الثلاثاء، 21 ديسمبر 2010

فبه ايه بقى بعد كده ؟؟




        تعاملت مع  التويتر فى شهر ابريل 2010 وابتدأت اكتب فى مدونة كانت مهجورة  من سنتين ، من اخر مايو 2010 .. اول تدوينه كتبتها تحت عنوان رسالة الى نوارة نجم"ردا على الحملة "الشعبية" لتوفير المياه ..ماعجبنيش كلمة شعبية .....عشت مع الاصدقاء فى التويتر وكتبت عدد من التدوينات بعضها لاقى استحسان والبعض الاخر....ما عجبش ، احد الاصدقاء قاللى على تدوينة " دي كئيبة "وهى  عن  اطفال الشوارع....ومرة صديقة قالت لي اكتب حواديت  احسن ...عندي عداد فى المدونة ..لاحظت ان البوسنات الخفيفة والحواديت تلقى قبول وزيارات اكثر… اما المدونات التي ترصد واقعنا المر فالاصدقاء منفضون عتها .. كما لاحظت ان الاصدقاء اللي اتابعهم او بيتبعونى على التويتر  كتير منهم ما يعرفش مصر وحجم الفقر اللي فيها.. بيتكلموا فى  القضايا العامة والانتخابات والتسريبات  وحقوق الانسان  وتمكين المرأة و عمل المراة والعصيان المدني .. والدين والثورة البرتقالية والبنفسجية..  والاخوان والموازي والعالم الافتراضي.....الخ ، وهذا شئ طيب ، ولكنى احسست ان معظم التعليقات غير واعية لشكل المجتمع المصري وحجم مشاكلة الكئيبة..

     طبعا كل اللي ببيتعاملوا مع التويتر او لهم مدونات  بينشروا فيها افكارهم وخواطرهم  من الشرائح العليا من الطبقة المتوسطة .. عندهم  على الاقل كمبيوتر ومحمول وكاميرا، وساكنين فى شقق نظيفة بها حمام ....لا يعملوا  او بيشغلوا وظايف جيدة ... مش محتاجين .. متعلمين كويس وعدد منهم ما بيكتبش بالعربي ، وجزء مش عايش فى مصر وعدد  كبير منهم   له اهتمام بالشان العام ..وبالاضافة لعدد كبير من الاخوة العرب لا يعرف واقع مصر الا من الاخبار او السينما ....

      اغلب  الاصدقاء شافوا فيلم الكيت كات وشافوا مشهد عايدة رياض واقمة فى طابور طويل امام الحمام فى سكنها اللي فيه اكتر من 30  انسان فى نفس الشقة ، كل اسرة فى اوضة …

كلنا  ضحكنا  على حوار عادل امام فى مسرحية شاهد ما شفش حاجة  مع حاجب المحكمة
 - امك موجودة
- اه موجودة وقاعدة معانا فى الاوضة
- حماتك موجودة
- قاعدة معانا فى نفس الاوضة
- كلكم قاعدين فى اوضة واحدة
- اة
- سابين الشقة كلها وقاعدين فى اوضة واحدة!!! 

    وضحكنا، لكن هل خدنا بالنا ان ده واقع  معاش فى مجتمعنا . وهل لو بيتفرج معانا واحد من اللي عايش مع ابوة وامة واخواته فى اوضة واحدة ، وهم الاغلبية من شعبنا ، حيضحك معانا على السخرية من حالته ومن فقره.....  لا اظن . .

     موتنا على نفسنا من الضحك لما احمد بدير فى ريا وسكينة قال "حوماية العيد "   هل جال  بخاطرنا ان اغلبية ابناء شعبنا لا يتمكن من الحموم لعدم وجود مياه فى سكنة او عدم وجود سكن صالح اصلا ..مع انها حقيقة واقعة يعيش فيها الاغلبية  ولست مبالغة  تثير الضحك

            يجب الا نستغرب او نفاجئ بالاحصاءات التالية:

      اكثر من 50 % من الاسرفى القاهرة، انا بقول القاهرة عاصمة المحروسة وليس الارياف ، تسكن غرفة واحدة !!!! 21% من السكان لا يحصلون على مياة نقية ، 12 % من المباني بلا كهرباء،15% بدون صرف صحى ..

     بالاضافة الى وجود 1024 منطقة عشوائية فى مصر يسكنها 12.6مليون انسان محرومة من الطرق الرئيسية ومحرومة من المياة والصرف الصحي .. الاسكان العشوائي يمثل 50% مما انشئ من المساكن العام 1980، ثم زادت  الى 80% من المساكن التي تقام كل عام .. وتمثل المساكن العشوائية 60%من مجموع المساكن التي انشئت فى الثلاثين عاما الماضية  ، يوجد في مصر نحو نصف مليون مسكن في غير البيوت والعمارات والفيلات (أي أكشاك وعشش  صفيح وخيام وأشكال أخرى غير نظامية)،  كما يوجد حوالي مليون شقة خالية تمثل 10.6 من المباني في مصر.....يعنى اللي ما بعرفش يركز فى الاحصائيات اقوله ان المساكن العشوائية اللي اتبنت فى ال30 سنة الماضية اكتر من المساكن المقبولة للسكن  ....مع عدم احتساب عشش الصفيح ..والكرتون

        بعد كده لما الاقى صديقة على التويتر، ومهتمة بالشان العام،  تسخر من الشعب اللي ما بيستحماس وما بيغسلش سنانة   اتأكد انها تجهل واقعنا الحزبن... وترى ما تريد... وهو سراب....واكتئب !!!

      جاء في تقرير للبنك الدولي العام 2005:  تضاعف عدد الفقراء في مصر خلال الخمس السنوات الأخيرة،  وقد كشف مسح تقييم الفقر في مصر الذي أعده البنك الدولي بالاتفاق مع وزارة التنمية الاقتصادية ان واحد من كل خمسة مصريين يعيش في الفقر، وواحد آخر يعيش صراعا يوميا مع أقداره حتى لا يتحول رسميا من صفوف المستورين إلى صفوف الفقراء ، هكذا كانت صورة المصريين في بداية الألفية الثالثة.....أما الآن فقد انخفض نصف عدد من كانوا على حافة الفقر إلى ما تحت خط الفقر. بما يعني أن عدد الفقراء في مصر زاد ليبلغ حوالى 23 مليونا.

      الفقراء لا ياكلون اللحم ولا الفواكه ويكتفون بوجبتين ويعتمدون على البقوليات والخبز والشاي


فى جولة  تفتيشية لوزير التعليم السابق حسين كمال بهاء الدين على احدى المدارس سال تلميذ صغير
- انت مافطرتش ؟
- لا
- لية؟
-  اصل ماكانش  على الدور

كل صباح نصف  ابناء الاسرة تفطر، وفى اليوم التالي يفطر اللي ما فطرش امبارح... دة نظامنا…..وتقولولى ما بيغسلوش سنانهم !!!

لي صديقة طبيبة تعمل فى مكنب صحة بناء على طلبها !!
- معقولة يا دكتورة بتعملي اية فى مكتب الصحة؟
-  بكشف على الميتين واصرح بالدفن .
-  دي شغلانه دمها تقيل قوى
- مش احسن ما اكشف على ناس حيموتوا … العيان اللي كان بيجيلى علاجه ياكل…ياكل  اكل حقبقى !!!! وهو مش لاقى ياكل حتى  اكل  زائف .....اكتبلة فى الروشتة ايه...    اكل !!

        الوضع الصحي فى مصر فى تدهور مستمر ، فوفقا لتقرير منظمة الأغذية والزراعة التابعة للأمم المتحدة(الفاو) الصادر في 2009، هناك ما يقرب من نصف الأسر المصرية تعاني سوء تغذية نتيجة لتدني مستوى الدخل لدى هذه الأسر.

       الشرائح العليا من الطبقة الوسطى والغنية  تمثل 20% من الشعب المصري  يملكون 80%من الثروة ..  1%من هذه الطيقة  يملكون 50%من حجم ثروة هذه الطبقة.. ويشترك 99%فى ملكية ال50%الباقية …فهمت حاجة ؟؟     1% من 20 %  الذين يملكون 80%من ثروة الشعب المصري تملك 40 %من الثروة ..فهمت حاجة ؟؟؟
نقول تانى 160.000فرد يملكون 40%من ثروة الشعب المصري  ...يعنى 0.4% من الشعب المصرى تملك 40% من الثروة!!!!

        احنا بتوع التويتر والمدونيين والاحزاب  والنشطاء من الشريحة اللى كل شئ  بتعمل عشانها "مصر القصر" ..من رصف الشوارع عشان عربيتنا تمشى  الى برامج الطبخ فى  التلفزيون... والمسرح والسينما واي نشاط بيتعمل لنا.. لل20 %.... احنا والنظام فى شريحة واحدة وباقى الشعب ال80% "مصر العشة" برة اللعبة تماما ...الفرق بينا وبين النظام ان النظام بيضرب الفقراء  بقسوة ..واحنا بنسخر منهم ومن فقرهم وجهلهم وبقسوة ايضا   ..وبعد كدة نقول علية شعب  سلبى وما بيشاركناش فى الاحتجاج .....ازاى يشاركنا واحنا غرباء عنة ما نعرفوش  وبنسخر منه


        الكارثة انة حين يتكلم العالم عن محو الامية الرقمية والمعلوماتية ، فقد بلغت الامية فى المحروسة كما كشف تقرير ناقشتة لجنة التعليم بمجلس الشورى فى العام 2009 حول قضية محو الامية ..وانها وصلت  الى 17 مليون مواطن امي  بنسبة 29% من عدد السكان ، وان 25%مما سبق ان محيت اميته ومن لم يتخطى التعليم الابتدائي.. يرتد مرة اخرى الى الامية
يعنى نص الشعب امي !!


       في إحصائيات للبنك الدولي  سحلت نسبة الفقر في مصر  العام 2008 ضعف المعدلات المثيلة في دول الشرق الأوسط، إذ بلغت أكثر من 25% من مجموع السكان الذين يصل دخلهم إلى أقل من دولارين يوميا." نصف تمن تذكرة سينما "
      1-   الفقر المطلق: يعرف بأنه الحالة التي لا يستطيع فيها الإنسان، عبر التصرف بدخله، الوصول إلى إشباع الحاجات الأساسية المتمثلة بالغذاء والمسكن والملبس والتعليم والصحة.    
     2- الفقر المدقع: يعرف بأنه الحالة التي لا يستطيع فيها الإنسان عبر التصرف بدخله، الوصول إلى إشباع الحاجة الغذائية فقط المتمثلة بعدد معين من السعرات الحرارية التي تمكنه من مواصلة حياته عند حدود معينة.

      قال تقرير التنمية البشرية لعام 2010: إن 27.5 مليون مواطن يعيشون تحت خط الفقر..... 21.6% من سكان مصرفقر مطلق، و 7.5مليون مواطن يعيشون تحت خط الفقر المدقع بنسبة 6.1%من السكان.يعنى 35 مليون فقير مطلق  وفقير مدقع !!
وأظهر التقرير أن 23.2% من شباب مصر في الفئة العمرية( 18 - 29 سنة) يعيشون تحت خط الفقر، وقال التقرير :   وأن شباب الريف الذين يمثلون نحو 59% من إجمالي الشباب في مصر يشكلون نحو 85% من عدد الفقراء، مشيرا إلي أن الفقر أصبح السمة المميزة لمن يعيشون في الريف المصري.

         بعد كدة اسمع جد فى التويتر بيتريق على الشعب المصري ولا بيقول عليه انة بيبيع صوتة فى الانتخابات يكيلو لحمة او بوجبة كنتاكى   او انه  شعب سلبى  ..جزعل منه قوى

    مش  دمى تقيل.. وبكتب مواضيع مكئبة وتسد النفس ...دة قدرنا ...  واللي عايز بنظر وبيتكلم بالقاف والنون  ويحلل وعايز يتقدم الصفوف  ياخد هذا الوضع المؤسي فى اعتباره . ولما يجيب سيرة الشعب يعرف تركيبته وظروفه وفقره وامراضه..



.

هناك 18 تعليقًا:

Wael Salem يقول...

بوست يحزّن يا أستاذنا والله
وكل الكلام اللي قولته حضرتك حقيقي .
اللي مايملكش أكله وأكل عياله مايملكش نفسه .. واللي بيطالبوا ان الشعب يكون إيجابي ... يكونوا هما برضه إيجابيين ويحاربوا عشان الناس دي تاخد حقوقها من اللي ناهبينها .

على باب الله يقول...

مشكلتك يا أستاذ أنك مُهتم .. حقيقي مهتم في الوقت اللي النخبة المصرية - و هما نسبة كبيرة من رواد التويتر و البلوج و الفيسبوك - مش مهتمين خالص إلا بشوية إهتمامات فئوية علشان كده مشفناش مثلاً بوست واحد إتكلم على مشكلة التعليم الفني و الشهادات المتوسطة أو مشاكل الناس اللي واخدين في مشروع إبني بيتك و إسكان الشباب علشان محدش منهم مهتم بيها .. مش بتاعتهم و معندهمش حماس أنهم يتكلموا عن مشاكل ناس تانيه متقدرش توصل صوتها للعالم عبر الشبكة العنكبوتية
----
معلش التعليق سرح مني جامد لكني حسيت البوست ده قوي لأن انا كمان كنت فاكر أن النخبة مهتمة
http://bit.ly/huNYZv

Ahmed Salem يقول...

لا أعرف ان كنت قرأت رواية لأحمد خالد توفيق بعنوان يوتوبيا أم لا. في هذه الرواية تجد أحداث مستقبلية كئيبة هي نتيجة منطقية للوضع القابل للتفجر الذي نعيشه الآن. الرواية مخيفة لانها تصف صورة قميئة لم نكن لنتخيلها تحدث في مصرنا في بوم من الأيام.

بالنسبة لأصدقائنا الانترنتيين الذين يستغربون من الشعب الذي يبيع صوته لأجل كيلو لحمة: مشكلتهم هي العيش أكثر من اللازم في البرج الزجاجي العالي و عدم النزول لأرض الواقع.
لا أنفي الاتهام عن نفسي. للأسف انا واحد منهم في كثير من الأحيان.

Unknown يقول...

لا يا عمو مش دمك تقيل ولا كلامك يسد النفس
كلامك هو الكلام
بس انا حاسة ان ده متعمد، مش مجرد ناس بتسرق فمن كتر سرقتهم الناس وصل بيها الحال لكده

هم قاصدين يوصلوا الناس لكده

Unknown يقول...

واقع البلد الحقيقي ليس منفصلا إطلاقا عن كثير مما يهتم به كثير من النخبويين (الصادقين والمخلصين منهم على الأقل)... فقر المصريين وجوعهم وجهلهم وانعدام الخدمات الصحية والتعليمية ليس إطلاقا منفصلا عن حق المصريين في التمثيل السياسي ولا عن نضال القلة المخلصة ضد عدو المصريين الحقيقي حسني مبارك وعصبة اللصوص المنتفعين من حكمه.


كثيرون يرون هذا الواقع الحقيقي المؤلم لمصر وللمصريين ويعرفونه ويرونه نتيجة مباشرة لفساد الرئيس وأولاده وأصدقائه وبقية أركان نظامه... البعض حاول ينخرط في جهود تنموية مباشرة لمحاولة تحقيق أي تغيير ملموس على الأرض وسط الناس ووسط همومهم وبالطبع النتيجة فشل إحباطه أشد من إحباط النضال السياسي المستحيل ضد النظام المستبد الفاسد. لماذا يفشلون؟ ببساطة لأن "الخرم" كبير وواسع باتساع مساحة الوطن، وأي محاولات لملء الفراغ تذهب - بالضرورة - هباء بسبب اتساع الخرم!

لا أقول أن الحل هو تجميد كل جهد مباشر موجه لمحاولات تحسين الأوضاع ولو قليلا ولو قليلا جدا على الأرض ووسط الناس عبر خدمات تنموية أو حتى خيرية، بينما يناضل النخبويون من أجل الثورة أو التغيير جذريا كان أو جزئيا... لا أقول أن ثمة منطق في إيقاف أي جهد لتسديد احتياجات بعض الناس بشكل مباشر لأن كدة كدة كله رايح في الخرم... بل على العكس، ينبغي على كل من في يده ولو فسيلة أن يزرعها، لحد ما تُفْرَج!

بالنسبة للوم الشعب، فالمسألة تماما كجدلية البيضة أولا أم الدجاجة! بالطبع الشعب الفقير المريض الجاهل يتحمل مسئولية استمرار الأوضاع السياسية والاجتماعية كما هي ويلامون على سلبيتهم وعلى تطرفهم الديني وعلى وعلى وعلى... لكن يبقى السؤال المنطقي من هو ابن دين الكلب الذي أفقر الشعب وأمرضه وكرس جهله ورجعيته بل وكرس لهوسه الديني وأمات روح هذه الأمة وسلب حياة شعبها وحيويته؟

كيف نصل إلى الناس بهذه الرسالة البسيطة؟ سبب فقركم وجهلكم ومرضكم بل وموتكم في عز شبابكم هو مبارك، وأن مبارك هو العدو وليس اليهود والنصارى (مثلا)، كيف نكرز بهذه البشارة إلى جموع الناس التي أفقرها وغيبها وأمرضها مبارك ونظامه ونوصل لهم أخبارا سارة مفادها أن ثمة أمل في الخلاص عبر إسقاط حسني وعصابته وتحقيق تغيير حقيقي يدعم حقوقهم الإنسانية الكاملة لهم ولأولادهم وأحفادهم؟ هذه هي القضية

Dr Nemo يقول...

استاذنا الفاضل
التدوينه كئيبه بالفعل
ولكن ان كان مبتغاك تقطيمنا على سخرية البعض من الشعب فهذا حقك وانا بتعذر لانى من اللى قالوا شعب سلبى ابن كلب
اما لو كان تقطيمك لاننا لا نشغل بالنا بالنظر الى التركيبه الحقيقيه للامر من فقر وخلافه
بالله عليك اليس الافضل معرفه اس المصيبه ورأس البلاء والتركيز عليه؟
يعنى انا احارب التسرب من التعليم ولا احارب النظام المتسبب فيه؟
ليه انتظم فى معارك -بعتبرها- جانبيه فى الوقت الحالى فى حين اصلا حضرتك كويس اوى عدد اللى بيتحركوا فى الشأن العام فى مصر
قليل جدا
ولا يكفى للانتظام فى الحشد وراء مشكله واحده من هؤلاء
وعامة اى مشكلة من دول حاولت الجمعيات الخيرية التعاطى معاها لم يكن دورها يزيد عن التأخير والتخدير
لكن لن تحل المشكله الا بازالة سببها الرئيسى
فساد رأس السلطه
ارجوا ان تتقبل رأيى وتعذر عصبيتى
احترم حضرتك جدا وارجو متزعلش منى

غير معرف يقول...

قلبى وجعنى بجد
ربنا يعينا
وياريت اللى يقدر يساعد اى حد بأى حاجة ما يبخلش عليه
حتى لو شحات فى الشارع ممكن يكون محتاج ومممكن يكون بيمتهن الشحاته
بس ربنا اللى عالم مش انت
نديله ولو عملة قليله مش هتفرق معانا فى اى حاجة
بس هتفرق معاهم كتير لو بجد محتاجين
وياريت يا جماعه لو حد قدامه اسره متعسرة الحال يساعدها وربنا هيباركله فى رزقه
لو طلع ولو 10 % بس من مرتبه
وربنا ينجينا ونتعلم بقى نشكر ربنا على اللى عندنا اللى احنا مش دريانين بيه وبنحس انه حقنا
الأكل والسكن والتعليم والشغل المربح وهكذا
أشكرك يارب على كل نعمك عليا

abdoz يقول...

و الحل ؟؟ أنا متفق مع أغلب كلام حضرتك .. لكن المشكلة هي الحل فين لازم نوصل للناس دي و نقنعها بالمشاركة و التغيير .. لأن لو أي تغيير حصل من غيرهم هيفضلو مهمشين و مش هيحصل تغيير كبير في حالتهم.

السؤال دلوقتي ازاي الوصول للشعب المصري ؟؟ و إزاي إقناعه بأهمية انه يحارب من أجل بقائة ؟؟

غير معرف يقول...

أنا عن نفسي،حطيت صوابعي الشق ووقفت وقلت ستوب للنضال الأنترنتي وقاعد بتفرج علي التهريج،فيه حاجة غلط في كل البغبغة اللي علي النت،فيه حاجة ناقصة،هي أهم حاجة،ناقصة الناس اللي بتتكلم عنهم،بالإضافة لكدة،المناضلين منهم كتيرعايشين في عالم نضالي خاص بهم،ومنهم اللي بينتفعوا مادياً من إستمرارية نضالهم الأجوف،وبيسافروا نيويورك وإستكهولم علي حسه،وشوية شوية بقوا جوه دنيا لوحدها في برج زجاجي منعزل،بيطالبوا،بالتغيير،بل وبالثورة،ومعظمهم مايعرفش،وماأعتقدشي أن حتي عندهم قدرة النزول،والإختلاط بمصر الحقيقية اللي حكيت عنها في تدوينتك :(

MSMO يقول...

هعلق اقول ايه بعد ما جرح الكلام الفؤاد
أنا مش لاقي كلام يعبر عن اللي جواي كل ما أتمناه إن الوضع يتغير بمجهودات القطاع العريض من الناس الي مهتمين بتحسين وضعية الناس زي الجمعات الخيرية من رسالة وغيرها في نفس الوقت اللي يكون في تغيير سياسي موازي بيحصل في بلادنا بلادنا محتاج إن الكتف يبقي جنب الكتف علشان نبني ونرجع مصر زي زمان

سلمت يداك وإن كانت كلماتك أشبه بمبضع الجراح الذي يقطع في الجسد ولم يبدأ بعد في علاج المريض

Engsheva يقول...

مفيش كلام ممكن يتقال
انت عملت زي اللي بيرمي علينا دش مايه بارد في عز التلج عشان نفوق
عندك حق احنا ملناش حق نقول الناس سلبيه ليه وهم اصلا مش عايشين
هو في ميت بيقدر يتحرك :(
تسلم ايدك

Andrew يقول...

صح ...
احنا عندنا رفاهية التدوين
وبنغسل اسناننا عشان اما نبتسم في الصور يبقى شكلنا كويس ... وفي رقبتنا ناس نسيت الابتسامة

هاله يقول...

صح! كل اللي قلته صح
كان ليه صديق طبيب شاطر,حظه الهباب انه اتعين دكتور في نفس المستشفي اللي كان ابوه بيشتغل فيها فراش ولو ان ابوه كان طلع علي المعا ش من زمان ,الا انه دي كانت اول معلومه بتتقال للناس الجداد وهم بيعرفوهم علي اقسام المستشفي. طبعاا المعلومه دي كانت بتتقال بنبره من التعالي مع بعض التقدير, يمكن من باب اظهار شويه تحضر. مفهوم جدا ان هذا الشخص كان لايشترك مع الباقيين في مواقفهم العنتريه ضد الاداره ببساطه لان مينفعش.المهم كان دايما الجبان بتاع المنطقه و كمان كان دايما قاعد لوحده مش عشان جبان طبعا بس يمكن مثلا عشان ابوه؟!
حاولت اكلمه كتير وبعدين بقينا اصدقاء (علي فكره ده مش فيلم انني لا اكذب لان الحقيقه الراجل عمره ماقرريتجمل! فيه كده يوم وصلني, وكان فيه مزيكه في العربيه اجارك الله! وانا الحقيقه كده عبرت بصراحه شديده عن ذوق المزيكا اللي مش ولابد!.فرد علي وقال انا اساسا عمري ماكان عندي وقت اسمع مزيكا عشان يبقي عندي فيها ذوق! انا بحط أي حاجه توش عشان مانمش وانا رايح من دكان ابويا للدروس اللي كان لازم يديها واللي ساعات كانت بتبقي في ليالي امتحاناته هو شخصيا عشان يجيب فلوس تعليمه...........................................................الحقيقه اتكسفت.
ولو انه البوست كان جامد علي الناس كلها وانا منهم وكان فيه تعيبر واضح عن غضب وزعل بس احسن! افضل قول عشان نفوق وربنا يخليك لينا.

علي فكره قعدت اكتب في الشويه اللي فوق دول بتاع ساعتين عشان متزعلش ادينا بنكتب عربي اهو

هاله

مهندس مصري بيحب مصر يقول...

حضرتك معاك حق
فيه ناس نسيت الفقراء من كتر القعدة على النت

الحسينى يقول...

الكلام بيوجع قوى بس حقيقى يمكن بيوجع شويه لما نسمعه لكن لما نشوفه يمكن يخلينا نبطل ننام مرتاحين
شفت ناس عايشه فى غرفه واحده مفروشه معظم الوقت بمخلفات صرف صحى لأن ال"بلاعه" أعزكم الله على طول بتطفح ومعندهمش يصلحوها أو يشوفوا سكن تانى
وشفت ناس مش لاقيه اللى يكفيها النهاردة بس وده فى القاهرة فى قلب القاهرة غير الأقاليم
وجعتنى أوى " وهل لو بيتفرج معانا واحد من اللي عايش مع ابوة وامة واخواته فى اوضة واحدة ، وهم الاغلبية من شعبنا ، حيضحك معانا على السخرية من حالته ومن فقره..... لا اظن . ."

mado80 يقول...

مش لاقي كلام اقوله
:(
كلامك وجعني
:(

عمرو يوسف بلال يقول...

هناك عظماء يصنعون التاريخ ويقف الدهر تحية لذكراهم , وآخرون يتأفف التاريخ من ذكراهم ويبصق الدهر على عفن مثواهم. وهانحن نشهد الصنف الثانى منهم وقد فاحت راىحة عفنهم حتى من قبل أن يفرض على الثرى أن يكون مأواهم.

Dina يقول...

بالطبع الكلام مؤلم ولكنه ضروري للتوعية؛ فأنا على ثقة أن البعض ليس لديهم المعرفة الكافية بالوضع الحقيقي والكثير سيساهمون إذا تثنى لهم في الاصلاح
هناك الكثير من الجمعيات التي تحتاج إلى متطوعين في مجال محو الامية وغيره، وهذه أفضل فرصة لمن يريد أن يساهم بعيداً عن السياسة