الثلاثاء، 31 أغسطس 2010

حوار اّخر الليل


-   هى هربت  من جوزها عشان تسلم ؟
-   لأ  هربت عشان تروح الأ زهر..
-   إنت كنت فين لغاية دلوقتى ؟
-   كنت بسمع الدرس ..
-   مين إللى ببقول الدرس ؟
-   موّلانا
-  يعنى هى أسلمت عشان تهرب ؟
-  لا هى هربت عشان تروح الازهر..
-  طيب ما كانت أسلمت من غير ما تروح الأزهر ؟
-  موّلانا قال ماينفعش…..
-  ليه ؟
-  عشان الواحد ضرورى يهرب عشان يروح الأزهر
-  هو مين إللى جاب التعميرة ؟
-   الظابط …
-  ومين إللى كان بيرص ؟
-   موّلانا..
-  يعنى انا أما أحب أهرب ضرورى أروح الأزهر ؟
-  تهربى لية مانتى عايشة كويس ؟
-  هو إللى بيهرب مش عايش كويس؟
- طبعا …….طيب عاوزة تهربى ليه
-  عشان أروح الأزهر  .
……………….

-  قصر الكلام يعنى الواحد  ما ينفعش  يسلم من غير ما يروح الازهر؟
-  لأ ماينفعش موّلانا قال كدة….
-  بس سيدنا عمر أسلم من غير ما يروح الأزهر …
- مولانا قال ما ينفعش ….لازم فى الأزهر..
-   طيب ما ينفعش الواحد يسلم من غير ما يهرب ؟
-  لأ…. ماينفعش مولانا قال كده ..
-  إنت إتسحرت ؟
-  ايوة عز بيه… جاب السحور
-  هو كان موجود ؟
-  طبعا….مولانا عايش فى حضنه
-  جاب  اية ؟
-  كنافة وقطايف ……وهو اللى كان بيطقتق ويولع....
-  ومرات مولانا فين  ؟
-   راحت الأزهر
-  والظابط قال إية ؟
-  كان مونون على الأخر……. جايب تعميره معتبرة ..
……….

-  هو ما فيش حتة الواحد ممكن يهرب فيها غير الأزهر؟
-  لأ مافيش …….مولانا قال كدة
-  وبعدما رجعوها حنيموها مع جوزها غصب عنها؟؟
-  مولانا قال ما ينفعش تنام مع جوزها ….لا غصب عنها…… ولا بخطرها ..
-  طيب وعملتوا اية؟
-  إتفقنا نروح نهتف ضد انها تنام مع جوزها…..وضد البابا…..
-  وإية دخل البابا فى الموضوع؟
-  أصل جوزها صاحبة .. وقالة إنها هربت منه……….ومش عايزة تنام معاه…..
-  والبابا عاوزها تنام معاة غصب عنها ………….  لية ؟
-  مولانا قال كدة……أصل ما عندهمش طلاق…
-   عشان كدة هربت ؟
-  لا عشان كدة أسلمت .
- هو ما ينفعش الواحد يسلم من غير ما يهرب ؟
-   لا مولانا قال كدة ..
-   والعالم اللى عاملة مظاهرة فى الكنيسة ليه ؟
-  عشان عوزينها تنام مع جوزها
-  قدامهم ؟؟؟؟؟؟؟؟
-  معرفش واللة ........روحى إسئلى البابا...
..............


-  طيب قوم نام …….
-  هما العيال  ناموا ؟
-  باين عليك مش ناوى تروح الشغل بكرة ؟
-  لأ حروح الجامع .
-  ناوى تصلى ؟؟؟
-  قولى يا باسط ………عشان ما تنامش مع جوزها.
- طيب وإنتم مالكم…. زعلانين لية؟؟؟؟
-  عشان الحكم لغى الجون ..
-  هى قريبة حسن شحاتة ؟
-  مولانا بيقول ما ينفعش تنام مع جوزها.. ما ينفعش تنام مع جوزها..
……………..

-   على فكرة نسيت أقولك ………….أنا ناوية بكرة أروح الازهر  .
-  تسلمى ؟
-   لأ أهرب



………………………………..

هناك 8 تعليقات:

Unknown يقول...

وادي جزات كل من تسول له نفسه ينزل الازهر يجيب قماش التنجيد
http://elbashayeronline.com/news-110611.html
الولية اتجننت

Fatma يقول...

تحفة :) حلوة اوي بجد

shmpongO citizen يقول...

إيه الجمال ده؟ بجد الكلام ده يتدرس
تسلم ايدك يا عمو .

مهندس مصري بيحب مصر يقول...

لو على الإسلام فهي مسلمة من سنة و نص و حافظة 4 أجزاء من القرأن
لكن الأزهر علشان إشهار الإسلام
يعني علشان تغير الديانة في بطاقتها الشخصية و اوراقها الرسمية
بص هنا
http://www.kamiliashehata.com/

ElBa7r يقول...
أزال المؤلف هذا التعليق.
ElBa7r يقول...

ـ هو مين إللى جاب التعميرة ؟
- الظابط
- ومين إللى كان بيرص ؟
- موّلانا

تسلم إيدك يا جميل

وأنا نفسي أروح الأزهر بارك بس لما تبقي زي هايد بارك :)

احمد خليل يقول...

صديقى مهندس مصرى بتقول هى مسلمة من سنة ونص ،وحافظة اربعة اجزاء من القرأن،شئ عظيم ،الشيخ اللى خدها الازهر لإشهار إسلامها ،ماهى مسلمة والشيخ شاهد على إسلامها، لزومة اية الازهر والشيخ عارف ان الازهر حيبلغ المباحث والمباحث حتمسكها وتنسيها دينها ودين امها وتسلمها للكنيسة.وهذا شئ معروف يبقى اية لازمة ذهابها للازهر ،ما هى بينها وبين ربنا مسلمة.ولا ما ينفعش الواحد يبقى مسلم الا اذا كان مكتوب فى البطاقة.الغرض من ذهابها الى الازهر اثارة فتنة. اما اذا كانت عاوزة تتطلق من جوزها ،فهناك طرق اخرى كثيرة.

leeno يقول...

أسلام ... هروب ... أزهر ... بابا

!!!!!!!