الخميس، 20 يناير 2011

25 ينابر 2030


- انت رايح فين يا انس مش النها ردة اجازة؟؟
- انا رايح الجامعة يا يرهم ..ماحنا بنروح الجامعة فى يوم  الاجازات.. نحتفل .. ونقابل اصحابنا
- جامعة اية دا انت جامعتك فى جنوب افريقيا .. وعمرك ما رحتها ....ومش عارف بتعمل  ايه فى الامتحان ؟؟
- مش فاهم وضح كلامك يا برهم ....يعنى اية امتحان ؟؟
-  اية برهم.. برهم .. دي دانا ابوك يا جدع...
- انا بدلعك يابو انس..روق  .... يعنى اية امتحان؟؟؟
- يعنى الطالب يقعد ويدولة اسئلة يجاوب عليها فى وقت معين...... ويا ناجح يا ساقط!!!
- ده كلام  يخش العقل يا برهم  …ده شكل من اشكال التعذيب ....انا مش مصدق ان دة كان بيحصل !!
- طيب يعرفوا اللي ذاكر من اللي ما ذاكرش منين؟؟
- وعايزين يعرفوا لية ؟؟؟؟  هما مالهم ....كل واحد عارف نفسة ..
-  يابني انتم عايشين زمن تاني .. حتروح انهى جامعة؟؟
-  جامعة تونس اللي فى الوراق
-  تعملوا اية؟؟؟
- حقابل اصحابي ....و نحتفل ب25 يناير 
- تحتفلوا ,,  كان على ايامنا العيد دة اسمه عيد الشرطة
-  يا برهم روق معايا وكلمني بالعربى ... يعنى اية الشرطة؟؟؟
- انت بتسال اسالة صعب يا انس ..الشرطة دي كانت بنى ادمين  ماسكين عصى ويدوروا الضرب فى الناس!!
- وكانوا عاملين لهم عيد ويخلوكوا تحتفلوا بيه…
- وكان اجازة رسمية كمان
-   25  يناير يا والدى ده عيد الثورة ..
- فكرتني والله … الثورة ولا فكرة الثورة...
- الاتنين واحد
- كان يوم عجب ..انا فاكره كانه حصل امبارح ... انت كنت لسه مولود... وكانت تورة تونس لسة سخنة ..ومافتش غير عشرة ايام . الناس نزلت فى احتجاج عادى... ذي كل مرة بينزلوا فيها ….العدد كان كبير حبتين والامن كان كتير كالعادة  … ظابط شايف نفسه  ...ضرب بنت من المظاهرة .. مسكت فيه ما سابتهوش الا وهو متخربش ... وبيشلب دم .. دوافرها كانت حامية شوية ….العالم اتلموا علبة وادولة علقة تمام.... والعسكر مش لاقية حد يدها اوامر... وقفت ساكتة تتفرج ...ماهو الضابط  كان رخم عليها برضه .. .الرواية انتقلت لكل حتة.... الامن انضم للشعب.... الامن انضم للشعب
- وبعدين
- الراجل ارتعش وخاف يرجع
- هو فية حد قالة ارجع ؟؟
- طبعا ما الراجل وراه ناس ياما ...مستفيدين ...ومصدرينه .... رجالته قالوا العشرة ما تهونش الا على ولاد الحرام   ...دة راجل كبارة برضة …احترموا صبغته وسيبوة يريح ....ووخدوا علاء يمسك بدالة  -  اصل الناس كانت مش طايقة الواد التانى… دمه تقيل وغتت..
-  وبعدين
- الناس ما وافقتش ...قالوا لا دة ولا دة ...مش عايزين حد خالص ....نمشيها عصير.... نمشيها من غير ريس …ومن يومها واحنا من غير ريس واهى ماشية فل الفل
- يعنى اية ريس يا برهم قصدي ياوالدى؟؟
- كان كل بلد يتحكم فيها مجموعة مصدره واحد .. يسموه ريس ...يعمل فيها اللي هو عايزة ...واللي ما يعجبوش او يعارضه يشده ....يعذبه ....يجبسه ...بقتله...  وماحدش يقدر يسأله  او يقوله تلت التلاتة كام......ياخد الفلوس اللي هو عايزها... وابن ادم طماع لايمكن يشبع ابدا ..
- وكان النظام ده فى مصر بس ولا فى كل البلاد؟؟؟
- كل بلد من بلادنا  كان ليها ريس واحيانا يسمى نفسة ملك ... وبعد البنت ما خربشت الظابط وجابته الارض ..والعسكر سابوة يتبهدل .وحصل اللي حصل  .. كل البلاد مشوها من غير ريس..
- وراحوا فين الريسا والملوك دول ؟؟
- لموهم وحطوهم فى متحف ... والناس بتروح تتفرج عليهم ....والله يا انس عايزين نبقى نروح نتفرج ..ده برضة تاريخ يابنى
-  وفاضل منهم كتير؟؟
-  يا ابنى دول ما بيمتوش ....دى عالم مش زينا ...دي عالم ماعندهاش دم ولا احساس..تموت ازاى ..
.......
- انزل يابني ما تتاخرش ...حنتعشى سوا... امك عملالك قلقاس .

هناك 10 تعليقات:

Andrew يقول...

حضرتك بتتكلم جد ... مش دي بيسموها الفوضوية او اللاسلطويةanarchism‏ بتاعة الحرب الاهلية الاسبانية
انا افتكرت انها فكرة منقرضة اصلا

Azza يقول...

بحلم على قدى...من بقك لباب السما

ramy1313 يقول...

بوست جميل جدا ياعمو
بس برهم ماحسسنى أنه ماشفش أنس أو ما شافش الشارع من 15 سنه
بس أحنا فعلا محتاجيين البوست ده ويارب يتحقق

Dr Nemo يقول...

ههههههههههههههههه
يافرحه تامر موافى بيك يا عمو :D

Adel Elgamal يقول...

مقال راثع وبطريقة سرد راقية وممتعة

- أحمد صبحي - مصرى فى فرنسا يقول...

من مبارك للأناركية الجميلة الرومانسية كمان في جيل واحد وفي مصر،خيال علمي رقيق

MSMO يقول...

أكثر من رائعة بس كان التاريخ بتاعها عايز يتقدم شوية :))
تحياتي لك وسلمت يداك

ميناس يقول...

من قال لك اليوم .. اما ان تعتقد ما اعتقد او لعتك الله ..سيقول لك غدا ..اما انتعتقد ما اعتقد او اقتلك
فولتير

غير معرف يقول...

اسمعت ان ناديت حيا

احمد خليل يقول...

الجوار يجرى بين اب وابنة سنة2030والابن ذاهب للاحتفال بعيد الثورة التى جدثت فى 25 يناير 2011
الاب يحكى عن ما جرى حين كان الابن ولبدا
-نمشيها من غير ريس …ومن يومها واحنا من غير ريس واهى ماشية فل الفل
فهم البعض انها دعوة للفوضوية ..لم اقصد ذلك
هل الدنمارك او سويسرا لها رئيس او ملك ريئسها او ملكها شخصيات متحفية ..الثورة ستنهى عهود الريس والملك بالشكل الحالى
-- يعنى اية ريس يا برهم قصدي ياوالدى؟؟
- كان كل بلد يتحكم فيها مجموعة مصدره واحد .. يسموه ريس ...يعمل فيها اللي هو عايزة ...واللي ما يعجبوش او يعارضه يشده ....يعذبه ....يجبسه ...بقتله... وماحدش يقدر يسأله او يقوله تلت التلاتة كام......ياخد الفلوس اللي هو عايزها... وابن ادم طماع لايمكن يشبع ابدا ..
هذا الشكل من الحكم سينتهى ويصبح الرئيس او الملك وظيفة متحفية