كلاكيت تانى مره

             سبق كتبت موضوع بعتوان" اللي ينكسف من بنت عمه مايجبش منها عيال " هناhttp://khalil1932.blogspot.com/2010/05/blog-post_25.html

كتب الدكتور البرادعي امس الجملتين دول فى التوتير :
- نهلة 25 عامًا، في الطائرة، تعليم مميز ووظيفة ممتازة، تبحث عن طريقة للمشاركة في تغيير مستقبل مصر. الشباب أملنا الوحيد. يجب أن نعطيهم الفرصة
- بواب الفندق جورج، شهادة جامعية ولم يجد عملا في مصر. هاجر إلى لندن منذ 40 عاما. لا زال سعيدا بقراره. مصر: يجب أن تصبح قوة جذب لا قوة طرد
      وعبنك ما نشوف الا النور ، نزلوا علية او رد عليه الشباب اللي زي الورد  -كلهم تقريبا يبأيدوه وبحبوه  - ودى عينه عشوائيه من التعليقات ، ماحبنش اذكر اسامي المعلقين   لية مااعرفش :
- زينات 42 سنة، بيضاء دعجاء هيفاء فيحاء حوراء، مطلقة، الاولاد مع ابوهم، تبحث عن التغيير
- إنتخبوا نهلة في الطائرة ، في القطار ، في العبارة ، في الأوتوبيس ، في الميكروباص ، في التوك توك ، إنتخبوا نهلة أملنا الوحيد فى التغير
- محمد، 28 سنة، ابحث عن الإستقرار وشريكة الحياة وتكون زي نهلة .. هتساعدنى
- المصريين بالنسبة للبرادعي هما المصريين المهاجرين اللي لابسين نضيف ويتكلموا لغات وبيحلموا بالتغيير، المصريين الحقيقين مردومين  بالتراب .
- نهلة 26 سنة، مكنتش على الطيارة... أحلم بالتغيير على يد بني آدم لا يهذي ولا يستخف بعقولنا مثل البرادعي .
- الا صحيح، هو البرادعي في الطيارة رايح فين وجاي منين؟ 
- نهله من اجل مستقبل افضل
- عم سمير ، بواب عمارة الصبح وبيبع كرنب ويشوي ذرة بالليل ، ويبحث عن التغيير عادة فى الدور الرابع عند مدام رشا .
- يا دكتور كلامك دة متاخر عشرين سنة الشباب كلهم نسيو حلم السفر لانة بقي من المستحيلات تعرف تسافر .....مصر قوة فشخخخخ
- يحيى، مؤهل متوسط، ميسور الحال، يعمل مندوب مبيعات، يبحث عن التغيير، ولا يشترط الجمال .
- اعلانات مبوبة، قسم التغيير: عصام 32 سنة، مهندس، حسن المظهر، لديه شقة وعربية ويبحث عن التغيير .
- ما احنا قاعدين وطافحبن المرار هنا ما يتكلم علينا .
- انا .......24 سنة .. بغسل المواعين وأكلم نفسي الصبح وأكتب مقالات الضهر وأتخانق مع دبان وشي بالليل.......... زوجتي تحلم بالتغير .
- يا برادعي التغيير هيحصل لما تنزل مع الناس وتشاركهم المظاهرات والواقفات الاحتجاجية والاحداث المهمة.مش تكتفي بالتعليق علي الاحداث من خلال توتير .
- نوال 29 سنة و تحلم بالتغيير لأنها لابسة نفس اللبس من الصبح و الجو نار.
- ........... 18 سنة ، في الطراوة ، تعليم بايظ ، ووظيفة ضائعة تحلم بالمشاركة في تغيير تاريخ مصر علي تويتر ، أملنا الوحيد.


        عشرات التعليقات مستنكره  وساخرة ،والصديق اللي طول الوقت بيدافع عتك ما يقاش ملاحق يحلق،.وما غيرش الموضوع غير مظاهره اسكندريه الرائعه من اجل الشهيد خالد سعيد  ، يا عم الحج الله يرضى عليك احنا ينحبك وما صدقنا لقيناك ، مين اللي بيشورعليك تكتب "لامو اخذة " الكلام الماسخ دة .  يا والدي قللنا حاجة مفيدة . الناس ما صدقت لاقينك ،مش لانك خاتم علم السياسة ، الناس اجمعت عليك لانك راجل نظيف، وذو حبثثيه ، اجمعت عليك وقالت فرصه , وهى حقيقي فرصة .
  يا ولد عمي بلاش حكاية مربية فرنسيه وبلعب اسكواش وبمشي ساعه فى النادي ، الناس بقت روحها في مناخيرها مش طايقة الكلام دة، با خال .  المظهرات بقت شئ يومي والعيال بتتعذب وتتقبل فى الاقسام وانت جاى تقللي نهلة وحورح،دة ما فيش جد فى بر مصر اسمه جورج الا جورج اسحق ، طيب قول جرجس ولا حبيب .
      فلنا بالصراحة يا صاحبي  ما تكنش بطفش  زي العريس اللي عايز يخلع يقوم يهبل ، حد يعمل اللي انت يتعمله دة  والله الناس شرياك وبتحبك وحطه كل املها فيك . ماتخيبش املها يا راجل ..
     ركز شوية  الله يخليك . اقولك حاجة سيبك من التوتير دة اللي مش جايلنا منه الا قله القيمه ، واغلب الناس ما تعرفوش..
قال نهلة قال .