الأحد، 6 مارس 2011

هى كدة قارية نفسها


           الشعب يريد اسقاط النظام... اربعة كلمات واضحة شارحة نفسها ،ومش عايزة تفسير... بالعامية الناس عايزة تشيل هذا النظام اللي حكمها 30 سنة ....من يوم 25 يناير ارتفع هذا الشعار والتف حوله الملايين ، وبعد اربعة ايام انسحبت او انهزمت قوات القمع وهربوا ...والجيش نزل .... مبارك طلع وغير حكومة احمد نظيف وحط احمد شفيق وغبر اربع خمس وزراء .....بعض الناس قالوا حلو كده  روحوا بقى .....تاني يوم هجم البلطجية على المتظاهرين فى التحرير وقتلوا المئات بهدف ارعابهم لترك الميدان ....انتصر الثوار وقعدوا فى الميدان ... طلع مبارك قال انا مش حرشح نفسي مرة ثانية  وعين مدير المخابرات نائبا له .... بعض  الناس  طلعت تقول احفظوا كرامة الرئيس وخلوة الكام شهر دول وهو حيمشى .

      الثورة اتخذت من ميدان التحرير محلا مختارا لها وميادين اخرى فى المحافظات ....واتخذ العالم اللي عايزة مبارك يقعد يكمل مدته ميدان جامع مصطفى محمود محلا مختارا لهم...... التحرير بقول الشعب يريد اسقاط النظام ....والمتظاهرين فى جامع مصطفى محمود رايهم مبارك تاريخه كبير وبقالة 30  سنة وعيب نعمل فيه كده ...واحنا اسفين يا ريس.... اللي فى التحرير ظلوا يرفعون شعار الشعب يريد اسقاط النظام .....وواضح ان عدد من الناس فى البلد مش عايزه تفهم.

       المهم فى 11 فبراير مبارك رحل ...تنحى او نحى ...وبعض الناس قالت خلاص المطالب نفذت روحوا بقى..... اللي فى التحرير ردوا :  يا عالم طلبنا واضح  الشعب يريد اسقاط النظام.... واللي سقط راس النظام او القناع فقط... والنظام زي ما هو ..شفيق اللى معينة مبارك وحكومته المكونة من كوادر الحزب الوطنى.... مرعى اللى زور الانتخابات واجهض انتفاضة القضاة.... وعيشة اللى بتبوس ايد ستها زوجة مبارك ...وسامح فهمي وزير البترول وغيرهم لسه قاعدين... احنا عايزين نسقط النظام .وده كلام واضح ..احمد شفيق قال حاضر وغير شوية وزراء وعين اتنين شكلهم معقول من المعارضة ..وروحوا بقى ....نفذنا اغلب طلبات الثورة وخلونا نشتغل.. الدنيا واقفة ....ما سألوش فيه قالوله الواضح انك فهمك على قدك...او بتستعبط  احنا عيازينك انت يا شفيق تروح لانك من النظام افهمها ...وروح ..

      والتحرير فبه اعتصام يومى محدود والجمعة مليونية رافعين  نفس الشعار الشعب يريد اسقاط النظام ...وجامع مصطفى محمود بضع مئات احنا اسفين ياريس والدنيا حالها واقف وعايزين نفتح المدارس..وكلام ماسخ زى دة . قصر الكلام البلد اتقسمت اتنين الجزء الاعظم مصمم على اسقاط النظام... وجزء بيقول كفاية كده ..

        
           اعتصام حزب كفاية كده فى ميدان  مصطفى محمود 
      
           ليس كل من يلتحق بالثورة يستمر فيها الى النهاية..، يخرج منها كلما تقدمت اجزاء تعتبر ان ما تحقق كفاية كدة ....ونشوف شغلنا وادو فرصة ....واحنا اسفين يا ريس ....وشفيق كويس ..والبلد حتخرب ..ويقفوا امام تقدم الثورة.... وممكن يحربوها ايضا رغم انهم كانوا معها فى البداية...
والجزء الاعظم ما زال متمسكا باستمرار الثورة وما زال  رافعا شعار الشعب يريد اسقاط النظام... افهموها..... مش حنسيب التحرير الا بعد ما الثورة تحقق كل المطالب وهى كتيرة... الغاء امن الدولة اقصاء الحزب الوطنى وعزل رموزة والاستيلاء على مقراتة ...محاكمة الفاسدين ...حد ادنى للاجور...دستور جديد  وانتخابات  وطلبات اخرى كثيرة  لم تنفذ  ، وقاعدين لحد ما ننفيذها

      اية الضرر انهم يفضلوا قاعدين فى التحرير شهر اتنين ثلاتة ...والصيف داخل   والجو حيبقى مناسب للبيات فى الميدان ..المرور سالك كل الاسبوع ماعدا يوم الجمعة ....الميدان اصبح مزارا للاسرة .:.النفر من دول بياخد مراته وعيالة ويركب القطر او الاتوبيس  وينزل على الميدان  يتفسح ويقد طوال النهار  يتفرج على اللى بيحصل ويشارك ومايرميش ورقة على الارض... وممكن يسمع كلمة حلوة يحفظها ....وما اجملها من فسحة ..ويرجع بلدة يحكى ويحاكى .... الميدان والمنطقة المحيطة انتعش اقتصاديا ....زيارة التحرير اصبحت جزءا من برنامج السياح ...لايوجد اى ضرر من بقاء الاعتصام شهور طويلة ....وزى ما بتقول نوارة اللى ما رحش التحرير يبقى ما عداش على مصر ....ثم ان هناك اعتصام اخر فى ميدان مصطفى محمود بتاع احنا اسفين يا ريس...او حزب كفاية كدة .. منتهى الديمقراطية والدنيا ماشية ..وحتتنظم اكتر ...وحتحلو اكتر واكتر .

      ثورة 25 يناير لم تعد ملك الشعب المصري.... اصبحت ملك العالم  كلة ....ملك البشرية ، شعب يخرج كله مرة واحدة فى يوم محدد بايديه عارية رافعا  شعارا واحدا : الشعب يريد اسقاط النظام ... يقدم مئات الشهداء والاف الجرحى ومصمم على اسقاط النظام ...وسيحقق كل طموحاته ..الشعب سبق نخبته واحزابه.... والكل يلهث خلفة ... اصبح هو القائد...والمنظر ما يفعله سيصبح بعد حين نظرية تدرس فى الجامعات  ..... الامور ستنتظم والعجلة ستدور اقتصاديا وسياسيا ...والعالم يشاهد ويسجل باعجاب  اعظم حدث ثوري عرفته البشرية ..كيف بنهض شعب اصيل ويعلى حضارته ويصنع  مستقبلة ...واللي بقول كفاية كده عنده ميدان مصطفى محمود يروح يعتصم فية... كل واحد ينام على الجنب اللى بيريحه...

       الثورة التحق بها الملايين ولاتوجد قوة تستطيع اخلاء الميادين الا بقتل مئات  الالاف ....وهذا  فات وقته   بعد ان ملكت الثورة  الشارع والميدان وبالتالى قبضت على السلطة تولى وتعزل وتحقق ما تريد ...
    
                  المجد للثورة ..المجد والخلود للشهداء


هناك 3 تعليقات:

مهندس مصري بيحب مصر يقول...

حضرتك معاك حق
و أبرز دليل إن نخبة المتظاهرين طالبت بحل جهاز أمن الدولة
بينما الشعب ما إنتظرش إذن حد و راح يحل الجهاز بإيده علشان يحافظ على المستندات
الشعب واعي و سابق الكل

MSMO يقول...

تسلم ايديك يا عمو خليل
أحلي كلام الواحد يقراه علي الصبح هو الكلام اللي حضرتك كاتبه ده
بس مين يقرا ويفهم؟

heba يقول...

شكرا يا أستاذنا ..علشان أنا كنت بدأت أشك في ذاكرتي .. أنا فاكرة إن نوارة نجم أكدت يوم 25يناير على شعارين "الشعب يريد إسقاط النظام" "سلمية سلمية" .. مشاهدتي لقاء رولا خرسا مع د.جلال أمين جعلتي أتعجب إذ قالت أن المتظاهرين كان شعارهم أول يوم إسقاط العادلي ثم ظلوا يرفعون السقف يوما بعد يوم ولا أدري ما كان هدفها من بث هذه المعلومة المغلوطة .. دي ملحوظة على الهامش