانجليزية ، ولها مدونة ، ولها مجاولات شعرية جميلة وتشارك فى  اخراج مسرح وسينما ، ونادية 14سنةعازفة بيانو وترومبيت وتغنى وتمثل .. ووائل جاب احمد .12سنه...وبدلعة دودا... اللي  المدونة دي على اسمه ...وهو لاعب كرة واعد ورجلة الان فى الجبس  وبيعزف جيتار  وصوتة جميل وودنه موسيقية  .  .فتكوا فى الكلام برده .... الصبية الجميلة الرقيقة اللي كانت حتقول كلمة بنات الوايلى و مسكت ايدها وجرينا سوا فى اتجاه العسكر ودخلت بعدها كلية الزراعة ، ولها اهتمام ونشاط كبير بالشان العام ...الصبية  الجميلة الرقيقة زوجتى العزيزة .هي الفنانة الرائعة  محسنة توفيق .
                                             


السبت، 23 أكتوبر، 2010

ابدأ من ثانيا


     صديقي الشاعر مريد البرغوثي له مقولة ذكية جدا
  من السهل  طمس الحقيقة بحيلة  بسيطة ....ابدا حكايتك من" ثانيا"

  نحن ضحايا الحرب والعنف ، لم نعرف عاما واحدا او شهرا واحدا لم تبك فيه امهاتنا ابناءهن !
هذا ما قالة اسحق رابين فى احتفال توقيع اتفاقية  اوسلو !! امام عرفات وكلينتون .

   ومريد البرغوثي يقول فى رايت رام الله :
   نعم.هذا ما فعلة رابين بكل بساطة .لقد اهمل الحديث عما جرى " اولا " يكفي ان تبدا حكايتك من ثانيا حتى ينقلب العالم !

 ابدا حكايتك من ثانيا تصبح سهام الهنود الحمر هي المجرمة الاصلية ، وبنادق البيض هي الضحية الكاملة !

و يكفي ان تبدأ حكايتك من ثانيا حتى يصبح غضب السود على الرجل الابيض هو الفعل الوحشي !

يكفي ان تبدأ حكايتك من ثانيا حتى يصبح غاندي هو المسؤول عن ماّسى البريطانيين ! .يكفي ان تبدأ حكايتك من ثانيا حتى يصبح الفيتنامي المحروق هو الذي اساء الى انسانية النابالم!  يكفي ان تبدا حكايتك من ثانيا حتى تصبح ستي ام عطا هي المجرمة و ارييل شارون هو ضحيتها!!!
هاهم الاسرائيليون يحتلون دَوْرَنا كضحية:ويقدموننا بصفتنا قَتَلَة !اسرائيل !

قال رابين  :
- ان توقيع اعلان المبادئ ليس سهلا بالنسبة لي كمحارب في جيش اسرائيل و في حروبها و لا لشعب اسرائيل و لا لليهود في الدياسبورا!!

    منازلهم المبنية فوق منازلنا تعلن بشهامة نادرة استعدادها " لتفهُّم" هوايتنا الغريبة في سكنى المخيمات المبعثرة في شتات الالهة و الذباب.
كأننا كنا نرجوهم ان يطردونا من منازلنا و نتوسل اليهم ان يرسلوا بولدوزراتهم لهدمها امام اعيننا!
بنادقهم الكريمة في دير ياسين "تغفر" لنا انها كومت اجسادنا في ساعة غروبٍ هناك ذات يوم!
طائراتهم الحربية "تسامح" مقابر شهدائنا في بيروت.!!
جنودهم يسامحون قابلية عظام مراهقينا للكسر اذا ما دقها احدهم بحجر ضخم!

هذا تعبير اخاذ من الشاعر مريد البرغوتى  عن كيف تزيف الحقيقة   اذا بدأت الحكاية من ثانيا .

واضيف:

-   الفلسطينيون يقومون بعمليات عنف ضد اسرائيل ، هذه الجملة  اذا جاءت اولا تطمس الحقيقة ...من المفروض ان تاتي ثانيا ، ويكون اولا   "كتب القتال على الذين اخرجوا من ديارهم"  دة كلام ربنا ..

-   سيد البدوي المالك لجريدة الدستور أبعد ابراهيم عيسى من رئاسة التحرير ، هذة الجملة لا تصلح ان تاتي اولا فى الحكاية ،  انها ثانيا ........اولا سيد البدوي اشترى الدستور عشان يقفل الجريدة ، وضمن الخطة المرسومة لتمهيد الارض وإسكات كل رأى حر معارض، قبل الانتخابات وضرب ايران!

-   كامليا راحت الازهر عشان تعلن اسلامها...اذا اردت   الحقيقة ...هذه الجملة  تقع ثانيا فى الحكاية .....اولا زوج  كامليا مطلع دينها وعايزة تتطلق منه ، ولان الطلاق عند المسيحين محال الا لعلة الزنا،  فاسهل طريقة انها تعلن اسلامها وتتطلق منه غصب عن عينه.

-   الحزب الوطني صاحب الاغلبية الكاسحة فى اي انتخابات تشريعية ..كذب ...واذا جاءت هذة الجملة ثانيا تكشف الحقيقة ...واولا الانتخابات تزور علنا لصالح الحزب الوطني قبل ان تبدا الانتخابات ، والباقي كلة تفاصيل مملة لا لزوم لها !!!

-   القيض على ابو العز الحريري فى قضية .... ، الجملة دي لوحدها لا تكشف حقيقة الحكاية  ، دي ثانيا ، اولا ابو العز الحريري عرض برئيس حزب التجمع رفعت السعيد ، ورئيس حزب التجمع اليساري المعارض واصل على الحكومة ،وكلمته مسموعة فى وزارة الداخلية ، كلمهم يقرصوا ودنه .......وشيلنى واشيلك

-  بعد اعادة محاكمة هشام طلعت والسكرى المتهمين بالتحريض وقتل سوزان تميم ، خفف الحكم من الاعدام الى  السجن المؤيد ... .غير مفهومة الا اذا سبقها اولا ...اللي له ظهر ما يضربش على بطنه!

-   انتحار مواطن بشنق نفسة فى محل العمل  خبر يبدا الحكاية من ثانيا...يحب ان يبدا من  اولا  : عجز مواطن عن اطعام اطفاله فقام  بشنق نفسة فى محل العمل!

-  وصل ثمن  كيلو اللحم الى  70 جنيه  ، هذة الجملة ثانيا . ونبدأ باولا عشان الامور تبقى واضحة  :  فقد الجنيه المصرى فى السنوات الاخيرة اكثر من 70% من قدرته  الشرائية ، هنا تصبح  الجملة مفهومة ومستقيمة 

-  قام الغزاوية بحفر مئات الانفاق لتهريب البضائع من مصر لغزة ، واعتبرت  مصر ذلك انتهاكا لحدودها ،  بالعقل كده مش ممكن تكون دي الحقيقة ، دي ثابنا بامتياز  ...اشمعنى السودان او ليبيا ما حفرتش انفاق  على الحدود مع مصر ... لية ما فيش اي دولة فى العالم بتحفر انفاق بينها وبين جيرانها ،لان .اول الحكاية .. السلطات المصرية تحكم الحصار والتجويع  على قطاع غزة ، تنفيذا لتعليمات اسرائيل وعباس ، لتركيع حماس ووشعب غزه.

-   اسكوتى مش بنت اختي إتجوزت جوازة صقع ... املة عقبال اولادك
-   والعريس ده ... بيشتغل اية؟؟
-   تاجر كبير  ياختى ..مهنيها ومستتها ومش مخليها محتاجة حاجة
-   ربنا يوعدنا ...بيتاجر فى اية ياختى
-   والله ما انا عارفة
-   يعنى محلة فين ؟ فى شارع اية ؟؟؟
-   بيقولوا ما لوش محل !!
-   مالوش محل ازاى؟؟؟........ لية هو بيبيع اية ؟؟؟
-  واللة مانا عارفة.بس هو حويط ،عمرهم ما عرفوا يثبتوا علية حاجه!!

الحوار بدا من ثانيا !!!  عشان مطلوب  اخفاء ان العريس بيتاجر فى الصنف .

-   ظهر الراقي الشرعي فايز القثامي في قضية المتهمين بالفساد الإداري والمالي  ومن بينهم قاض في محكمة المدينة المنورة يدعي تعرضه للسحر على يد الوسيط الهارب. وروى القثامي بأنه استنطق الجنى الذي تلبس القاضي المسحور، وذلك في جلسة رقية بحضور أعضاء لجنة السحر في هيئة الأمر بالمعروف والنهي عن المنكر. وقد طلب رئس المحكمة من الراقي الشرعي اعداد خطاب يتضمن المعلومات التى اوردها الجنى !!!!
   الخبر بدأ من ثانيا لذلك جاءت  الحكاية غير مفهومة وغير معقولة  وغير مقبولة..وقابلة للسخرية .
   وكان يجب ان تبدا من  اولا : السعودية تحكم بالفكر الوهابي السلفى وجماعة الامر بالمعروف والنهى عن المنكر لها الكلمة العليا فى البلاد ،  وحيث ان الاسلام يقر بالسحر والجن، والانسان لا يعيش  وحدة على الارض والجن ساكن  معاه.   وحين تسبق هذة  الجملة  ظهور الراقي الشرعي فايز القتامى  واستنطاقه للجن ، تخلى كل واحد يحاسب على كلامة .  ويحترم نفسة  وما يتريقش . دى عالم بتستخدم الكلام دة لمصلحتها  ، وعايشة على كدة ..


    الامثلة كثيرة عن كيف تطمس الحقيقة اذا بدأت الحكاية من ثانيا ،  وهذا البوست مفتوح ، ويمكن للاصدقاء اثراء هذا الموضوع بكتابة حكايات او اخبار بدأت من ثانيا لطمس الحقيقة، ساقوم بايرادها  منسوبة الى محررها .


واضافت الصديقة شامبونجو :Shmoponga Republic

 -  التحرش يملأ شوارعنا ده خبر بدأ من ثانيا ... الخبر مفروض يبدأ ب المغالاة
 في المهور و الطلبات التعجيزية للآباء و الأمهات.


- الحجاب يلف بنات مصر شرقا و غربا
ده خبر بدأ من ثانيا الخبر مفروض يبدأ من سماحنا للثقافة الوهابية بالتغلغل في اساسات مجتمعية لم يكن ابدا من السهل كسرها او اختراقها.

 - الحشيش اصبح اكثر طلبا عند المصريين
الخبر بدأ بثانيا
الخبر مفروض يبدأ بأولا : مصر في الغيبوبة من تلاتين سنة و محتاجة حشيش يفوقها.


واضافت الصديقة   Arwa Marei 
           Arwa Marei    

المواطن علي السيد علي خضر  قام بقتل زوجته عايده ابراهيم جمال هذة ثانيا اضغط على  اولا لتعرف الحقيقة..


الجمعة، 15 أكتوبر، 2010

قبائلنا تسترد مفاتنها


    قبائلنا تستردّ مفاتنها
    في زمان انقراض القبائل 

 الْأَعْرَابُ أَشَدُّ كُفْرًا وَنِفَاقًا وَأَجْدَرُ أَلَّا يَعْلَمُوا حُدُودَ مَا أَنْزَلَ اللَّهُ عَلَى رَسُولِهِ وَاللَّهُ عَلِيمٌ حَكِيمٌ {التوبة: 97} وتفسير تلك الآية هو أن الأعراب  أشد جحودا لتوحيد الله وأشد نفاقا من أهل الحضر في القرى والأمصار وذلك بسبب جفائهم وقسوة قلوبهم وقلة مشاهدتهم لأهل الخير،  فهم لذلك أقسى قلوبا وأقل علما ..
الاعراب هم البدو .
      تعرض بن خلدون للعمران البشري على العموم مبينا أثر البيئة في الكائنات البشرية . وتطرق لأنواع العمران البشري تبعا لنمط حياة البشر وأساليبهم الإنتاجية "نمط الانتاج " قائلا: ان اختلاف الأجيال في أحوالهم انما هو باختلاف نحلتهم في المعاش. مبتدئا بالعمران البدوي باعتباره أسلوب الإنتاج الأولي الذي لا يرمي إلى الكثير من تحقيق ما هو ضروري للحياة ...ان اهل البدو المنتحلون للمعاش الطبيعي... وانهم مقتصرون على الضروري من الاقوات والملابس والمساكن وسائر الأحوال والعوائد..الخ
           منذ تولى محمد على حكم مصر وبدأ فى بناء الدولة الحديثة من200 سنة تقريبا ، وفى نفس تاريخ بناء الدولة الحديثة فى اليابان"شوف احنا فين واليابان فين "، وبلغت الدولة ذروه نهوضها الفكري  فى ثورة 1919. حبث تلاشت تقريبا كل اشكال العصبية الطائفية ، وتعايش المسلمون والاقباط حياة حديثة متقدمة هدفها بناء الامة المصرية  . امة مواطنين يخضعون لقانون واحد ، لهم نفس الحقوق وعليهم نفس الواجبات  . وتطور المجتمع من مجتمع زراعي  ، وصل الى حد نمط الانتاج الصناعي.. وقضى على العصبية القبلية والطائفية.  وجاء عبد الناصر ونجح فى وضع اساس نهضة اقتصادية مستقلة.. وفى 1973 كان قائد الجيش الثاني الميداني الذى عبر وحطم خط بارليف اللواء فؤاد عزيز غالى  القبطي.. ... ولكن اتفاقية السلام مع اسرائيل اوقفت  التقدم وزرعت بذور الطائفية "وتلك قصة اخرى ".
      وبارتفاع اسعار البترول بعد  1973 ، وهجرة اعداد كبيرة من المصريين الى دول النفط ،  عادوا يحملون ثقافة البدو "الفكر الوهابي" .       

ولاننا أمة تؤثر فينا تقاليدنا وموروثاتنا الاجتماعية وأعرافنا تأثيرا كبيراً، حسنها وسيئها، فقد ورثنا إلى جانب المروءة والشجاعة والكرم، العصبية القبلية  والطائفية التي عادت فى ابشع اشكالها ،و تكاد تعصف بكل موروثاتنا الحميدة الأخرى. حيث أضحت تصنيفا اجتماعيا قاسيا وغالبا  يؤخذ به أكثر من العدالة والحق والتسامح ، وانقسم المجتمع الى قبائل يلوذ كل بقبيلتة  او طائفته . انحد

رنا وكنا على مشارف المجتمع  الحديث ، الى المجتمع  شبه البدوي. فاسمع على التويتر ومن من يعيش فى المدينة ويتعامل مع الكومبيوتر  من يقول مفاخرا "  ذهبت الى شيخ القبيلة" .بل وصل الامر  بان الدولة لا تعمل بالقانون بل تطبق القانون العرفي البدوي فى حالات كثيرة . وكم من عائلات هجروا من قراهم اثر حكم عرفي . ترى  هل انحدرت مصر الى عصر البداوة والقبائل فى زمان انقراض القبائل ؟؟؟ هل سادت قيم وتقاليد  قبائل الاطراف على قيم سواد اهل الوادي ؟؟؟




    القبائل لا تعرف الولاء للوطن، تؤمن فقط بالولاء للقبيلة ..حين برتقي الانسان يتخلص من ولاءه للقبيلة ويصبح ولاءة للوطن ،وحين يرتقى اكثر يصبح ولاءة للبشرية كلها  ينحاز للحق والعدل، للفقراء والمرأة،ينحاز لكل ما هو طيب واصيل فى حياة البشر ..



     الفكرة تدور بخاطرى، ولانى لا املك موهبة التعبير ، واعتقد ان الفكرة رغم الفذلكة التاريخية وابن خلدون ، لم تتضح. ولكي تبين اكثر أقدم هنا ، كما يقال  فى تاريخ العلوم، نموذجا إرشاديا كاشفا :






راشيل كورى من مواليد قرية فى ولاية واشنطن، طالبة على وشك التخرج من الجامعة فى مجال الامراض العصبية ، فى عام 2003 انضمت كناشطة ضمن حركة تضامن مكونة من شباب امريكي وكندى وبريطانى، وذهبت الى قطاع غزة من اجل النضال ضد العمليات التي يقوم بها الجيش الاسرائيلى فى غزة ، وعاشت مع اسرة طبيب فلسطينى يسكن غرفتين ، تفترش الارض بجوار احدى بنات العائلة.



     فى ظهيرة 16 مارس2003،  وفى مخيم رفح للاجئين       جاء بلدوزر لهدم منزل الاخوه على ومدحت الشاعر ، فتوجهت الفتاة وسبعة من الاصدقاء الناشطين الاجانب  حاملة مكبر صوت لمحاولة منع الاسرائيليين من التقدم ، ونجحت فى تعطيلهم لمدة ساعتين... ولكن سائق البلدوزر  اقترب يريد دهسها ، فثبتت ولم تتحرك ، رغم صراخ اصدقائها لها بالهرب من امام هذا السائق المجنون  ،الذى  رفعها  بالجراف الامامي للبلدوزر والقاها على الارض وتقدم وسحقها بنصل الجرافة .





حملت فى الرابعة وسبع دقائق من تحت التراب محطمة الجمجمة والاضلاع والعمود الفقري  الى مستشفى النجار برفح ، وفى الخامسة وخمس دقائق اعلن للعالم خبر وفاة المناضلة الجميلة راشيل كورى عن عمر يناهز 23 عاما .. لم يذهب استشهادها سدا ، نقل للعالم مدى همجية الاحتلال الصهيوني ، وعلم من لم يكن يعلم بحق الفلسطينيين فى اراضيهم ، ودفع بالقضية الفلسطينية خطوة الى الامام ...ولو قدرانملة .

تم تاسيس جمعية خيرية فى غزة تحمل اسمها ، كما تم تاسيس جمعيات ومؤسسات باسمها فى عدد من دول العالم . انتج العديد من الافلام الوثائقية عن راشيل كورى والقضية التي استشهدت من اجلها .الفت مسرحية "اسمى راشيل كورى"تعتمد على خطاباتها ومذكراتها وعرضت فى لندن واماكن اخرى ..
     هذا نموذج لانسان امن بقضية لا يربطة بها دين او وطن او عائلة او قبيلة ،نموزج لانسان راقى انحاز للحق ودفع حياتة فى سبيل اعلاءه,..واعلنت  أمام العالم وباعلى الصوت  : انا شهيدة منذ قررت القدوم للدفاع عن المظلومين ،انا شهيدة عندما قررت الوقوف امام البلدوزر اللعين  لمنع هدم منزل اصدقائى ، انا شهيدة امام اللة وهو شاهد وشهيد 
        هل يجوز الترحم على راشيل كورى وقراءة الفاتحة على روحها الطاهرة والصلاة عليها ، سيقول الانسان المتعصب المتخلف بدوى الفكر:  لا يجوز ذلك على المذاهب الاربعة ، لانها ليست من الملة ، ولا يجوز عليها الرحمة .... وهذا هو الفارق..

الأربعاء، 6 أكتوبر، 2010

ما هواش إبن حرام


    
      
  
       فى الريف تعيش الأسرة فى بيت مشترك يسمى الدار ، كل ما عيل يكبر ويتجوز يبنوا له أوضه ، والدار توسع وتوسع  ، يعيشون حياة مشتركة .. يتعاونون فى زراعة  الارض الموروثة …والمحصول  يكفي الاسرة، اللي بتكبر باستمرار ، بالكاد .

      جلس صبيان صغيران من أفراد الأسرة يلعبون فى التراب  بجوار الترعة.
-  بيقولوا ستي لما كانت  صغيرة كانت حلوة قوى !!
-  ماهي لسه حلوة يا وله ، بس عجزت ..عجزت قوى ..
-  بيقولوا كمان وهى صغيرة كانت حاجة ثانية ….حاجة ثانية خالص ..وبيقولوا عليها كمان إنها كانت  ملعب !! 
-  يا واد عيب اسكت ماتقولش الكلام  ده على  ستك   لأقول لابوك ..
-  وبيقولوا كمان ان عمك جنيدى  ده  لامؤاخذة ابن حرام !!!
-  قوم يا ولة جاك خابط فى نافوخك ، إنت قليل الأدب... والله لأقول لأبوك.
-  إتنيل كده ….دانا سمعت الكلام دة من  عمتك  هانم .

         الست الكبيرة الأم فعلا عجزت ….عجزت قوى  ، يمكن  دلوقتى تكون  اكبر واحدة فى البلد ..شعرها ابيض ناعم ، لما تفكة يغطى ظهرها  .. جسمها حلو وعفى.. فرع وطويل  كما  نخلة  .  رغم سنها  ما زالت  يانعة  وجميلة  وشهية وزكية  ، وجهها قمر 14 ، وضحكتها بهية .  إتجوزت كتير… لكن ما بيعشلهاش رجالة …تخلف  من هنا وجوزها ياى باى من هنا … خلفت كثير …كتبر قوى ، ما عش لهاش غير ابنها  جنيدى الكبير  والبحر اللي فوق راسه على طول … جنيدى أتجوز وخلف  عيلين …..عيل منهم  طفش وهاجر اول ما كبر …والبحر أخوة  ، ما شاء الله عنده عيال ما تعدش ..  ، متجوز تلاته  …وعياله كبروا  واتجوزوا  وخلفوا  عيال ملوا الدار   .. أول  ما  العيل  يكبر شوية يبنولة اوضة ويجوزة فيها . الدار بقى فيها أكتر من أربعين نفس … جنيدى وإبنة ومراته فى أوضة ….والبحر  واخد تلات أوض، لكل زوجة أوضة …واولادة المتجوزين واخدين الباقي. الست الكبيرة قاعدة فى القاعة الخشب اللي فوق الدار.. ولما كبرت قوى بقت لا تطلع ولا تنزل …اذا افتكروها يطلعولها اي حاجة ..

     حسن، أصغر عيال البحر ،   هو  دايما  اللي ببطلع يشق عليها ، ويقعد معاها  ….  بيحبها قوى  ، وهى كمان  بتحبه ، وتحكى له حكاياتها وحكايات البلد   ، ويقعدوا  بالساعات يحكوا .

-  يا ستى أنا بحبك قوى ، ومش عاوز أسيبك ابدا ،ولا لحظة واحدة ..كل ما ببعد عنك  يشتاق لك …. عاوز افضل جنبك على طول..
تخده فى حضنها :
- وأنا كمان بحبك يا حسن اكتر من الخلق دي كلها،  دة ماحدش  بيفكر فيا الا انت يا ضنايا
……..
- عاوز أسالك سؤال يا ستى محيرنى …بس مختشى !!
  أسال يا حسن :
-  عمى جنيدى !!
-  ماله ؟
 -  إبن مين ؟؟
-  يوة  ..إبني طبعا  ……اية السؤال العجيب  دة !!!؟؟
-  قصدي مين أبوة …أصل العيال  بيقولوا..
-  أبوة يا حسن…. عمك رضوان اللة يرحمه … ياعينى …كان راجل حليوة  وفرع  ..صعيدي جدع وشاطر… هو اللي بنى الدار   ….مات بعد ما خلفت  جنيدى على طول … 
-  بس فيه كلام بيتنطور هنا وهنا .. العيال بتقولة !!
-  كلام إيه يا حسن ؟؟؟
-  بيقولوا  ان عمى جنيدى   ….. إبن حرام ..!!
-  اخص.. تصدق حاجة كدة على ستك ياحسن   عيب يا ولدى ستك طول عمرها شريفة عمرها ما عرفت  الحرام ، قلهم يا حسن عيب …طول عمر ستى  سيرتها مسك  …با ولداه  ياجنيدى يا ابنى ، صعبان عليا يا ضنايا   … وعشان كدة  هو وابنة واخدين جنب ….
-   ابنة  رزل يا ستى  ومكرة العيال فية ….وعايز يهج و يسيب الدار…
-   مقهور يا كبدي  .. مش مبسوط .. أبقى وده  يا حسن..
-   بحاول واللة يا ستى ، انا بحبة بس هو عصبى ،  وروحة فى منخيرة..
-   معليش يا حسن استحمله …انت العاقل اللي فيهم..الواد أتعقد و  حاسس إنكم  متميزين عنة…. وولاد  اخوك عثمان  …مش طايقينة ….بيغلسوا علية يوماتى … 
-   وانتي عرفتى منين يا ستى ؟؟؟
-   انا يابني شافية كل حاجة وساكتة…. ومش عارفة اعمل اية ؟؟؟؟

       العيلة كل  رجالتها ونسوانها وعيالها  بتشترك فى زراعة فدانين الارض … اللي يسقى.. واللي يحرث.. واللي يعزق.. واللي تملا ماية ..واللي تحلب ..واللي تخبز  .. واللي يربى  فراخ ..واللي يخيط هدوم واللي يبيع ويشترى …. الكل  بيشتغل ويشقى ويادوب بيكلوا…ويدبروا مال الحكومة .. وكل سنة اذا فضل حاجة يبتوا اوضة لعيل يتجوز فيها ، او يشوروا بنية ….  والامور ماشية كدة بقالها سنين …سنين طويله  … عيلة طول عمرها هادية فى حالها ، وعلى قلب واحد، العالم بمحترمها ،  وكل جيرانها بيحبوها ويعملوا لها الف حساب.
......

       قال جنيدى لاخية البحر  ذات صباح  وهم يروون الارض فى  الفجرية :
-  مش كنت تشور عليا برضه قبل ما تبيع  الجاموسة العشر  ؟؟
-  الجاموسة بعتها بيعة   كويسه ، ما كانتش تجيب اكتر من  كده ….. واحنا مزنوقين محتاجين فلوسها.
-    بس برضة كنت تشاورنى   … دنا اخوك الكبير..
-  ماكنش فية وقت ، البيعة حلوة  ، والشارى  كان مستعجل.. 
- انت ما باقتش تشاورنى فى حاجة ابدا يا بحر ، ما عنداكش غير  وولادك وبس ….راعى يا اخى دانا برضة الكبير ..
-  ايه موضوع الكبير ده ، كل ما اكلمك تقوللى دانا  الكبير..دانا الكبير …. اشاورك  ليه يا اخى ؟؟؟  دانتوا تلاتة انفار …واحنا اربعين …. قال الكبير قال …..سلامات يا كبير ….
……….
…………
    من يومها إنزوى جنيدى   وابنة وزوجته ……وإبتعدوا  .


وأخذ ولاد  البحر  فى السخرية من موضوع انا   الكبير؟؟انا الكبير ؟؟  ووبدا تلقيح الكلام على جنيدى وعيلته ،وبدات الهوة فى الاتساع..

    إنتاب حسن قلق شديد  ، وهو يرى الامور تزداد سوءا يوما بعد يوم ، خاصة بعد ما اخذ الصغار يتندرون بموضوع الحرام وابن الحرام …وابتعاد عمه وابنه وزوجته اكثر فاكثر …وحسن قلقه يزداد . …

      ذهب إليها :
-  انا قلقان يا ستى …وحاسس ان الدار  حتتهد على دماغنا ..
-  وانا  قلقانة زيك … الناس  طمعت  فينايا حسن  ،  وبقت سيرتنا على كل لسان ..
-  لا ابويا البحر  طايق عمى جنيدى …ولا عمى جنيدى طايق ابويا البحر.. 
- والعيال… عيال ….مش شايفين النار المولعة ….وقاعدين ينفخوا فيها ..
-  انا خايف يمسكوا فى بعض يا ستى ، وتبقى مصيبة ….مش عارف اعمل اية ؟؟؟ما تقعديهم مع بعض قدامك وتكلميهم يا ستى …..يمكن بختشوا منك …
- الاتنين يا حسن  غلطوا …. غلطوا جامد  فى بعض …. انا عايزة اقفل مش افتح …..ما ينفعش يقعدوا  وهما شايليين من بعض كده  … البحر حيقول قال  عليا كذا وكذا  اليوم الفلانى … وجنيدى يجيب القديم والجديد… الكلام فى الموضوع بيوسع مش بيلم با حسن .
- والعمل يا ستى
-  قول لابوك البحر امك بتقولك  انت القوى  وعندك العزوة الكبيرة ....ان كنت بتعز امك صحيح ……خد اخوك جنيدى فى حضنك وطبطب علية …وقولة   ما تزعلش يا خويا …احنا مالناش بركه الا انت …..ينصلح الحال وكل شئ ينتهى….
-  ابويا البحر  راكب راسة بيقول انا ماغلطش فية…هو اللي غلط ويقعد يعدلة ..
-  قولهم امكم  بتقول   الدار ما ينفعش تتقسم …والارض ما ينفعش تتقسم ..قول لابوك  وقول لعمك امكم مش عاجبها رباية ولادكم… بتقول لكم كل واحد يربى عيالة عدل  ….اللة يكسفكم .بقيتوا عرة خلق اللة ..

     نفسى يا حسن وبدعى ربنا  ما يجيش عليا يوم واشوفهم ماسكين فى بعض …. دنا كنت اروح فيها…







السبت، 2 أكتوبر، 2010

طلع ندل وجبان يا أبيه


      دخلت بملابس المدرسة باكية، وأنا وحدى بالمنزل. أطفالى بالمدرسة ، وزوجتى بالخارج  :


-  أبلة هنا ؟
-  لا … زمانها جاية ….. مالك؟
-  مافيش …..وواصلت  البكاء و أخذت فى النشيج ، وهمت  بالخروج .
-  لا.. لا ..روقى إيه الحكاية؟    رفدوكى من المدرسة ؟
-  طلع ندل وجبان يا أبيه!!!!!!!!!! و وإستمرت قى البكاء  بحرقة أشد!!!



          صبية رقيقة جميلة ، جارة ، بنت ناس طيبين ،فى أولى ثانوى ،إسمها نجوى وبدلعوها نوجة  . دقيقة الملامح …اكس إسمول ، 36 يبقى واسع عليها …يظهر خراط البنات كان مستعجل وهى بين إيدية ،او هى من بواقى طلبية اليابان ، جسمها خطوط مستقيمة بانحناءات طفيفة ، ولا يوجد بة اقواس،مش موزّة ولا وزّة ولا بطة ….ممكن عصفورة أو فراشة… مش ممكن يتقال عليها بنت لوز ،مقبول جدا يتقال عليها  بنت صنوبر .



- مين اللى طلع ندل وجبان يا أبية ،إية الحكاية ؟؟  روقى عشان أفهم .
- ندل وجبان يا أبيه  …ندل وجبان يا أبيييييييه وتهز رأسها يمينا وشمالا …طلع متجوز يا أبييييه ………..انا مش مصدقة … وتبكى ويسيل أنفها .
قمت لإحضار بعض ورق الكلنيكس  ما لقتش، جبت رول ورق تواليت  …..وكوب مياة
- نشفى دموعك ونظفى أنفك ….إمسكى   نفسك شوية  ……..بطلى عياط عشان افهم.. اية اللى حصل؟؟  ….اشربى الاول شوية مية ..
- طلع ندل وجبان يا أبيه  …وعاودت البكاء بشدة أكثر
- مبن اللى  طلع ندل وجبان ….واحدة ..واحدة.
- مختار ،مختار يا أبيه …..طلع متجوز يا أبيه!!!
- مختار مين ؟؟
- مختار المصوراتى اللى على ناصية الشارع .
- وعر فتى منين إنه متجوز ؟
- من العامل اللى بيشتغل عنده 
وعاودت البكاء بحرقة اكثر:  طلع ندل …ندل وجبان يا أبيه..
- وعر فتى من إمتى انة متجوز ؟؟
- دلوقتى حالنا … وأنا راجعة من المدرسة ومعدية قدام المحل سألت علية  ،  بقالى يومين ما شوفتوش !!! ،العامل قاللى سافر البلد يشوف مراته ،وارتفع نشيجها…وعلا صوت بكاءها …ندل وجبان …...طلع ندل وجبان يا أبييييه…..وتبكى او تكاد تصرخ  !!
- إهدى وإحكي لى المصيبة دى حصلت إمتى؟؟ و
إزاى ؟؟؟وبالتفصيل .(اللة يخرب بيتك فى يومك اللى مش فايت ده،مصيبة واتحدفت علينا…..ابن الكلب المجرم  واللة لاحبسة)  فى سرى طبعا .
-  نجوى   …. احكى بالتفصبل
- مش عارفة ،انا كنت بشوفة من البلكونة واقف قدام المحل،مرة فى بوم اجازة ....من شهر،  وانا معدية  قولتلة صباح الخير !!!…إتبسم وقالى صباح  النور يا حلوة ..
-  وبعدين ؟؟
-  وبس ،كل ما أعدى نبتسم  لبعض…. وهدأت بعض الشئ…. طلع ندل وجبان يا أبيه!!…..طلع متجوز
-  رحتيلة المحل ؟؟؟
-  رحت أتصور ..
- وبعدين ..هاتى من الاخر ..
-  وبس !!
- يعنى اية وبس ؟؟؟؟
- مش فاهمة؟
- يعنى لمسك ؟؟   جة جنبك ؟؟؟؟؟
- ايوه … وهو بيصورنى مسك دقنى وقالى بصى الناحية دى !!!!
-  وبعدين ؟؟
- رحت خدت الصور …وقالى انا حاحتفظ بواحدة حكبرها  واعلقها فى المحل .
-  بسسسسس
-  مش فاهمة …..ايوة بسس
-  بعنى ماحصلش جاجة تانية ؟؟
-  لا…….. طلع متجوز يا أبيه !!
-  يعنى كل اللى حصل انه مسك دقنك وقالك بصى الناحية دى؟؟
- وكنا كل يوم نبتسم لبعض وانا راجعة من المدرسة، حتى بوم الجمعة كنت بنزل مخصوص عشان……
-  يعنى مختار براءة؟؟
-  براءة إزاى  يا أبيه  … دة طلع متجوز …بقولك متجوزززززززززز     متجوزززز !!!
…..  
-  هو كان بعشمك بحاجة ؟
-  لا بس كان بيحبنى جدا !
-  قالك؟؟
-   ما قلش حاجة …لكن انا  عارفة، عارفة واللة يا أبيه  !!
-  ما قالش حاجة؟؟؟؟ امال عرفتى منين ؟؟؟؟
-  لانى  بحبة…….. وهو بيحبنى جدا …… وحيعلق صورتى قدامة !!!!



        مختار إنسان ريفى بسيط  شاب متوسط التعليم وسيم طويل القامة مؤدب  (هل مفردة مؤدب تصلح صفة للشكل ،أعتقد نعم ، فية ناس شكلها مش مؤدب ) لم يبلغ الثلاثين ، باع نصيبة لإخوتة فى  ميرات والدة ، و جاء للقاهرة واشترى  المحل، لانة غاوى تصوير، ومالوش فى  الفلاحة. وأعتقد ،والشهادة للة، انة برئ حتى من مداعبة عواطف نجوى ..فنوجة تبدو لمن براها مجرد طفلة .


- دة مش متجوز بس يا نوجة ، دة متجوز ولسة مخلف ، وسافر يشوف ابنة اللى اتولد .. وهو ما قالش  اى حاجة تفهمى منها انة بيحبك ،دة انسان فلاح ما يعرفش الحركات دى ،دة اول مرة ينزل  مصر فيها   كان من سنة…مختار مالوش فى الكلام دة يا نوجة ..
- طب  لية قالى ياحلوة ؟؟؟ ,,, ولية طلب  يخلى صورتى عندة ؟؟؟وكل ما كان يشوفنى يبتسملى..خلى بيا يا أبيه ، خلى بيا …..كان منايا..



….وعادت دموعها تنساب بيأس.ثم بتدأت تهدأ.



_-   نوجة يا أجمل البنات ،واحدة حكتلى : لما كانت فى سنك ،كانت بتحب كل يوم شاب  ، أى شاب تشوفة كانت تحبة ، واحيانا كانت تحب واحد الصبح وتشوف واحد تانى بالليل تحية وتنسى الاولانى  ،وتقعد تعيط زيك كدة  . لما  تكبرى حتفتكرى  الحاجات دى وتضحكى ……وقلبك يرفرف!!
-  طب  أعمل أنا إيه    دلوقتى؟؟؟؟
-  إفضلى حبيه بس ما تخليهوش يحس ، وبعد شوية حتنسي...
-  بس مافيش أمل يا أبيه…..
-  والحب من غير أمل
    إبتسمت بأسى واكملت :
-  أسمى معانى الغرام…..!!!!!
……….
………..
……..
       ومرت سنين طويلة ،وفى السوبر ماركت الكبير  . ورغم مرور أكثر من  30 سنة  لم يختلف شكلها  كثيرا.
-  نجوى …إزيك  يا دكتورة ..ولا اقولك نوجة,,
- أبية احمد ……..إزيك… وإزاى أبله ..... ،ماعرفتكش …. شكلك إتغير …
- عجزت
- كلنا عجزنا …..السنين بتجرى .
- إنتى ما اتغيرتيش ، كأنك لسة فى  الثانوية العامة
- ربنا يخليك يا أبيه  ….دايما جابر بخاطرى
-   إنتى لسة فى الخارجية ؟؟…….بقيتى سفيرة ولا لسة
-   لا ….لسة شوية ..



   وجاء فتاتان وصبى!!


-  دول أولادى…كوثر سمتها على إسم أمى ، فى كلية الطب    .…وعلية فى الثانوية العامة …,,,ودة أخر العنقود ….مختار ……..…فى اعدادى ……….، وسبحت عيناها فى الفضاء الفسيح  ……هو كمان غاوى تصوير…!!