الأحد، 23 مايو، 2010

رسالة الى نوارة نجم



         رأى اخر للحملة(الشعبية)لتوفير المياة سبق نشرة فى التعليق على الموضوع فى مدونة نوارة نجم.


      مصر العشة ولا القصر. طول عمرك خطابك للقضايا الكلية , التغير , الفساد , الاسرى ,الديمقراطية حقوق الانسان, القضايا الموجهة للاغلبية من الشعب . الكلام المكتوب ما ينفعش يبقى كلام نوارة نجم ينفع بيقى كلام منى الحسينى فى التليفزيون .ثم التسمية حملة شعبية ازاى , الخطاب موجة للاقلية لسكان العمارات والاسنسبرات والسيفون.. واستجمى بالدش وماتملاش البانيو.. وغسالة المواعين بتستهلك مية اقل , الحملة دى موجهة للاغنياء ، لمصر القصر. الغلابة ما بيستهلكوش مياة ما عندهمش بانيوهات ولا ساكنين فى عمارات ولا حتى عندهم سيفونات ولا بيغسلوا سنانهم ، ولا صرف صحى , حتى مواسير المياة لم تدخل بيوت الكثيرمنهم .. وبتعملوا مع الطلمبة اللى امام القاعة . الناس اللى بيسمعولك وبيقرولك فيهم ناس كتير من مصر العشة , يبجبوكى لانك متبنية قضاياهم اما يلاقيك بتتكلمى عن سلالم العمارات والاسنسرات على طول حيقولوا الكلام دة مش لنا , دى نوارة بتكلم ناس تانية, بتقول كلام زى كلام التلفزيون وبرامج الطبيخ اللى بتقدم اكلات مش فى مقدرتنا, وهو احنا لاقين ناكل اصلا . ويبعدوا.... ويبعدوا.... وما تلاقيهمش لا فى الوقفات الاحتجاجية ولا المظاهرات . واما نروحلهم يقولوا ابعدوا عنا يا بتوع الاسنسرات . سمعت جد علق وقال دى حملة على الانترنت يعتى موجهة للطبقة الوسطى اللى بيخشوا التويتر . الكلام دة غلط .عدد كبير من مصر العشة اتعلم وبيخش على النت بس لسة ساكن فى مصر العشة. اية خطورة الجملة دى , بالاضافة لابعدنا عن مصر العشة وناسها ,اولا بتجهز المجتمع لقبول اى اجرءات لخفض استهلاك المياة . وافضل الطرق الاقتصادية لخفض الاستهلاك زيادة الاسعار. وادينا جهزنا الارض للحكومة . الاخطر اللى جاى حكومة رجال الاعمال باعوا القطاع العام وهما اللى اشتروة. وراس المال العربى والعالمى عاوز شغل ومصر لم يبقى منها الا الارض الزراعية , وعاوزين يشتروها من الفلاحين, والفلاحين لحد الان مش فى دماغهم البيع. و رغم ان الملكية الزراعية تفتت الى اقصى مدى, الخمس فدادين الموزعة بالاصلاح الزراعى يملكها الان اكثر من 30 وارث . ازاى يشتروا الارض ؟ يفقروا الفلاح اولا . المية مش حتيجى , والنيل حاشوة , يجب خفض الاستهلاك والا مش حنلاقى نشرب. نسعر مياة الرى والفلاح يدفع تمن المية اللى حيخدها, والبنك الدولى طلب دة . حتى المثقفين اهم عملين حملة لخفض استهلاك المياة . الحكومة عارفة الازمة من زمان بس مش عاوزة تحلها وبتستفز دول المنبع , وعارفة ان تخفيض حصة مصر من المياة يساعد روؤس الاموال على شراء الارض من الفلاحين بسعر متدنى وزراعتها بالطرق الحديثة, بالرش والتنقيط . وبنصف حصة مصر من المياة ممكن زراعة ضعف المساحة الحالية والخطة جارى تنفيذها ومش حيبقى فية فلاحين . الزراعة الحديثة تقضى على طبقة الفلاحين......... دانتى نوارة نحم مش منى الحسينى .



هذا الموضوع ردا على الحملة(الشعبية) لتوفير المياة بمدونة نوارة نجم

هناك 3 تعليقات:

mourid يقول...

أوافقك تماما

شمس العصارى يقول...

معروف مسبقا ان مصر القصر مش حتتأثر بقلة المياة
لانها لو تأثرت قليلا ببساطة حتاخد الميه ليها و حتمنع غيرها
انا قلت من فترة كبيرة ان النظام يخطط للقضاء على نص شعب مصر الفقير
سواء بالمرض او الجهل او الغرق او الجوع او - اخيرا - العطش .
تحياتى

جبهة التهييس الشعبية يقول...

طب ما الفئة المستهدفة اللي هي الطبقة الغنية والمتوسطة هي اللي بتستهلك مية وعشان كده الطبقة الفقيرة مش بتوصلها المية