الخميس، 30 سبتمبر 2010

قطة


     
    
    
     صباح اليوم …وأنا بفطر لقيت الباب خبّت ..
إية ده ؟    مين اللى بيخبط ؟؟؟      دى مارينا فضيت… ما فيهاش حد غيرى انا وزوجتى.. وزوجتى نايمة فوق . قمت فتحت الباب  وبصيت ….لم اجد احدا  ، قفلت .. وقعدت أكمل فطار . بعد شوية لقيت الباب خبّط تانى، قلت الحقة قبل ما يستخبى، جريت وفتحت الباب برضة ما لقيش حد، بصيت يمين وشمال مافيش حد ، عينى ضربت لتحت ….لقيت قطة واقفة تبص لى  فى عنيه…… قاعدة على رجليها الخلفية زى قعدة اسود كوبرى قصر النيل .  بصراحة قطة شيك و جميلة جدا ،  وشكلها بنت ناس :
-  انتى إية اللى جابك هنا… أهلك فين؟؟؟ واضح انهم سافروا وسابوكى .
القطة  فى ايام الحمل الاخيرة …..وشكلها بيقولى :
-  انا ماكلتش بقالى يومين .. ومارينا فضيت ، ومافيش حد غيرك .. شوف لى اى حاجة  أكلها اللة يرضى عليك .
   إدتها الطرشة :
-   هشش.. بسسسس…..  إمشى……. وقفلت الباب …

      بعد شوية ، وأنا بشرب الشاى خبطت تانى ،  خدت المقشة فى ايدى وفتحت الباب لقيتها قاعدة نفس القاعدة، وفى نفس المكان. و بردو بتبص لى نفس البصة :
-  انا عارفة انك ما بتحبش القطط ، و قلبك جامد …. وكسلان ….ومش عايز تجبب لى اى حاجة اكلها ،بس مافيش غيرك فى مارينا ، اعمل اية انا بقى  ، وإن ماكلتش حفيص ….من يومين جة راحل وست وبيتوا ليلة فى شالية .. وجابوا صندوق اكل من كنتاكى ، كلوا منة ، وكان ليا نصيب فى الباقى .  شكلهم مش متجوزين …
- إيش عرفك ؟؟
- مشيوا الفجر
        زوجتى نايمة فوق ومش عايزين نزعجها ،والحوار بيتم بينا بشكل صامت ، لكن مفهوم وواضح .
   شكلها مصممة ومش حتمشى الا لما تاكل  ،قلت ما بدهاش.. كان فاضل من امبارح 3 قطع كوبيبة   محمرة ، من الاطباق اللى بتباع جاهرة ومجمدة   ….  كلت 3 وفاضل 3 ……دخلت جبتهم وحطتهم قدمها ..  هجمت على اول كوبيباية  ونهشت جزء منها فى ثانية ..جعانة فعلا.   
    سابتها وبصت لى :
-  الكبيبة دى زبالة ….دى لا تؤكل .
- انا كلت 3 امبارح……. فكرتينى… هى فعلا كانت زبالة ،انا مش عارف كلتها ازاى؟؟؟
- شوف لى اى  حاجة تانية ..
- ما عنديش غير المقشة ،امشى… بسس
- طيب شوية لبن

   قمت جبت طبق وعلبة اللبن وحطيت الكرسى فى فتحة الباب وقعت سقسقت  لها لقمتين وحطيت عليهم اللبن ، وقربتهم منها. وإبتدأت تشرب فى اللبن وتاكل فى العيش بهدوء …وتبص لى كل شوية :

- القطط بتوه …الكلاب لأ . الناس تجيب  معاها قطة ……..القطة تخرج وماتعرفش ترجع……. اصحابها يدوروا عليها شوية …وبعدين يسافروا …تقعد  تاكل من الزبالة طول ما المكان فية ناس ….ناس مارينا زبالتهم  تمرى ومغذية وكتير ة.   اصحابى كانوا ناس طبيبين …..شيك على الاخر  ….. يتكلموا بالفرنساوى، ويتخنقوا بالعربى … ويحدفوا بعض بالشباشب  .   بيشتروا أكل كتير ويرموا نصة .

    شربت اللبن وكلت العيش .ولحست ايدها ومسحت على بقها اكتر من مرة ،ويصت لى فى عنيه بامتنان شديد  وقالت لى :


-  مرسى بوكو !!


ولفت ومشيت ببطء……





الاثنين، 27 سبتمبر 2010

لما كنا فى ثانوى



         صديقى عزيز زى ما أنتم عارفين كان زميل تختة ، وإحنا الاثنين مواليد 1932. بمناسبة التاريخ دة أحد الأصدقاء فى  التويتر  سألنى :
-  تاريخ ميلادك على الفيس بوك صحيح؟؟؟
-  صحيح  …..مستغرب ليه؟؟.
-  يعنى انت من مواليد 1932؟؟
- انا أكبر واحد فى مواليد 1932، انا مولود فى 1 يناير …ثم انت قلقان لية ، هل لأنى لسة عايش ؟ او لأن انسان فى هذه السن مشارك فى التويتر والفيس بوك .….ما ردش، وأضافنى  على صفحتة .

     نرحع تانى لصديقى زميل التختة عزيز، كنا فى سنة ثالثة ثانوى . إبتدائى كان 4 سنين ، وثانوى 5 سنيين،وكان فية إمتحان شهادة على مستوى القطر  المصرى فى سنة رابعة إسمها شهادة  الثقافة ، وسنة  خامسة شهادة التوجيهية، متقسمة توجيهى أدبى وتوجيهى علمى ورياضة …الكلام دة كلة برة الموضوع .

    مدرس العربى كان راجل كبير وهادى، وكنا بنحبة . وكان أهم حاجة عندة حصة الإنشاء، اللى هى  التعبير الاّن . كان المدرس  يطلع التلميذ اللى كاتب أحسن موضوع ، وواخد أحسن درجة…. يقراه امام  باقى تلاميذ الفصل، عزيز كان شاطر فى الانشاء ..انا كنت أبيض، لو كتبت  أربع جمل فى موضوع الانشاء أنهج… وأقطع النفس ،ونصف الكلام  أخطاء تودى النار .

      كنا فى الربيع ، فى شهر مارس 1948 ، والعصابات الصهيونية تثير  الرعب  فى فلسطين. وتستولى على القرى وتطرد الفلسطنيين منها  .  طلب منا استاذ اللغة العربية كتابة موضوع عن فلسطين . صديقى عزيز كان لة اهتمام ومتابع الحكاية واللى ببحصل هناك ، ووعد بلفور ، وسياسة الانجليز فى حكم  فلسطين ، وجلائها المنتظر فى شهر مايو  ،والهجرة اليهودية …الخ .

    عزيز حانى  فى اليوم التالى وهو فى غاية الحماس ، وخدنى فى فسحة الظهر، كانت الفسحة ساعة ونص بعد الغذاء .اكل شيك ما بنكلوش فى بيوتنا... لحم او فراخ وخضار وارز وفاكهة، او رز باللبن. وتحت الشجرة قعد يقرا موضوع الإنشاء اللى كاتبة عن فلسطين . حقيقى كان كاتب موضوع  حلو ،ومستشهد بايات قراّنية ،وشعر ….وابتدا الموضوع  بأبيات من قصيدة الشاعر على محمود طة:

أخي، جاوز الظالمون المـدى.. فحقَّ الجهادُ، وحقَّ الفـِدا
أنتركهُمْ يغصبونَ العُروبــةَ ..مجد الأبوَّةِ والســـؤددا؟
وليسوا بِغَيْرِ صليلِ السيـوفِ.. يُجيبونَ صوتًا لنا أو صدى
فجرِّدْ حسامَكَ من غمــدِهِ.. فليس لهُ، بعدُ، أن يُغمـدا
أخي، أيهـــا العربيُّ الأبيُّ.. أرى اليوم موعدنا لا الغـدا
أخي، أقبل الشرقُ في أمــةٍ.. تردُّ الضلال وتُحيي الهُـدى
أخي، إنّ في القدسِ أختًا لنـا.. أعدَّ لها الذابحون المُــدى

     كانت دى اغنية عبد الوهاب اللى بتذاع طول الوقت فى الاذاعة …وقال فى الموضوع ".وكتبت عليهم الذلة والمسكنة وشردوا فى الارض تشريدا "…"وباءوا بغضب من اللة"… "ولن تقوم دولة الظلم ولو ظاهرها جبابرة الارض وتولاها ذهب اليهود فى مناجم الارض اجمعين" ،  وكلام كبير اوى زى كدة . كلام حلو كلة حماسة…

-  عزير يا اخى و صديقى ، انت كاتب موضوع مش انت اللى حتقراة المدرس نفسة هو اللى حيطلب يقراه …دة حلو قوى، أربع صفحات  تخلى الواحد يروح يتدرب ويتطوع وينضم ويحارب مع احمد عبد العزيز فى فلسطين . اللة ينور عليك با صديقى .

     جت حصة العربى والاستاذ بيوزع الكراريس ويقول الدرجة  اللى حصل عليها كل تلميذ. وعزيز وانا متاكدين ان عزيز اللى حيفوز بقراة الموضوع ، وحياخد اكبر درجة …

-   إبراهيم……….  5  من عشرة
-   ……………
-  ………..
احمد…….. -اللى هوا انا -…  3 من عشرة
-  ………
- حليم …………6 من عشرة
- ……..
-  ………
-عزيز ………… صفر من عشرة
-……
إزاى ده  … وراحت فين لو ظاهرها جبابرة اليهود ، واخى جاوز الظالمون المدى….وكتبت عليهم الذلة…. والكلام الحلو الكتير دة كلة ….مية فى المية   الموضوع فيه لبس .

رحنا للمدرس اخر الحصة ، وعزبز غاضب جدا ، وموجوع ….ومش فاهم ازاى دة حصل؟؟؟

- انا كاتب موضوع كويس وحضرتك إدتنى صفر...
المدرس بهدوء شديد :
-  عرفت منين انك كاتب موضوع  كويس ؟
-  انا كاتبة وسهرت علية ، وتعبت فية ،والموضوع نفسة يهمنى ،،ماينفعش اخد صفر ،يعنى ولا حاجة عجبت سيادتك .؟.
- ياابنى انت كاتب موضوع طويل…. أربعة صفحات …بس المشكلة انك كاتبة بسرعة…ويظهر كنت متحمس وانت بتكتبة ….….بس للاسف ما عرفتش اقراه ، مكتوب بخط وحش جدا  …، تاخد نمرة على إية ؟ لازم   اديلك صفر ، ولا جملة عرفت اقراها …..اكتب بعد كدة بتأنى، وراجع اللى بتكتبة ……مرة واتنين ….ولا بد يكون خطك واضح….يتقرى.
.....
.....

ومرت سنين  طويلة... وكبرنا....


.
فلسطين بالاخضر    
…………………
…………………..
      مرت السنين الطويلة ،  وتوالت الهزائم  ….  ، هل كان ذلك لأن  خطنا كان وحش؟؟… ولما ناس مننا بقى خطها  واضح و صواريخها  بتخوف …   بدأ خطنا يتقرى…………………
…………………..

الاثنين، 20 سبتمبر 2010

مسئولية الأغلبية



          بعد البيان المشبوه الذى صدر من جبهة علماء الازهر تحت عنوان "قاطعوهم " كتبت فى التويتر :
-  إنى  اعتذر للإخوة المسيحيين عن ما جاء فى بيان جبهة علماء الازهر ، فالأقباط أهلى وإخوتى وناسى وسندى، والاغلبية  مسئولة  عن إحيواء  الفتنة... عفوا اخوتى .
فعلقت صديقة احترمها واحترم رأيها..
-  تعتذر ليه؟ انت مش مسئول عن كلام جبهة علماء الازهر، واللي يحاسبك على كده يبقى ….


       سكوت الاغلبية الواعية على التميز الذى وقع على الاخوة المسحيين فى الماضى والحاضر هو ما يوجب الأعتذار .
     فى الماضى والتاريخ سجل حافل بحجم التميز والاضطهاد والظلم الذى وقع على الأخوة الاقباط الذى  لا يمكن  نسيانه ببساطة ، إن لم تساعد الأغلبية المسلمة فى مداواة هذه الجراح وتقديم كل أشكال الأعتذار والترضية عما فعلة الجدود .


-   فى أزمان طويلة من التاريخ المصرى كان يتوجب على المسحيين تعليق صليب حديد ثقيل فى رقبتهم الأمر الذى أصاب مؤخرة الرقبة بالزرقة ، وسخر  بعض المسلمون منهم  وسموهم "عظمة زرقاء"
- فى ازمان اخرى فرض على المسيحيين لبس الخيش فى الطرقات وعدم الظهور باى ملابس إلا المصنوعة من الخيش .
-  عدم ركوب الخيل او اقتناها .
-  عدم ركوب اى دابة امام المسلمين.
وإشكال اخرى كثيرة من التميز نجدها فى تاريخ المقريزى وابن اياس وآخرين .


     فى العصر الحديث ،اذكر ونحن اطفال ، فى العيد كان يتجمع الاطفال ويهتفوا "العيد عيدنا والنصارى كلابنا "،وما زال هذا الامر يحدث للان فى الريف وبعض الاحياء الشعبية… وماحدش بيقول  للعيال عيب.  فى الاذاعة والتليفزيون اشكال التميز والإهانة ملحوظة . بجانب اشكال التميز الاخرى فى الوظائف ودور العبادة والتعليم .  اليس من المستغرب  ويوجب الاعتذار ايضا …ان يتم تدريس كل تاريخ مصر منذ الفراعنة وحتى الفتح الاسلامى ويهمل التاريخ القبطى وحجم التضحيات وبطولات الشعب المصرى القبطى  القابض على عقيدته... والمسمى بعصر ألشهداء.
     
     يجدر الاشارة بأنة لا فضل لأحد  باختيار دينة .. فالدين يورث كالجنس ولون البشرة ونعومة الشعر …الخ ، فيجب  ألا يتباهى احد بأنة مسلم كما لا يجب ان  يتباهى احد  بانة ابيض البشرة او ازرق العينين. كذلك بالنسبة للمذهب، فمصر مكثت 200 عام  على المذهب الشيعى حين حكمها الفاطميون ،وانقلبت فى خطبة جمعة الى المذهب السنى حين إستولى الأيوبيون  على الحكم ، والبشر المسلمون فى كلا الحالتين لم يختاروا .  الناس على دين ملوكهم ……هذا هو النظام فى البلاد المتخلفة. بعض الاقباط المسيحيين المصريين هم فقط من خرجوا عن هذه القاعدة وظلوا متمسكين بدينهم . التاريخ يقول ان سنة 1000 ميلادية كان الاقباط  اغلبية  الشعب المصرى .

        عاشت مصر خلال فترة طويلة من التسامح الدينى والتأخى منذ رفع شعار الهلال مع الصليب فى ثورة 19. واستجاب شعب مصر ،لأن هذا هو الاقرب الى فطرتة السوية التى خلق الانسان عليها ... ولكن فى مراحل الإنحطاط السياسى والأزمات الاقتصادية يقوم الحكم بإثارة النعرة الدينية واستعلاءوتحريض الاغلبية المسلمة ضد الاقلية المسيحية…كما يحدث الان .


      إذا أردنا ان ندرأ الفتنة ، فيجب على الأغلبية الواعية ان تحتضن قضايا المسيحيين وتدافع عنهم وتطبب جراحهم ، وأيضا تعتذر لهم . ألم يعتذر العقلاء المصريين للشعب الجزائرى عما فعلة السفهاء بعد مباراة كرة قدم ؟؟؟ ،اليس الاجدر الان وفد تأزمت الامور ووصلت الى حد الصراع الطائفى ان تتقدم الاغلبية باحتواء الازمة وتطمئن الاخوة المسيحيين وتعالج جراحهم وأيضا تقدم الاعتذار الكافى والواجب عما يفعله السفهاء من المسلمين …


       السودان دولة تجمع مسلمين فى الشمال ومسيحيين فى الجنوب وحين فرض النميرى تطبيق الشريعة الاسلامية ، قامت الحرب الاهلية ووصلت الان الى حد  الانفصال الحتمى للجنوب الغنى ، وقامت الحرب بين مسلمى الشمال بين العرب والافارقة ….والبلد خربت على الاخر …فى الدولة الحديثة تدخل او سيطرة رجال  الدين على الدولة يخرب الدولة وينهى دورها، وتسود الفوضى .


       اننا نطمع فى بناء دولة حديثة ديمقراطية  ،كل الذين يعشون فيها مواطنون احرار متساوون فى  الحقوق والواجبات ،لا تفرقة بينهم بسبب الدين او الجنس او اللون،دولة تخضع لقانون واحد يحترمه الجميع ،وتتبع قانون واحد لدور العبادة ،وتلغى خانة الديانة من الهوية والأوراق الرسمية  كما الغيت من جوازات السفر ..


        مرة اخرى عفوا الاخوة المسيحيين.



الثلاثاء، 14 سبتمبر 2010

قول حرمت يا أبلة





            بجوار منزلنا مدرسة بنات إعدادي وثانوى، مدرسة حكومية بها اكثر من الف تلميذة.  مدرسة بنات ...بيعف عليها عشرات من الحبيبة ،بيحبوا بأدب، وهذا شئ مقبول . من مدة طب على المدرسة مجموعة من العيال راكبين موتوسيكلات يستعرضوا برزالة  امام البنات وهما خارجين . يوم ورا التاني ابتدأوا يمدوا ايديهم ويغلسوا بزيادة ، والبنات تجرى قدامهم ، والعيال اخر انشكاح .
     فى يوم والعيال الاربعة اللي شايفين نفسهم على الاخر واقفين امام المدرسة ، وكل واحد حاطت كيلو جيل على راسة، وموقف شعرة ، وفاتح صدرة ، ومجعوص على الموتوسكل،  قرب منهم اتنين بنات تلمذة فى المدرسة  ، عاديين فى الحجم والشكل ، وقربوا منهم جدا 
-  اية مش خايفة يا بت انتي وهية؟؟؟
-  اية اللي موقفكم هنا ؟؟؟؟؟……
   وفى اقل من دقيقة كان اتنين من العيال  مضروبين وعلى الارض ، وواحد منهم متمزقة هيومة قميص وبنطلون وواقف بملابسة الداخلية….والاثنين التانين جريوا بعيد.بس موتوسيكلاتهم مقلوبة على الارض..
    اللي اتقطعت هدومة طلعت علية بصريخ  مش انا… مش انا والله،  مش انا والله …الواد التاني البنتين مسكوة وفين يوجعك، حقيقي البنات كانت صحتها كويسة بس واضح انهم متمرنين على بعض الحركات اللي شلت حركة العيال.
-    قول حرمت
-   حرمت حرمت واللة
-   قول حرمت يا أبلة
-   حرمت يا أبلة مش  حاجى هنا تاني
يوميها العيال كلوا يطلع ميت قلم، كل اللي معدى ويعرف  الحكاية يسكهم…
     سابوهم وراحوا للاتنين التانين وكل ما يقربوا منهم العيال تبعد…كل ما يقربوا منهم العيال تبعد، محافظين على مسافة للامان
-   حناخد الموتوسيكلات ونمشى
-   قولوا حرمنا نجى هنا تانى….
................
...............

      ومن يومها العيال الصيع اللي بيتحرشوا بالبنات ما بيعدوش من قدام المدرسة ،الحبيبة المؤدبين هما اللي دائما موجودين. باقى البنات  فى المدرسة اتشجعوا  وبقوا ويردوا الكلمة بعشرة، ولو حد فكر يمد ايدة يقطعوهالة....بنات مجدع بجد.



      الحكاية دى بحكيها بمناسبة الظاهرة المتكررة  لعمليات التحرش الجماعي اللي بتحصل فى العيد. كتبت فى التويتر وجرى الحوار التالى  :
-   ظاهرة التحرش بالبنات ..أما لها من حل؟
-   البنات تتلهى وتقعد فى بيتها….
-   لا دة كلام غلط البنات مفروض تواجة مش تجرى .
-   سبب داه كله ان اللي بيعمل كده مش عنده اخلاق ولا تربيه - والبنات مش عارفه انه اي حد لمسها ولا رخم عليها تاخذه من قفاه وع القسم
-  الواحد اما يلاقى كلب فى السكة ويجرى منه الكلب حيجرى وراة،  لكن لو كش فى الكلب… او وطى على الارض ومسك طوبة  ….الكلب حيدور الجري.
-  انت مش قادر تفهم ان اللي هياخد اي موقف من الافضل انه يروح لقسم  ، مينفعش حد يمد ايده على حد .
-   الكلام ده غلط ...البنات ممكن تضرب وتخوف مش تجرى‘ اذكر واحدة جدعة مسكت سواق ميكروباس تحرش بيها وماسابتوش غير فى القسم ،وخد 3 سنين سجن .
-   معرفش ولا بنت عملت كده غير تقريبا البنت اللي اسمها نهى- بس ليه محدش بيعمل كده؟؟؟؟؟
-  البنت اللي حد يتحرش بيها مفروض تاخد حقها بايدها ،ودة ممكن ، مش تجرى قدام شوية عبال صيع .
-   لو البنت ضربت ولد، رد الفعل الطبيعي هيروح مناولها بونيه ، لكن لو حبت تاخد موقف بجد، من قفاه ع القسم على طول
-   انت خوافة اللى تتصدى للاهانة ضرورى تكون شجاعة ، والانسان الشجاع ماحدش يقدر بهينة
-  مش خوافه - بس اللي بيتحرش اصلا انسان قليل الادب- معنى انك تقف قدامه- تبقى زيه- ماينفعش تنزل فى مستواه اصلا
-  لو حد جة يخطف شنطتك حتسبيهاله وتروحي القسم ولا حتتمسكى بيها وتدافعي عن نفسك ومالك 
- الشنطة حاجه تانيه،
- الشنطة حاجة تانية ، لو حاول يخطفها تضربية،لكن لو حاول يخطف حاجة اهم تسبية وتروحي تشتكية فى القسم
- انا ضد انهم يجروا- بس مبدأ الضرب غلط اصلا، مينفعش نرد الاهانه بأهانه
- اشمعنى اما بيخطف الشنطة بتضربية ولا عشان الشنطة غالية
- ايوه ممكن اهدده واذا كان مش فاهم هفهمه ان اللي بيعمله داه غلط وسفاله- لكن ضرب لاااااا
- ولكن لو صمم يخطفها ……حتقتلية
………….
………..
        انا بنصح الصبايا والبنات والسيدات  انهم يدافعوا عن شرفهم وكرامتهم برد الاهانة وما يجروش امام عيال صيع ، لان دة بيشجعهم يجروا وراهم . يقفوا ويتصدوا. اما ندرس اي صورة منشورة من صور التحرش نجد ان البنات اكتر من العيال اللي بيتحرشوا بهم ، لو وقفوا واتصدوا حيجروهم . صديقة عاشت فترة فى امريكا كانت وهى ماشية بالليل ايدها على المطوة المفتوحة جاهزة لاى قلة ادب .
      البنات مفروض ما تخافش وممكن تتمرن على بعض الحركات اللي تعوض الضعف الجسمانى وممكن تشيل سلاح ما .... البنات فى الاتوبيسات تطلع وفى ايدها دبوس اللي يقرب منها تشكة وهى الشكة . لما تروح تتفسح تشيل فى شنطتها عصاية ولا كرباج ولا مطوة، اي حاجة تدافع بيها عن كرامتها وعزتها ... المناظر بتاعة العيد دى شئ مخجل لنا كشعب ومش حتنتهى الا اما البنات يكتسبوا الشجاعة ويبقوا يخوفوا...وومش ممكن يخوفوا الا لما يشيلوا مطوة قرن غزال، لان فية ناس تخاف ما تختشيش.


        انا بجد ما زلت  معجب جدا  بنهلة وبالبنتين بتوع... قول حرمت يا أبلة.


الثلاثاء، 7 سبتمبر 2010

تعرف تكوى قميصك ؟؟؟

        
        البشر قسموا العمل بين الرجل والمرأة طبقا لإمكانيات  كل جنس ، المرأة  تقوم بأعمال مناسبة لجنسها والرجل يقوم بأعمال مناسبة لجنسه . الرجل بيجرى أسرع من المرأة ، وجسمه أقوى ، ويستطيع ان يقذف حجرا او عصا او حربة أبعد . فعند تقسيم العمل أخد وظيفة الصيد . المرأة تستطيع حمل اي شئ على ظهرها او على رأسها وتمشى بسلاسة،  فأخذت وظيفة جمع الثمار . فى المجتمع الز راعى تم تقسم العمل بين الرحل والمرأة وكان الجزء الاكبر من نصيب المرأة . تشيل الزلعة على رأسها بعد ملأها من الترعة وتمشى بها مسافات طويلة من غير ما تقع - الزلعة مش المرأة - الرجل لا يستطيع شيل زلعة على رأسة او على كتفة ،حتدلدق منه. الرجل عشان يمشى ضروري بمرجح إيدية… والمرأة تمشى برجليها بس ….تلاقى البنت رايحة المدرسة وماشية وحاضنة الشنطة.  هذا بسبب اختلاف تركيب الحوض بين الرجل والمرأة . ولهذا السبب تم تقسيم العمل فى المجتمع الزراعي ووقع على المرأة العبء الاكبر .غسيل الملابس فى الترعة، العجين والخبيز ،شيل الحطب تربية الدواجن ، لم الجلة وتقريصها وتنشيفها لإحماء الفرن ، حمل الطعام لزوجها فى الغيط واعمال اخرى كثيرة. الرجل اختص بالزراعة وتقليب الارض والري فى الفجرية . ويشتركوا سويا فى جنى المحصول.


     القيم والأخلاق و حتى الاديان موجهة للطبقة الوسطى الموجودة فى اي  مجتمع . التاجر، الموظف ، العمدة او الحكام . القيم والأخلاق موجة لهم . ما تقدرش تروح للفلاحة اللي شيالة البلاص على دماغها وتقول لها : وقرن فى بيوتكن… حتقولك الكلام دة مش لي انا  ….الكلام دة لمرات العمدة ومرات الشيخ يوسف البقال ومرات شيخ الجامع اللي قاعدين متستتين  فى البيوت ….اما انا الفلاحة الفقيرة لو ما مليتش مية من الترعة حنموت من العطش ….ثم ان الزلعة دي رابحة لبيت الشيخ اللي حاجز مراتة فى البيت طبقا للشرع . لو  قولتلها الاخلاق بتقول ممنوع الاختلاط حتقولك : ينيلك،، يعنى وإحنا بنلم الدودة نخلى يوم للستات ويوم للرجالة، ما ينفعش ………الكلام دة تقولة لمرات محمد افندي الناظر ……احنا مرمين طول النهار فى الطين وبنشقي عشان تكلوا وتحطوا القوانين والأخلاق اللي على مزاجكم، وتمشوها على حريمكم او محظياتكم، تخبوهم  أحسن حد يأخد منهم حتة ……… إحنا عبيد الارض ، عبيد ، عبيد …..والحجاب فرض على الاحرار…..ما يمشيش على العبيد .
     اغلبية البشر فلاحين ويحكمهم ظروف العمل الزراعي واخلاقياته ، ولكن لان الطبقة الوسطى هي التي تساعد الحكام وتصنع قيم المجتمع وما يصلح لها . ولا تصلح للأغلبية من فقراء الفلاحين ، حتى الاديان تؤول  لمصالحهم او لأغراضهم .


    مع تقدم المجتمعات سادت القيم والأخلاق التي وضعتها الطبقة الوسطى وتأويلاتها الدينية….. الرحل للعمل فى الخارج والمرأة للعمل بالمنزل.. الكلام دة ما ينفعش الان حتى فى المدينة .. ولا يمكن تطبيقه. ، يعنى يا مولانا عمل المرأة حرام طيب …والشغالة اللي عندك فى البيت  بتشتغل ومريحة الحاجات زوجاتك، يفتى ويقول ممكن اعتبارها ملك يمين . الغريب ان فيه ناس بتقعد تسمعة ، وتقول مولانا قال …
       اثبتت ابحاث علمية محترمة ان التكوين الجسماني للمرأة اقوى من الرجل وإصابتها بالأمراض اقل،  وتعيش اطول . كما ان هناك دراسات نفسية كثيرة عظمت من شان المرأة ورباطة جأشها، و رغم ذلك رفض توليها منصب القضاء .


       لا يمكن لاى مجتمع ان يتقدم إلا اذا راجع قيّمة الموروثة .الذكر مفضل على الانثى ،او افضل ..قيمة فاسدة .الرجل هو المسئول عن الانفاق على الاسرة. الواقع ببقول ان 35% من الاسر المصرية تعولها امراة، والباقى الزوج والزوجة يعملوا ويشتركوا فى حمل مسئولية الانفاق على الحياة …إلا نسبة صغيرة جدا من كبار رجال المال .....ودول مالهمش زوجات ، دول لهم محظيات. اما باقي البشر،  الاغلبية فهم عبيد الارض .



      دخلت عالم الكمبيوتر حديثا ، من شهر مايو تقريبا ،واستطعت ان ابنى صدقات كثيرة اعتز بها واغلب هذه الصدقات مع صبايا وفتيات ، وأيضا بعض الشباب، بصراحة البنات عجبوني اكتر…. بعض الشباب  متدلع . سأقدم بعض النصائح لصديقاتي البنات واغلبهم فى سن الزواج. وقد يستفيد منها بعض  الشباب.

        اذا تقدم لك شاب للزواج عن طريق الاسرة او عن طريق تعارف او صداقة او علاقة او اي شكل اخر ، فقبل ان توافقي ….اسأليه بعض الاسئلة :
-  تعرف تكوى قميصك؟
-  هل تجد غضاضة فى ان تقوم بنشر الغسيل فى البلكونة والجيران يشوفوك ؟؟
-  هل تساعد، بشكل ما،  فى اعمال المنزل؟
-  هل تعتبر نفسك أفضل من اختك ؟
-  هل تفضل العمل للمرأة  او القعاد فى البيت ؟
-  كم مرة جهزت الإفطار لأختك وقدمته لها فى السرير؟
-  هل تقوم بجلى الصحون بعد الاكل؟
-  ان لم تكن تعرف ، هل عندك الاستعداد للتعلم ؟



        ومن الاجابات يمكن ان تكتشفي هل هذا الانسان  يريد زوجة او محظية ؟…. وابتعدى يا صديقتي فورا اذا كان  يريد محظية .





الأحد، 5 سبتمبر 2010

أول قصيدة كتبها صديقى



       هذه أول قصيدة كتبها  صديقى تميم ونشرت، وكان لى حظ إنى من أول الناس اللى سمعوها  ، كان عمرة 18 سنة ، فى الثانوية العامة ، وبالمناسبة تميم صديقى من وهو عندة تسع سنوات . كان لة تجارب شعرية قبل كدة ، فى السخرية من المدرسين وزملائة التلاميذ. ولان القصيدة بالعامية الفلسطينية ، وقد يكون صعب قرأتها ، بحثت عن تسجيل صوتى وللاسف لم اجد ،وجدت  فيديووالرابط بتاعة ،ممكن تدوس على الرابط وترجع للقصيدة ،او دوس play،حتكدب معاك فى الغالب ، دوس على الرابط . انا قعت 9 ساعات عشان اظبط العملية وما فلحتش . حتتمشور بين اللنك والفيديو والقصيدة، بس  انا رأئى إن الحكاية تستاهل . وانا لسة فى سنة اولى كومبيوتر مش عارف أتقدم .... بس ربنا يسهل .

ياعمي ألله يهديها فلسطين
تروح امْسامحة الله يجازيها 
ينادُوها نموت احْنا وتعِيشِين 
لَمين اتْعيش لو ماتوا أهاليها 
تقول النايحه نيْح المجانِين 
إذا العقّال جَحْرَتْها تَهدّيها 
هَاتُولي أصْغر اصْغارِي يَنَاعِين 
وخذُوا لبلاد أوّلها وتالِيها 
مَابَدْهَا في مآسيها مُعزِّين 
إذا كان المُعزِّي من مآسيها 
وَجَعْ مثل الصدى في اجْبال هادِين 
يَضَوِّي فِي العَظم والرُّوح يَطْفِيها 
وجع مثل الصدى بِعظام وانِين 
مثل شمس البحر ساعة عصَاريها 
وجع مثل الصّدى يهذي وما يذِين 
يَرُوح ويِيجي ويِبْعدها ويِدْنِيها 
وصدى مثل السكُوت يرنْ ويَرِين 
صلْح بين الإشِى وعَكْسُو يأذِّيها 
بها فخر وندم خطين عَاجْبِين 
كتبها ربّها وما عاد يمْحِيها 
بها فخْر وندَم كَنْهم طريقين محرَّمْتين 
بسْ مجبُورة تمشيها 
اثنين وقسَّموا كل اشيْ بها اثنين 
ثبات اعْيونَها ورجْفت أياديها 
علامة نصرها اقْبال المصورين 
وجمْلتها الي ما تقْدر توفيها 
فخر إنُو شهيد مع النبيين 
كما قال المعزِّي وشُو الندم فيها 
وندم على الميت وماتم 
عشرين حرق بن المعزي وشو الفخر فيها 
وجعها يا وجع زينب على احْسين 
وجع مريم على المهدَّى بكفيها 
حسين وخانتُوا جموع المسلمين 
وعيسى وخانتُوا الأمة الِّي يفديها 
وأنت منو خانك يا ولد مين من الأمة المرْخية كفَافِيها 
على لحْسين جَرَيْتُوا ألف عَيْن 
وعيسى سَاللُوا من الناس ضعفَيْها 
على هَالْجَوْز وقفْتُوا يراثِين 
كأنُّوا ما الِنا أحباب نبْكيها 
ومريم كل من تبكي على ابْنِين 
وزينب كل من تبكي عاوَالِيها 
اتركُوهَا تَصَيحْ الصوت صُوتَيْن 
اتركُوا العلة على العلة تداويها 
مثل حبْس البُكى حبس الحسَاسِين 
إذا فلْتَتْ عَلت مهما تنَادِيها 
مثل حبس البُكى مَشي الغَشِيمِين 
بألف كَاسَه مَلانَي لاشَفَافِيها 
مثل حبس البُكى تقْنع حصانيين 
بعلية بخل بالشِّيت بانِيها 
مثل حبس البُكى ردْ المُغِيرِين 
إذا قالت يَادَايم في أعَادِيها 
مثل حبْس البُكى كتْم الكَوَانِين 
وتَرْبِيط السّهام بقوْس رَامِيها 
مثل حبْس البٌكى قالوا الحكيمين 
ترد الغيث لَلْغَيم بعلاليها 
وكل باكي طفل حتى بسبعين 
بُكاها يزيد من نهرَات ناهيها 
دمُوعَك مَيَّهْ تسَّرَّب من اليدين 
وكيف تْرِيدِي بالجفنيين تقْنِيها 
وجع عم يجْمَد ويملس على الهين 
جناح الرّخ واحْنا ظل تحتيها 
وجع يشبه تماثيل المَيَادِين 
تُوقَفْ رَغْم الخَجَل من كثْر رائِيها 
وجع يبدا خشن ويلين بعدين 
ومن نال المطالب نال بعديها 
وهٌو يَطْلب عَرْش رُوح المُصَابِين 
لأجْلُو فى الصدور اجْيُوش يَفْدِيها 
وإذا نال العرش ابن اللئيمين 
يصير اسْمُو حزن والحرب ينْهيها 
ويحكم تَايَسَلمْهُم لَعزْرِين 
ويسأل عن عروش أخرى تَايَبْغِيهَا 
ومن ذاك الوقت صَارَتْ مثل دِين 
ما ينهيها حدى إلا تَايَبْدِيها 
وكِلْ ثَوْرة وجع تَتْنال تَمْكِين 
وإذَا نَالَتْ حزن بسْوَى نسَمِيها 
ولا أصْعَب من المصِيبة على الزَّيْن 
سوى إنُو أمام الناس يشكيها 
بدنها يرج لو قالوا المذيعين 
إليكم نشرة الأخبار يُلقيها 
بدنها يرج رجات الفناجين 
بيدين الختاير لما تحفيها 
وجع يتعرج بخط العناوين 
يكشف أحزانها كل ما تغطيها 
ورقم أغبى من أولاد المهمين 
وما تعرف حصاها والا ناسيهى 
جريده من ورق مالك تحملين 
محامل تعْجِز من الخيل عاديها 
ورق لفْ اللّهب لف الرضيعين 
وقالوا بَسْمِلِي يَلّى واحْمِلِيها 
وجعها يَعن من كلمة وكلمتين 
صباح الخير يام إفلان تضنيها 
بكفي لكل اشي معنى تحطين 
فقالت عوض ما ضاعت معانيها 
عشر عجمات توزنها بموازين 
على صدري يهاب الذيب واديها 
ومن طول الحزن ناحو الملاكين 
على اكتافي وهد الروح بانيها 
أطلنا وما عرفنا الباكية مين 
وقلت الصاحبي واجب نخليها 
وجينا الباكية واحْنا مْسَلْمِين 
وبوّسنا الغضن ما بين عينيها 
وقلنا شُو الاسم قالت فلسطين 
إذا ما نسيت العالم أساميها