فى 22 فبراير 1958تمت الوحدة بين مصر وسوريا تحت اسم الجمهورية العربية المتحدة . حاء الى مصر عدد من التجار السوريين وفتحوا المحلات التي تبيع الحلويات الشامية ، كما افتتحت بعض المطاعم التي تقدم المأكولات السورية . اهم هذه المأكولات كانت الشاورمة ..فلم نكن نعرفها من قبل .
لنا صديق من الاقاليم يعيش وحده فى القاهرة . انتقل الى وظيفة جديدة ، جيدة مرتبها الشهري 25 جنيها فقام باستئجار شقة صغيرة بميدان رو كسى بمصر الجديدة ب 3جنية فى الشهر. احضر صبى من بلدته للقيام بخدمته مقابل 50 قرشا شهريا . كنا نمضى وقت فراغنا فى شقة هذا الصديق التي تجولت بعد وقت قصير الى ما يشبه النادي......اللي فاضى يعدى .اتفقنا ذات يوم ان نفاجئ الصديق صاحب الشقة بالاحتفال بعيد ميلاده .و لم يكن الاحتفال يعيد الميلاد من التقاليد السائدة فى هذا الوقت . توافدنا على الشقة وكنا ستة شباب ..والصبي عبدة يخدم علينا ... وصلاح صاحب الشقة نائم .
- يعنى ما كنش حد منكم استجدع وجاب وهو جاى تورتاية من جروبى بحنية ....ولا حتى دسته جاثو ب36 قرش..اية البخل ده
- ماتيجى نجرب سندوتشات شاورمة من ابو مازن ..
عدينا عايزين كام سندويتش طلع المطلوب 17.... واجد قال انا حاكل 3 ..فى شلن السندويتش يبقى المطلوب 85 قرش
نزلوا اتنين ينفذو ا المهمة ..وصلاح صاحب البيت لسه نادم ..
- اية يا اخ الشاورمة دي ؟؟؟ بتتعمل ازاى ؟
- دي عبارة عن لحم بقرى متبل بالزعتر والجنزبيل منقوع فى الخل والزبادي لمدة 6 ساعات على الاقل وتتحط فى السيخ وفقها قطعية لية ضانى ….زي ما انتو شايفين كده
- وابه العيش اللي بتحطوا فيه اللحمة؟؟؟
- دة خبز سوري غير مخمور عبارة عن دقيق ولبن ويتتخبز على الصاج ..
خلصت عمايل السندوتشات وخدوها ورجعوا بيها على الشقة..
دخلوا لقوا صلاح صحى و ثائر ثورة عارمة!!
- انتم عالم مفترية ....مش حتوردوا على جنة ابدا ..تجيبوا سندويتشات ب85 قرش ....انتم الفلوس اللي معاكم دة ايه .....سارقينها ؟؟
- طيب اهدى با ابو صلاح ..
- دحنا كنا جبنا اتنين كبنو لحمة بتلو ب65 قرش و بسلة وارز والواد عبدة طبخها، وكنا جبنا فاكهة كمان .والله ربنا مش حيسامحكوا على الافتراء ده ولا حبارك لكوا فيها ..
- احنا بس عايزين الواد عبدة اما يروح البلد يبقى يحكى لاخواته انة كل فى يوم شاورمة ببريزة بحالها !!
الا هو كيلو اللحمة بكام دلوقتى ؟؟؟؟
بالمناسبة دة اطول سيخ شاورمة عرفة البشر
هناك 5 تعليقات:
مقال تاريخي .... وشَهي
مقال عالوجع !!!
بوست أكثر من رائع بس لازم تحسر الواحد علي الأيام السابقة
تحياتي لك :)
مع ان عمري 31 سنه بس انا فاكر لما كان كيلو اللحمة ب 3 جنيه تقريبا .. وكان سندويتش الطعمية ب 5 قروش .
ومع اني مانزلتش مصر من 5 سنين بس امي بتقولي ان الأسعار زادت اضعاف في ال 5 سنين دول .
هنا لما تتكلم مع واحد في الستينات من العمر يقولك ان قزازة البيبسي وهو صغير كانت ب 25 سنت ... دلوقتي بقيت بدولار ونص .. بس وقت ماكانت البيبسي ب 25 سنت كانت الأجور بتبدأ من دولار في الساعة ... دلوقتي الحد الأدني للأجور 7.5 دولار في الساعة ... يعني الاسعار اللي زادت .. زاد قدامها الأجر بنسبه مماثلة أو أكبر كمان .
من وقت ما جيت هنا مافيش حاجه سعرها زاد غير السجاير والحمد لله بطلت تدخين من 3 سنين .
وعلي فكره كمان كيلو اللحم المشفي العادي (مش ستيك ولا روست بيف) مش بيزيد عن 3 دولار ... والستيك والروست بيف مش بيزيد عن 4 أو 5 دولار .
شكرا و كل سنة و انت طيب
إرسال تعليق