الجمعة، 4 يونيو، 2010

إن واخوتها متخانقين



       كان واخوتها، يرفعوا المبتدأ وينصبوا الخبر ، وبالعكس إن واخواتها ينصبوا المبتدأ ويرفعوا الخبر ، ليه ؟؟ تلك  قصة اخرى.
كان كبيرة اخواتها ، ومالية مركزها وماحدش من اخوانها بينافسها على الزعامه. دى لها اخوات بقلهم اكتر من الف سنة نايمين . ما انفك مثلا .ّ!!
المشكله  في إن واخواتها. بنهم قلق جامد، والنفوس شايله من بعضها ومن مده . وصوتهم على عليها وبيقولوا :
-   إنتى عاملنا الاخت الكبيره ومش واخدين منك حاجه،منظره على الفاضي ، دخولك في اللغة متكرر حقيقي, ولكي تاريخ محترم .. ماحدش ينكر ,  يس  ده كان زمان,  الان  اصبحت غير معبرة عن المعني المطلوب  ، ووجودك فى اغلب الجمل زائف. .
دة كلام اخواتها.  عملوا حملة ضدها ، بزعامه كأن اللى شايفه نفسها أجدر انها تكون على رأس الاخوات. وعملوا وقفة على سلم المجمع اللغوي, وشالوا يفط , و التغير قادم  . وهتافات والذي منه , وقالوا معتصمين لحد ما تلاقولتا صرفه  .


 .إن فى تاحية ، واخواتها بزعامه كأن فى التاحية التانية. وقالوا يصوا واحكموا إنتم بنفسكم :


-  إن الحزب الوطنى يعمل من اجلك انت.
-  إن التغير قادم.
-  إننا نحب الوطن.
-  إن المثقفين يهتمون بالعمل العام.
-  إن الموقف تحت السيطره.
-  إن القطار اهم وسبله مأمونة للسفر.
-  إن الانتجابات نزيهه.
-  إن الحكومة تعمل على حماية محدودي الدخل .
-  إننا نحافظ على نظافة البيئه.
-  إن النظام لا يفكر في توريث الحكم.
-  إن مصر هي الشقبفه الكبرى للعرب.
-  إن اسرائيل هى العدو الحقيقي .
-  إن الحكومه تعمل على رفع مستوي التعليم . 
الخ.........


   واذا كانت اللغه نظام للناس للتفاهم .. إحنا بنحتكم للناس.   جربوا كل ما تلاقوا ( إن )  شيلوها وحطوا مكانها ( كأن ) ،  حتلاقوا الامور أوضح ومفهومة اكتر .  دى حجه كأن واخواتها.
   وجهه نظرجديره يالتفكير  .
        
                  المهم ربنا يهدي النفوس.. دول اخوات برده!!


هناك 6 تعليقات:

mourid يقول...
أزال المؤلف هذا التعليق.
mourid يقول...

ملعووووبة وجميلة جمال مش معقول ننتظر المزيد

جبهة التهييس الشعبية يقول...

هههههههههههههه
لا ما هي اسرائيل بقت جارة

غير معرف يقول...

this is a master piece ya pappa
Akmal...

هاله يقول...

بديعه

محمود سعد يقول...

رااائعة وكمان إحساسها بعد الثورة أروع